Assalawma a’leykum qa’dirli tin’lawshilar. Bu’gin itibarin’izg’a bir hayaldin’ qilg’an isinen qa’nshellim pushayman bolg’ani ha’m Qudaydin’ miyrim-sha’pa’a’ti haqqindag’i guwaliqti aytip bermekshimiz. Ha’zirgi ku’ni ko’plegen hayallar kareyera, egoyizm yag’niy o’zimshilik ha’m basqa sebepler arqali ishindegi balasin aldirip taslaytug’in bolg’an. Bu’gingi qaharmanimiz da sonday jol tutqanlardin’ biri. Kelin’, onin’ guwalig’in esitip ko’remiz.

“Men budan bes jil aldin Quday ha’m Iysa Masiyx haqqinda esitpegen edim. Quday Iysa Masiyx arqali bizlerge gu’na batpag’inan qutiliw imkanin bergenin bilgenimnen son’, o’mirim o’zgerdi. Sol waqitlari men jigirma jaslardan o’tken edim. Ata-anam jaslay turmisqa bergeni ushin ele bala ko’teriwge tayar emes edim. Biraq aradan ko’p waqit o’tpey eki qat boldim. Tog’iz ayli qiyinshiliqlardan son’ qiz perzentli boldiq.

Son’ jaqin arada basqa tuwmawg’a qarar ettim. Qizim bir jastan o’tkennen son’, ja’ne eki qabat ekenimdi bilip qaldim. Hesh kimge aytpay barip balamdi aldirip keldim. Hesh kim hesh na’rse sezbedi. Eki jil o’tkennen keyin, ja’ne bir balamdi aldirdim. Ha’r sapari balamdi aldiriw men ushin qorqinishli fizikali ha’m ruwxiy awhal boldi. Sol waqitta men pushaymanliqtan ko’re ruwxiy jen’illikti sezetug’in edim.

Qilmisimnin’ negizgi ma’nisin o’mirimde Qudaydi tanip bilgenimnen son’ tu’sindim. Ku’yewim ko’p waqittan beri basqa bala ko’termey atirg’anlig’imdi aytatug’in boldi. Son’ tag’i balamiz boliwin qa’ley basladi. Men de onin’ pikirine qosildim. Biraq waqit o’tken sayin bala ko’tere almadiq. Aldinlari men tez eki qabat bola alatug’in edim. Al endi bolsa bul menin’ qilmislarim ushin berilip atirg’an jaza shig’ar dep oyladim.

Buni esitken ku’yim qatti u’yaldi. Men de qilg’an ayibimnin’ awirlig’inan qiynalip kettim. “Qudayim, men eki ma’rte ku’yewime aytpay denemde jan’a baslanip atirg’an o’mirdi nabit qilg’anim ushin tag’i perzent ko’riwge ilayiqli emes ekenimdi bilemen, – dep jalindim. Duris, men ul perzentsiz bul o’mirden ketiwge ilayiqliman, biraq Sennen o’tinip sorayman, Mennen miyrim-sha’pa’a’tin’di ayama, ja’ne perzent ko’riwime imka’n ber” – dep duwa ettim. Sodan keyin ku’yewimnin’ aldinda da qilg’an islerimdi aytip aybimdi moyinladim. Ol ko’p waqitqa shekem menin’ menen so’ylespey ju’rdi. Son’ birgelikte bul haqqinda ibadat ete basladiq. Quday bizlerdin’ ibadatimizg’a juwap berdi, balalarimnin’ tuwiliwi Qudaydin’ mag’an qarata miyrim-sha’pa’a’tinin’ ha’m a’lpayimshilig’inin’ ulli ko’rsetpesi boldi. Ol mag’an o’zim ilayiqli bolmag’an na’rseni berdi.

Quday miyrim-sha’pa’a’tin O’zinin’ Patshalig’inda jasaytug’inlarg’a beredi, Onin’ Patshalig’inda jasawg’a ruxsat beredi. Men Qudaydin’ miyrim-sha’pa’a’ti haqqinda aldinraq esitkenimde edi, eki kishkene o’mirdin’ nabit boliwina sebepshi bolmas edim. Men ele de Qudaydin’ miyrim-sha’pa’a’tina ilayiqli emes ekenimdi bilemen. Biraq Quday Mennen bug’an ilayiqli boliwimdi talap etpeytug’inlig’in bilgenim, meni quwantiradi. Tek g’ana Qudayg’a boysinip, Onin’ jolinan ju’riwimdi qa’leydi. Bul menin’ qolimnan keledi. Ha’zir hayallar arasinda tuwilajaq perzentin aldiriwlarina qarsiman. Abort qildirajaq bolg’an hayallar menen shin kewilden sa’wbetlesiwge tayarman. Olardi bul joldan qaytariwg’a ha’reket etemen. Bul ma’selede Quday mag’an O’zi ja’rdem beredi”.