Assalawma a’leykum hu’rmetli tuwisqanlar. Sizler menen efir arqali ushrasip turg’animizdan ju’da quwanishlimiz. Bu’gin sizler menen Muxaddes Kitapti u’yreniwdi dawam etemiz. Qollarin’izda Muxaddes Kitaplarin’iz bolsa, Matta 4 babin aship bizler menen birgelikte oqiwg’a shaqiramiz. “Sonnan son’, shaytan sinasin dep, Muxaddes Ruwx Iysani sho’lge alip bardi. Iysa sol jerde qiriq ku’n, qiriq tu’n oraza tutip, aqiri ash boldi. Sonda azg’iriwshi shaytan Onin’ qasina kelip: – Eger Sen Qudaydin’ Uli bolsan’, mina taslarg’a buyir, olar nang’a aylansin! – dedi. Iysa juwap qaytarip: “Adam tek g’ana nan menen emes, al Qudaydin’ awzinan shiqqan ha’r bir so’z benen jasaydi”, – dedi.
Sonnan son’, shaytan Oni muxaddes qala Erusalimge alip barip, Ibadatxananin’ to’besine turg’izip qoydi da, Og’an: – Eger Sen Qudaydin’ Uli bolsan’, to’men sekir. Sebebi bilay dep jazilg’an: “Ol perishtelerine buyriq beredi. Ayag’in’di tasqa urip almawin’ ushin, Olar Seni qollarinda alip ju’redi”, – dedi. Iysa og’an: “Qudayin’ Jaratqan Iyeni sinama!” – dep te jazilg’an. – dedi.
Ja’ne shaytan Oni ju’da biyik bir tawg’a aparip, Og’an du’nyanin’ barliq patshaliqlari menen olardin’ sa’n-saltanatin ko’rsetip: – Eger ayag’ima jig’ilip, mag’an tabinsan’, usilardin’ ha’mmesin Sag’an beremen, – dedi. Sonda Iysa og’an: – Joq bol ko’zimnen, shaytan! “Qudayin’ Jaratqan Iyege siyinip, tek Og’an xizmet et!” – dep Muxaddes Jaziwda aytilg’an, – dedi. Sonnan keyin, shaytan Onin’ qasinan ketti. Sonda perishteler kelip, Iysag’a xizmet etti. Iysa Galila u’lkesinde O’z xizmetin baslaydi.
Iysa Yaqiyanin’ tutqing’a aling’anin esitip, Galila u’lkesine qaytip ketti. Ol Nasira qalasin qaldirip, Zebulon ha’m Naftaliy do’geregindegi ko’ldin’ jag’asinda jaylasqan Kaparnahum qalasina kelip ornalasti. Solay etip, Iyshaya payg’ambar arqali aytilg’an mina so’zler orinlandi: “Ha’y, Zebulon jeri menen Naftaliy jeri, Ten’izge baratug’in joldag’i, Iyordannin’ arg’i jag’asindag’i, basqa milletler jasaytug’in Galila eli! Qaran’g’iliqta jasag’an xaliq u’lken bir jariqti ko’rdi. O’lim qaran’g’isinda jasag’anlar ushin, Jaqtiliq nuri tu’sti”.
Sol waqittan baslap, Iysa: – Ta’wbe etin’ler! Sebebi Aspan Patshalig’i jaqinladi! – dep jariyalay basladi. Iysanin’ da’slepki sha’kirtlerin tan’lawi. Iysa Galila ko’linin’ jag’asinda ju’rgende, ko’lge aw salip atirg’an eki ag’ali-inilini: Petr dep atalg’an Shimondi ha’m onin’ inisi Andreydi ko’rdi. Olar baliqshilar edi. Iysa olarg’a: – Menin’ izimnen erin’ler! Men sizlerdi adamlardi awlaytug’in awshilar qilaman, – dedi. Olar da’rriw awlarin taslap, Onin’ izine erdi. Sol jerden ketip baratirip, Ol basqa eki ag’a-inilini: Zebedeydin’ uli Yaqipti ha’m onin’ inisi Yuxandi ko’rdi. Olar a’kesi Zebedey menen birge qayiqta awlarin jamap otirg’an edi. Iysa olardi da shaqirdi. Olar da’rriw qayiqti da, a’kesin de qaldirip, Onin’ izine erdi.
Iysa ma’jilisxanalarinda ta’lim berdi ha’m Aspan Patshalig’i tuwrali Xosh Xabardi jariyalap, xaliqtag’i ha’r qanday awiriw ha’m ha’lsizlikti shipalaytug’in edi.
Iysa tuwrali xabar pu’tkil Siriyag’a jayildi. Barliq awiriw adamlardi, tu’rli sirqaw ha’m da’rtke ushirag’anlardi, jin urg’anlardi, qoyanshiq ha’m lan’ bolg’anlardi Og’an alip keldi. Iysa olarg’a shipa berdi. Onin’ izine Galiladan, Dekapolisten, Erusalimnen, Yahudiyadan ha’m Iyordannin’ arg’i jag’inan kelgen ko’p xaliq erip ju’rdi.
Haqiyqiy baxitliliq. Iysa alamandi ko’rip, bir tawg’a shiqti. Ol otirg’annan keyin, sha’kirtleri qasina keldi. Iysa olarg’a bilay dep ta’lim bere basladi: “Qudayg’a mu’ta’j ekenligin tu’singenler baxitli! Aspan Patshalig’i olardiki! Qayg’irip ju’rgenler baxitli! Olar jubanish tabadi. Kishipeyilliler baxitli! Olar jer ju’zine iyelik etedi. Haqliqti an’sap, og’an umtilg’anlar baxitli! Quday olardi toliq qanaatlandiradi. Miyrim-sha’pa’a’tliler baxitli! Olar miyrim-sha’pa’a’t aladi.
