Assalawma a’leykum qa’dirli tin’lawshilar. Bul du’nyada kimge xizmet qiliwdi aniqlastirip aliw ju’da a’hmiyetli. Bul du’nyadag’i o’mirimiz sinaw ushin berilgen, dep aytadi ko’plegen adamlar. Ba’lkim olardin’ bul ga’plerinin’ bir ma’nisi bar shig’ar. Bul du’nyada qalay jasag’animiz bizlerdin’ tag’diyrimizdi belgileydi. Solay etip, aqir zaman kelgende qaerge baramiz: Qudaydin’ aldina ma yamasa dozaqqa ma? Zamanago’y adamlardin’ ko’pshiligi aqir zaman keletug’inina isenbeydi. Biraq bu’gin ha’m bul o’mirimizde o’zlerimizdi Jaratiwshimiz Qudaydin’ qollarina tapsiriwimiz, Onin’ ko’rsetpeleri tiykarinda jasawimiz bizlerge tinish o’mir alip keledi.

Elshi Pavel o’z sha’kirti Timofeyge aytqanlari bizler ushin da ju’da jaqsi ken’es boladi. Kelin’, ol sha’kirtine ne degenin esitip ko’remiz: “Ulim, al sen Iysa Masiyx arqali beriletug’in miyrim menen ku’shke tolip bar. Ko’plegen gu’walar aldinda Mennen o’zin’ esitken so’zlerdi isenimli adamlarg’a jetkiz. Sonda olar da basqalarg’a u’yrete aladi. Masiyx Iysanin’ jaqsi a’skeri bolip, menin’ menen birge qiyinshiliqqa shida. Xizmettegi a’sker o’zin a’skerlikke shaqirg’an a’skerbasinin’ kewlinen shig’iw ushin, turmis isleri menen baylanbaydi. Jarisqa tu’sken adam da qag’iyda boyinsha jarispasa, jen’is tajin kiymeydi. Awir miynet etken diyxan zu’ra’a’tten birinshi bolip u’les aliwi tiyis. Aytqanlarim haqqinda jaqsilap oylap ko’r. Iyemizdin’ O’zi sag’an ha’mmesin tu’sindiredi. Dawittin’ urpag’inan shiqqan ha’m o’limnen qayta tirilgen Iysa Masiyxti yadin’da saqla! Men ja’riyalap atirg’an Xosh Xabar – usi. Men usi Xosh Xabar ushin azap shegip, ha’tte, jinayatshi siyaqli tutqin bolip baylandim. Biraq, Qudaydin’ so’zi baylawli emes. Sonliqtan men tan’lap aling’anlardin’ da Masiyx Iysa arqali qutqariliwdi ma’n’gilik saltanat penen aliwi ushin, ha’mme na’rsege shidap atirman. Bul so’z isenimli: “Eger Onin’ menen birge o’lgen bolsaq, Onin’ menen birge jasaymiz da. Eger sabirliliq qilsaq, Onin’ menen birge patshaliq etemiz. Eger Onnan waz keshsek, Ol da bizden waz keshedi. Biz sadiq bolip qalmasaq ta, Ol sadiq bolip qaladi. Sebebi Ol O’zinen O’zi waz keshe almaydi” (2 Timofey 1:13).

Qudaydin’ jaqsi a’skeri boliw ushin, adam tek g’ana tirishilik ta’shwishleri haqqinda qayg’ira bermey, Qudaydi quwantiw haqqinda oylawi kerek. Muxaddes Kitapta bul haqqinda bilay jazilg’an: “Sonliqtan da: “Ne iship, ne jeymiz, ne kiyemiz dep ta’shwishlenben’ler. …aspandag’i A’ken’iz bularg’a mu’ta’j ekenin’izdi biledi. En’ aldi menen Qudaydin’ Patshalig’in ha’m Onin’ haqlig’in izlen’ler! Sonda bulardin’ ha’mmesi sizlerge qosimsha etip beriledi” (Matta 6:31-33).

Bul o’mirde-aq Qudaydin’ jaqsi a’skeri boliwg’a qarar etken adamlar, ha’r ku’ni ushrawi mu’mkin bolg’an bos tartisiwlardan qashiw kerek. oysiz ha’m ashiwlaniwlar tek g’ana urisqa sebebshi boladi. Qudaydin’ jaqsi a’skeri bolsa urisqaq bolmawi kerek. Kerisinshe, ol ha’mme menen mu’la’yim, u’yretiwge tayar, sabirli boliwi kerek. Tek sonda g’ana, Qudaydin’ en’ jaqsi a’skeri bola aladi ha’m bul du’nyada haq qilg’an isleri ushin siyliqlanadi.