“Mine, Men qapi aldinda qag’ip turman. Eger kim de kim dawisimdi esitip, qapini ashsa, onin’ u’yine kiremen. Men onin’ menen, ol Menin’ menen birge awqat jeydi” Ayan 3:20. Bul ayat haqqinda ne deysiz? Onin’ ma’nisi ne dep oylaysiz? Bul Iysani bilmeytug’inlardi shaqiriw dep oylasiz ba? Duris, qanday da bir bo’limi sonday. Bul ayat Laodikiya qalasindag’i Masiyxtin’ ja’ma’a’tina jazilg’an. Iysa Masiyx Ayan kitabinda tap usi so’zlerdi Laodikiya qalasindag’i ja’ma’a’tqa qarata aytqan edi. Ne ushin? Loadikiya qalasindag’i ja’ma’a’t, Qudaydan uzaqlasip, o’z ha’reketleri menen dawam etip atirg’an edi. Olarda Muxaddes Ruwx o’ship qalg’an, Qudaydin’ erkin ha’m qu’diretin umitqan edi.

Bul ayat ha’zirgi ku’nde ju’da ko’p ja’ma’a’tlarg’a ha’m Iysag’a iseniwshilerge de tiyisli. Sebebi ko’pshilik ja’ma’a’tler ha’m iseniwshi adamlar iseniminde suwip Qudaydin’ So’zin umitip baratir. Ja’m’a’tlerdegi wazlar alding’iday yoshlantiratug’in ha’m qiziq emes bolip qalg’an. Negedur ja’ma’a’tqa kelgenler waz dawaminda esnep otiratug’in bolg’an. Bul awhal bizlerge tanis.

Qa’dirli doslar, ja’ma’a’ttin’ bolg’ani ha’m ha’r qala ku’ni ja’ma’a’tqa kelip ju’rgenimiz ushin Iysa menin’ menen birge dep oylap adaspayiq. Bul sebepler hesh qashan bizlerdin’ ju’reklerimizdi oyata almaydi. Ne ushin suwip baratirmiz? Sebebi Qudaydin’ So’zine itibarimiz kemeyip, Oni ha’r ku’ni oqiwdi toqtatip atirmiz. Og’an boysiniw haqqinda oylamay atirmiz. Qudaydin’ So’zin tek g’ana bilip qoymay, Og’an boysiniwimiz ha’m kerek. Doslar, kelin’, Qudaydin’ g’a’zebinen qorqayiq.

Iysani qabil qilg’an waqtimizda, Og’an o’mirimizdin’ iyesi boliwin sorag’an edik. Biraq endi kelin’ o’zlerimizdi tekserip ko’reyik. Ol elege shekesh o’mirimizdin’ iyesi me? Yamasa o’mirimizdi o’zimiz basqarip atirmiz ba? Ol bizlerdin’ o’mirlerimizge kiriw ushin bizlerdin’ esigimizdi qag’ip tur. Og’an esigimizdi ashamiz ba? O’mirimizdi shege qag’ilg’an qollarina tapsira alamiz ba?

Ja’ma’a’tte ha’m ju’reklerimizde oyaniw bolg’anda Qudaydin’ nuri tu’sedi. Quday buyirg’an islerge u’lken qa’lewler oyanadi. Oyaniw bolg’anda a’tirapimizg’a Xosh Xabar jayiladi. Oyaniw bolg’anda Onin’ Ruwxi ha’m jarilqawinan ra’ha’tlenemiz. Bul ju’da a’jayip. Quday O’zinin’ ha’r bir perzentinen oyaniwdi ku’tedi.

Eremiya payg’ambar bilay degen edi: “So’zlerin’ ju’regimdi ot kibi, Su’yeklerimdi shoq kibi o’rteydi, Oni ishimde saqlawdan sharshadim, artiq shiday almayman”.

Eremiyag’a uqsap Qudaydin’ So’zi ju’regimizde bolsa Oni ishimidze uslap turiwdin’ ila’ji bolmaydi. Oni ishimizde uslap turmayiq. Esigimizdi Iyemiz Iysag’a ashayiq. Onin’ So’zleri ju’regimizdi toldirsin.