Assalawma a’leykum hu’rmetli radiomiz iqlasbentleri. Sizler menen efir arqali ushrasip turg’animizdan ju’da quwanishlimiz. Qa’dirli doslar, sizler menen “Danaliq” radiosi, marhamat tin’lap dem alin’. Bu’gingi esittiriwimizdi atamiz Ibrayim ha’m onin’ Qudayg’a bolg’an iyman ha’m isenimi haqqinda tayarladiq.
Quday Ibrayimg’a uli Isaqti soyip qurbanliqqa keltiriwin aytqaninin’ ayrim ma’qsetleri bar edi. Birinshi ma’qseti – Ibrayim atamizdin’ Qudayg’a bolg’an iymaninin’ sinaliwi edi.
Quday Ibrayimdi sinap ko’rmekshi edi: qa’ne, Ibrayim Qudaydan basqa ja’ne kimlerge boysiniwi ha’m qulaq saliwi mu’mkin eken? A’lbette, Quday Ibrayimdi sinap ko’riw ushin basqa jollardi da ko’riwi mu’mkin edi. Biraq ne ushindir Quday tap usi joldi, yag’niy Isaqti qurban qiliwdi qa’ledi. Quday Isaq arqali ko’plegen xaliqlar du’nyag’a keliwi haqqinda Ibrayimg’a aytqan edi. Qa’dirli tin’lawshilar, Quday bizler, masixiy adamlarg’ada tap usig’an uqsag’an ko’plegen wa’delerdi bergen.
Eger aqirina shekem shidap, Iyemiz Iysa Masiyxti ekinshi ma’rte keliwin jariq ju’z benen ku’tip alsaq, demek, ma’n’gilik o’mirge erisemiz. Budan tisqari, “elshiler” kitabinda da pu’tkil shan’arag’imiz benen qutqariliwimiz haqqinda ha’m wa’de bergen. Duris, o’mirimizde ayrim ma’seleler, quwg’inlar bolip turipti. Bul degeni, endi barlig’i tamam boldi, Quday bizlerdi yadinan shig’ardi degeni emes. Qudaydin’ Ibrayim atamizg’a bergen wa’desi de a’melge asiwi kerek edi. Bug’an Ibrayim qatti isenetug’in edi. Ibrayimg’a Qudaydin’ buyurg’anlarin qiliw qa’nshelli awir bolsada, barlig’in tap Quday aytqanday qilip orinladi.
Ibrayim atamizdin’ isenimi ju’da ku’shli edi, eger Isaq qurban bolip o’lgen jag’dayda da, Quday oni qaytaldan tiriltiriwine isenetug’in edi. Sebebi – Quday Isaq arqali qilajaq bolg’an islerin ele a’melge asirmag’an edi. Quday Isaqti qutqarip qalg’aninda Ibrayimg’a, balani o’ltirip ba’ribir Qudaydi qanaatlandira almaytug’inin ko’rsetpekshi edi.
Kerisinshe, insan Qudaydin’ aytqanlarin orinlap, usi arqali Qudayg’a quwanish alip keliwi mu’mkin eken. Qa’dirli tuwisqanlar, Quday adamlar ushin en’ jaqsi na’rselerdi qurban qiliwi mu’mkin ekenligin, Ibrayim bizler masixiylerge ko’rsetpekshi edi. Isaqtin’ o’limi, a’lbette, Iyemiz Iysa Masiyxtin’ o’limin esletedi.
Quday ha’m tap Ibrayim atamiz kibi O’zinin’ jalg’iz Ulin su’yetug’inin, usi arqali biliwimiz mu’mkin. Sonda da, Quday Iysa Masiyxti adamlardin’ qutqariliwi ushin qurban qilip atanaq ag’ashta o’liwine ruxsat berdi. Bizler bu’gingi ku’ni usi o’lim arqali tirimiz.
Qudaydin’ bizler, adamlar ushin bergen qurbanlig’i aldinda ba’ribir bizlerdin’ qurbanlig’imiz hesh qanday bahag’a iye emes. Doslar, Qudayg’a boysinip, Onin’ nizamlari boyinsha jasawimiz, bizlerdin’ en’ jaqsi qurbanlig’imiz eken.
Hu’rmetli radio tin’lawshi iqlasbentler, sizler menen xoshlasar ekenbiz, o’zlerimizdin’ elektron ma’nzilimizdi esletip o’tsem. danaliq.com Qa’dirli tuwisqanlar, bizlerge jazip jibergen pikirlerin’izdi ku’tip qalamiz. Xosh saw-salamat bolin’.
