Assalawma a’leykum qa’dirli tin’lawshilar. Ku’n dawaminda ha’r qiyli minez-xulqili adamlar menen ko’risemiz ha’m mu’na’sa’bette bolamiz. Biraq olardin’ ha’mmesi menen de til tabisa alabermeymiz. A’lbette, adamlar ha’r qiyli bolg’anlig’i ushin, olardin’ ha’mmesine de jag’iniwdin’ ila’ji joq, dep oylap atirg’an shig’arsiz. Duris, aqilli insan ha’mme adamlarg’a birdey jag’iniwg’a ha’reket etpeydi. Uliwma, aqilli insan o’zi duris dep bilgen na’rseni adamlardin’ pikirlerine qaramastan orinlay beredi. Biraq ja’miyet arasinda, adamlar menen birge jasag’animiz ushin, olar menen mu’mkin bolg’ansha, qolimizdan kelgenshe, jaqsi qatnasip, eki ta’reptin’ paydasin oylap is tutiwimiz kerek boladi.

Bu’gin beriwge niyet etken ken’esimiz, sizlerge a’tirapin’izdag’i adamlar menen jaqsi mu’na’sa’bette yag’niy jaqsi qarim-qatnasta boliwin’isqa, onsha kelise almaytirg’an adamlardin’ kewlin aliwg’a ja’rdem beredi dep u’mit etemiz. Kim menen sa’wbetlesip atirg’an bolsan’iz da, barqulla dosliq kewilde baslan’. Ha’mme waqit sa’wbetlesip atirg’an adamnin’ atin aytip shaqirin’. Sebebi adamnin’ ati – ol ushin en’ jag’imli ha’m en’ a’hmiyetli esaplanadi. Birewdi ku’tip aliwin’iz kerek bolsa, oni jaqsi ha’m mu’layim tu’rde ku’tip alin’. Sa’wbet dawaminda so’ylesip atirg’an adam menen ju’da itibarli bolin’. Onin’ so’zlerine ha’m is-ha’reketlerine shin kewilden qizig’iwg’a ha’reket etin’. Bul an’sat emes, biraq ol adamg’a jaqin dostin’izg’a qarag’an ko’z qarasta qarasan’iz, a’lbette buni epleysiz.

Sa’wbetleser ekensiz ko’birek ken’es beriwdin’, ha’m o’zin’izdin’ ma’selerin’iz haqqinda ayta bermey, oni tin’lawdi a’det etip alin’. Sa’wbetlesip atirg’an adamin’izg’a ko’birek o’zleri haqqinda aytip beriwine imka’niyat berin’. Hesh qashan so’ylesip turg’an adamin’iz benen bir na’rse ushin aytispan’. Ol adamnin’ ha’r bir pikirine hu’rmet penen qaran’. Eger siz nahaq bolsan’iz, tez ha’m sol jerde moyinlan’. Bul so’ylesip turg’an adamda sizge qarata jaqsi pikirdi tuwdiradi. Ol adamnin’ pikirleri qa’nshellim duris ha’m mazmunli ekenin tez-tezden og’an aytip turin’.

Qanday temada so’ylessin’izde, ha’r bir ma’selege sa’wbetlesip atirg’an adamin’izdin’ ko’z qarasi menen qaran’. Onin’ pikiri ha’m tileklerine sezimli bolin’. Ko’p adamlardin’ qaytalaytug’in qa’telerinin’ biri bolg’an – O’mirde ele u’lgeremen, ele waqit bar, dep ko’binese orinlaw lazim bolg’an ko’p islerdi artqa su’riw bolip esaplanadi. Jaqinlarin’izg’a, doslarin’izg’a, tuwisqanlarin’izg’a kewlin’izdegi ga’pler bolsa, erten’gi ku’ndi ku’tip otirmay, waqit barda usi jilliliqti, ju’regin’izdegi bar miyirdi olar menen bo’liskenin’iz maqul. Qa’dirli tin’lawshilar, o’mir, mashqalalar, baxit, imka’niyat haqqinda ja’nede ko’birek biliwdi qa’lesen’iz bizlerdin’ danaliq.com saytimizg’a mira’a’t etemiz.