Assalawma a’leykum hu’rmetli doslar. Sizler menen ja’ne efir arqali ushrasip turg’animizdan quwanishlimiz. Aspandag’i A’kemizdin’ ati ullilana bersin. Bu’gin efirde sizler menen Sarbinaz. Quday, O’z perzentlerinin’ ha’r qanday qiyinshiliqti da jaqsi na’rsege aylantira aliwin, jan’a iymanli tuwisqanlarg’a tu’sintirip beriw ha’r birewimizdin’ waziypamiz. Doslar, kelin’, bu’gingi esittiriwimizdi bir misal menen dawam etemiz.

Keme qiyrawinan tek g’ana bir adam aman qalipti. Tolqin oni kishkene, uliwma adam jasamaytug’in aralg’a shig’arip taslapti. Hu’rmetli dostim, eger sizde usig’an uqsag’an waqiya bolg’aninda, yag’niy adam jasamaytug’in aralg’a tu’sip qalsan’iz, siz Qudayg’a ne na’rseler ushin minnetdarshiliq bildirer edin’iz? Basin’izg’a tu’sken usi qiyinshiliq ushin raxmet ayta alarmedin’iz? Menin’ oyimsha, ko’pshiligimiz naliwdi baslar edik.

Biraq usi jerde Quday bizlerdi tiri qaldirg’ani ushin Og’an raxmet aytiwimiz mu’mkin g’o. Tiri, aman qalg’an insan, a’lbette oni bul araldan tawip, qutqariwin Qudaydan duwa etip soraydi. Qutqariliw qay jerden keledi dep, ol ha’r ku’ni ten’izge tikilip qarap otiradi. Biraq ja’rdem kelmese ne? Aralda ja’ne bir qansha waqit qalip ketiwin’iz mu’mkin ekenin sezsen’iz ne qilg’an bolar edin’iz? Ha’mme de jasaw ushin ha’reket etedi dep oylaymiz. Waqitsha bolsada jay qurip, ash qalmaw ushin awqat tabiwg’a ha’reket eter edik.

Sol aralg’a tu’sip qalg’an adam jasaw ushin kishkene shatir qurajaq boldi. A’lbette ol adam shatirda jawinnan ha’m tag’i basqa na’rselerden jasiriniwi ushin ha’m budan tisqari kerekli na’rselerin saqlawi da mu’mkin. Aradan ku’nler, ha’pteler o’tti. Bir ku’ni ol o’zine aziq -awqat tabiw ushin araldin’ basqa ta’repine bardi. Qaytip kelyatirg’aninda ol o’zinin’ jalg’iz bas panasi bolg’an shatirinin’ janip atirg’anin ko’rdi. Tu’tin aspang’a ko’tirilip atirg’an edi. Doslar, sol adamnin’ orninda bolip qalg’anin’izda ne qilg’an bolar edin’iz?

Og’an kerek bolg’an barliq na’rseler janip ketti, hesh na’rsesi qalmadi. Menin’ oyimsha ol adam qatti qapa bolip ha’tteki g’azeplengen. Qudayim, ne ushin menin’ basima sonsha ta’shwishler tu’sti? – dep jilap, baqirip jiberdi. Ertesi ku’ni tan’da kemeden kelip atirg’an dawis oni oyatip jiberdi. Uship turip qarasa, aralg’a keme jaqinlasip kelyatirg’an edi. Ura, qutqarildim dep quwanishqa tolip baqirip jiberdi. Sizler meni qalay taptin’iz dep sorapti.

Bizler tu’tindi ko’rdik – dep juwap beripti kemedegi matroslar. Qa’dirli dostim, eger a’tirapimizda ha’mme waqit barlig’i jaman bolsa, tu’skinlikke tu’siw ju’da an’sat. Biraq, bizler isenimimizdi jog’altpawimiz kerek, sebebi Quday o’mirimizde O’zinin’ jumisin isleydi, ha’tteki, bizler azap sheksekte. Ha’tteki en’ qiyin jag’daylardi da Quday O’zinin’ perzentleri ushin jaqsiliqqa aylantira aladi. Doslar, kelin’, bu’gin Iysa Masiyxti tan’lap, O;gan isenip, quwanishqa tolip jasaymiz. Ol bizlerge tek g’anan jaqsiliq tileydi. Quday ha’mme waqit bizlerdin’ paydamizdi oylaydi. Sebebi Ol ha’r birewimizdi su’yedi!