Assalawma a’leykum qa’dirli tin’lawshi doslarimiz. Bu’gin sizler menen Jaqsi tin’lawshi boliw haqqinda pikirlespekshimiz. Jaqsi tin’lawshi boliw o’zi neni bildiredi? So’ylesip atirg’an adam menen so’ylesiw me yamasa ol menen so’z talasiw ma?
A’dette, kimdir bizlerge “tin’la” degen de, bizler “bir na’rseni esitiwim kerek eken”, dep oylaymiz. Misali, oqitiwshimizdin’ ko’rsetpeleri, ata-anamizdin’ qag’iydalari yamasa doslarimizdin’ aytip turg’an na’rseleri haqqinda boliwi mu’mkin. Tin’law esitiwden ko’re ko’birek ma’nisti bildiredi eken. Bul tek g’ana qulaqlarimizdi salip tin’lawda emes, al bar an’imiz ha’m ju’regimiz benen tin’law eken. Bul tag’i o’zimizge jaqin yamasa belgili bir avtoritetke iye bolg’an adamlar emes, al barliq adamlar, misali, shan’araq ag’zalarimiz, doslarimiz, o’mirimizde jan’adan payda bolg’an adamlar, ha’tteki o’zimizdi de na’zerde tutadi.
Jaqsi tin’lap biliw, ja’miyetlik islerimizde de paydali eken. Sizdin’ pikirin’izshe, ha’mme waqit adam o’zi so’ylep, biraq sizdi tin’lamasa, onda bul jerde o’z-ara qanday qarim-qatnas bar dep oylaysiz? Duris, bul jerde hesh qanday tiri qarim-qatnas joq. A’dette qarim-qatnasta, o’z-ara bardi keldi boladi. Sa’wbetlesip turg’an waqitta tek g’ana bir adam so’yley berse, ha’m tin’law bolmasa, onda bul jerde hesh qanday qatnasiq joq ekenin bildiredi. Jaqsi tin’lawshi a’tiraptag’ilar menen ma’nili qarim-qatnasti tuwdiradi.
Solay etip, jaqsi tin’lap biliw, adamnin’ jeke rawajlaniwin asirip, ko’z-qarasin ken’eyter eken. Larry King degen adamnin’ pikirinshe, “Bizler aytiwimiz kerek bolg’an na’rseler arqali emes, al basqalardi tin’law arqali ko’p na’rseler u’yrenemiz”. Ha’r birewimizdin’ ko’z qarasimiz, oy-pikirlerge, ideyalarg’a, ta’jiriybelerge ha’m perspektivalarg’a tola ulli o’mirimiz bar. Bul joqari da’rejege jetiw ushin bizler qulaqlarimizdi ha’m an’imizdi olarg’a ashiwimiz benen ken’eytiremiz. Bug’an tin’law arqali erisemiz.
Muxxades Kitapta bilay jazilg’an: “Balalarim, a’ken’izdin’ na’siyatlarina qulaq salin’”, “Balam tin’la ha’m so’zlerimdi qabil et, sonda o’mir jasin’ uzaq boladi”. Hikmetler 4:4;10
