“Jaqsi hayaldi kim taba alar? Ol qimbatbaha taslardan da qimbat. Ku’yewi og’an shin ju’rekten isener, hesh na’rseden mu’ta’jlik ko’rmes. Ol ku’yewine jamanliq emes, bir o’mir jaqsiliq qilar”. Hikmetler 31:10-12

Ibadat etiwdin’ ku’shi, o’z ku’shin’izge bolg’an ha’r qanday qarsiliqti ha’m imkaniyatlardi inkar etip, Qudaydin’ ku’shine toliq iseniwden ibarat. Sebebi Quday o’mirimizdi, o’zimizdi, ku’yewimizdi ha’m a’lbette nekemizdi jaqsi ta’repke o’zgertiwge qa’dir.

Bul ku’sh tiklew ushin jumsaq u’skene esaplanadi.

Ku’yewimiz ushin ibadat etiwden ko’re perzentlerimiz ushin ibadat etiw an’satraq. Sebebi olar tuwilg’aninan baslap, olardin’ o’mirinde barsiz. Biraq ku’yew menen qarim-qatnaslar, a’sirese, shan’araqtag’i qiyinshiliqlardi baslarinan o’tirgen erli-zayip ushin an’sat emes. Ku’yewdin’ biyparwalig’i, tu’sinbewshiligi menen, sizdi kemsitiwi, qoppalig’i sizdi g’a’zeplentiriwi mu’mkin. Ol ha’tteki iyne siyaqli ju’rekke shanshiytug’in so’zlerdi de aytiwi mu’mkin. Ha’r sapari ol ushin ibadat etkenin’izde, irin’lesken bul jaranin’ awiriwin sezesiz. Biraq ju’regin’izdegi bul jaradan qutilmag’anin’izsha, Qudayg’a maqul bolatug’in da’rejede ju’regin’izdi Og’an asha almaysiz.

Ku’yew ushin etiletug’in ibadat, perzentler ushin etiletug’in ibadatqa uliwma uqsamaydi. Balalarin’iz ushin ga’mxorliq etiwge haqqin’iz bar, biraq ku’yewimiz ushin g’amxorliq etiw huquqi berilmegen. Biraq bizlerge “dushpannin’ pu’tkil ku’sh-qu’diretin ayaq asti qiliwg’a hu’kimshilik” berilgen. Ibadatimiz arqali dushpannin’ rejelerine qatti hu’jim etiw huquqina iyemiz. Ibadat arqali shan’arag’imizg’a qarsi bolatug’in ha’r qanday jaman ta’sirge, hu’jimge qarsi tura alamiz. Iysa bizlerge tag’i bilay degen: “… jer betinde neni baylasan’iz, sol aspanda da baylanadi, ja’ne de, sizler jer betinde neni sheshsen’iz, sol aspanda da sheshiledi” (Matta 18:18).

Sizde jawizliqti toqtatiw ha’m jaqsiliqqa jol ashiw ushin Iysa ati menen hu’kimshilik berilgen. Siz Qudayg’a ibadat arqali ha’mme na’rseni, ku’yewin’izdin’ minsiz o’mir jasawina kesent berip atirg’an ishiwshilik, erinsheklik, ruwxi tu’sken, xarakteri to’men, adamlar menen mu’na’sa’bet qila almaslig’i, ha’m a’wmetsizligi haqqinda aytiwin’iz mu’mkin. Hayallar, Qudayg’a ku’yewin’iz bulardin’ ha’mmesinen azat boliwi ushin ibadat etin’. Doslar, bu’gingi sa’wbetimiz sizlerge maqul keldi dep u’mit etemiz.