Men Qudayg’a tiyisli bolg’anim ushin jerdegi hu’kimetke qanday qarim-qatnasta boliwim kerek? degen soraw ha’r bir masixiy adamnin’ oyinda payda bolg’an boliwi mu’mkin. A’lbette, joqaridan tuwilg’an adamlar ushin Quday aspanda a’jayip orin tayarlag’an – ol bizlerdin’ aspandag’i watanimiz esaplanadi. Ha’zirshe jerde jasag’animiz ushin bizler ha’mme menen birge ag’ayin tuwisqanimizlardin’ arasinda, xalqimizdin’ ishinde, ha’r birewimizdin’ waziypamiz bar. Muxaddes Kitap bizlerge u’yretkenindey, “Imperatordin’ haqin Imperatorg’a, Qudaydin’ haqin Qudayg’a berin’ler” dep. Bizler saliq to’legenimizde tek g’ana hu’jdanimiz sebepli emes, ba’lkim, barliq adamlar, hu’kimet ha’m hu’kimet basshilari ushin Qudaydan soraniwimiz kerek, olar ushin duwa etiwimiz, shu’kirshilik bildiriwimiz de lazim.

Ha’r ku’ni bizler ha’r qiyli adamlar ushin duwa etemiz. Ko’binese o’zlerimiz ha’m ag’ayin tuwisqanlarimiz yamasa doslarimiz ushin. Biraq hu’kimetimiz ushin kim duwa etedi? Duris, olar ushin geybir adamlar duwa etedi, biraq turaqsiz ra’wishte. Doslar, ne dep oylasiz? Olar ushin duwa etiwimiz ne ushin ju’da a’hmiyetli?

Bunin’ birinshi sebebi bul, tinish o’mir su’riwimiz ushin. Muxaddes Kitapta bilay jazilg’an, “Quday aldinda ha’mme adamlar ushin sorap, duwa etip, jalbarinip, minnetdarshiliq bildirsin, patshalar ha’m basshilar ushin da duwa etsin. Sonda bizler Qudaydin’ joli menen hadal jasap, paraxat ha’m tinish o’mir su’remiz”. Ma’mlekettegi hu’kimet ha’m ta’rtip bul – Qudaydin’ nizami, sebebi Muxaddes Kitapta bilay jazilg’an jeri de bar: “Qudaydan bolmag’an hesh qanday hu’kimet joq, bar bolg’an hu’kimetlerdin’ ha’mmesi de Quday ta’repinen ornatilg’an”. Demek, bul hu’kimet ushin duwa etiwimizdin’ ekinshi sebebi.

Qudaydi su’yetug’in adam Oni ha’mme waqit quwantiriwg’a ha’reket etedi; Onin’ erkin bilgen adam bolsa, oni orinlaydi. U’shinshi sebep, menin’ pikirimshe en’ tiykarg’i sebeplerdin’ biri, olar da ha’mme adamlar qatari qutqariliwg’a mu’ta’j bolg’anlar: “Ol (yag’niy Quday) pu’tkil adamlar haqiyqatti bilip, qutqariliwin qa’leydi”. Patshalardi, ha’m barliq hu’kimet basshilarin da Quday su’yedi.

Quday olardin’ da qutqariliwin ju’da qa’leydi. Biraq “Ol haqqinda isitpegen bolsa, Og’an qalay iseniwi mu’mkin?” Sonin’ ushin da Quday bizlerdi olardin’ aldina jiberedi, olar da Xosh Xabardi esitip, ma’n’gilik o’mirge erisiwi ushin.

Sonin’ ushin qa’dirli doslar, pa’k qollarimizdi ko’terip, bizlerdin’ u’stimizden qoyg’an patshalar ha’m hu’kimet basshilari ushin barqulla duwa eteyik.

Qudaydan olarg’a danaliq, sabirliliq, den -sawliq sorayiq. Patsha Sulaymannin’ hikmetlerinde bilay jazilg’an: “Patshanin’ ju’regi Qudaydin’ qolinda. Sonin’ ushin qa’dirli doslar, barqulla basqalar ushin duwa etiwden sharshaman’lar – dep sizler menen keyingi esittiriwimizde ushrasqansha xoshlasamiz. Xosh saw aman bolin’.