Assalawma a’leykum qa’dirli doslar. Adamnin’ ga’p so’zleri onin’ nelerge isenetug’inin bildiredi. Iseniwshi adamnin’ ga’p so’zleri ha’m is-ha’reketleri bolsa onin’ Qudayg’a bolg’an iseniminin’ qay da’rejede ekenin ko’rsetedi. Quday iseniwshi adamnin’ o’mirinde O’zinin’ ma’qseti ha’m rejelerin bildirgeninde, bul na’rse iseniwshini qiyin awhalg’a saladi. Sebebi bizler ko’binshe o’zlerimizdin’ o’lshemimiz benen o’lsheymiz, ha’m aqiri bul na’rse bizlerdin’ qolimizdan kelmeytug’inin an’laymiz. Quday bizlerge ju’klep atirg’an tapsirma qolimizdan kelmeytug’inin biledi. Ol tek g’ana bizler arqali O’z isin islemekshi. Solay etip, bizler Quday ushin “Awa”, dep yamasa, o’zlerimizdin’ tinishlig’imizdi ha’m ku’shimiz jetpeytug’inlig’in oylap “yaq” dep aytiwg’a qarar qiliwimiz kerek boladi. Bizlerdin’ ha’reketlerimiz, so’zlerimiz isenimimizdin’ qanday ekenligin ko’rsetedi. Kelin’, Dawit payg’ambardin’ o’mirinen bir misaldi ko’rip shig’ayiq. Sonda sa’wbetimizdin’ negizgi ma’nisi aniqraq boladi.
Payg’ambar Samuel jas Dawitti patsha etip tan’lag’ani esin’izde me? Sol waqitta Shaul ele o’zinin’ taxtinda otirg’an edi. Dawit bolsa qoylarin bag’ip ju’rgen edi. Filistler Izrail xalqina ku’n bermeytug’in, olarg’a tez-tezden hu’jim qilatug’in edi. Dawittin’ ajag’alari da Filistler menen bolg’an urista qatnasqan. Dawitti a’kesi ajag’alarinan xabar aliwg’a jibergen edi. Dawit uris maydanina jetip kelgende, Galiyaf ortag’a shig’ip, Izrail a’skerlerin birme-bir urisqa shaqirip turg’an edi. Jen’ip shiqqan ta’rep jen’ilgen ta’repti tutqing’a aladi dep sha’rt qoydi Goliaf. Dawit bolsa: “Qu’diretli Qudaydin’ a’skerlerin kim kemsitip atir?” – dedi.
Muxaddes Kitapta bulay jazilg’an bolmasa da, sol waqitta Dawit Quday oni tap usi u’lken dushpan a’skeri menen qarsi gu’reste boliwin kewlinde sezgen boliwi mu’mkin. Dawit ha’m ne qiliwin bilmey ekilenip turg’an boliwi ha’m mu’mkin, biraq Qudaydin’ xalqin uyatta qalip atirg’anin ko’rip, shidap tura almag’an dep oylaymiz. Solay etip, Dawit sol adam menen gu’resiwge qarar qildi. Qararin mna so’zler menen tastiyqladi: “Meni jolbaristin’, ayiwdin’ pa’njesinen azat etken Iyemiz Filistlerdin’ qolinan da azat etedi”. Dawittin’ so’zleri onin’ Qudayg’a bolg’an isenimin ko’rsetedi. Ol Quday o’mir bulag’i ha’m Qutqariwshi ekenine shin ju’rekten isengen. Ol Qudaydi qu’diretli dedi. Ol Izrail a’skerlerin qorg’aydi dedi. Quday solay etti. Dawittin’ so’zlerinen ha’m is-ha’reketlerinen Qudayg’a bolg’an isenimin ko’riwimiz mu’mkin.
Bizlerdin’ so’zlerimiz , is-ha’reketlerimiz ha’m Quday haqqinda ne oylawimizdi, Oni qa’nshellim biliwimizdi ha’m Og’an qa’nshellim isenetug’inimizdi ko’rsetedi. Adamlar Dawitti oysiz kishkene bala dep biletug’in edi. Goliyaf ta oni oysiz kishkene bala dep mensinbedi. Biraq Quday usi kishkene bala arqali Izraillilerdi dushpannan qutqardi. Usi kishkene bala arqali O’zinin’ qu’diretin ko’rsetti. A’tiraptag’i xaliqlar Izraildin’ Qudayi haqqinda biliwi ushin, Izraillilerdi dushpannin’ qolinan qutqardi.
Quday bu’gin ha’m bizler arqali islemekshi. Ol bizler arqali basqalarg’a O’zinin’ kimligin bildirmekshi. Onin’ mira’tin qabil qiliw bizlerdin’ qolimizda.
