Assalawma a’leykum qa’dirli tin’lawshilar. Sizler menen radio efir arqali ja’ne ushrasip turg’animizdan quwanishliman. Bu’gin sizler menen g’a’zepti jen’iw haqqinda so’ylespekshimen. A’dette, insang’a bir na’rse unamasa, isi ju’rispese, yamasa ma’qsetine jete almasa onda ashiwlanadi.

Gey bir adamlar ashiwin sirtqa shig’ariwg’a ha’reket etedi, geybir adamlar bolsa ishine ju’tadi. Psixologlardin’ aytiwinsha ashiwdi sirtqa shig’arg’an jaqsiraq eken. Sebebi emotsiyalardi sirtqa shig’arg’anda olardan azat boladi eken. Geybir masiyxiyler ashiwlang’anda na’rselerdi sindirip, diywaldi yamasa boks qaltasin urip jen’il tartadi.

Qasimista diywal yamasa boks qaltasi bolmay qalsa ne qilamiz? Ashiwin aldinda turg’an adamg’a shashiw kerek pe? Bir tanis tuwisqanimiz ashiwi kelgen waqtinda “Tirge barip miltiq atip kelemen” degen edi. Biraq ko’rip shig’ilg’an ta’jiriybeler, ashiwdin’ sirtqa shig’ariliwi adamdi ja’ne de ashiwshaq boliwina alip keledi eken. Demek, ashiwdin’ sirtqa shig’ariliwi ma’seleni hal qilmaydi eken. Kerisinshe ha’reketlerimiz bekkemlesip bir bo’lim bolip jiynaladi eken.

Duris, bizler o’z ku’shimiz benen ashiwdan quta alalmaspiz, biraq Iysanin’ ja’rdemi menen ha’mme na’rseni qila alamiz. Elshi Pavel Galatiyalilarg’a jazilg’an xatinda o’zinin’ ashiwin basqariwdi Muxaddes Ruwxtin’ jemisi dep aytadi. Ashiw kelgen waqitta o’zimisti basqariw an’sat emes, biraq sabirli boliwg’a shinig’iw arqali basqariwg’a erise alamiz. Qilg’an shinig’iwlarimiz a’detke aylanip, a’det bolsa xarakterimizdin’ bir bo’limine aylanadi.

Efesliklerge jazilg’an xattin’ to’rtinshi babinda Elshi Pavel bilay degen edi: “G’a’zeplensen’iz de, gu’na islemen’ler. Quyash batqansha, g’a’zepten qaytin’lar. Shaytang’a jol bermen’ler.” Tiri ekenbiz a’lbette ashiwlanamiz, sebebi bizler a’piwayi adamlarmiz, biraq doslar kelin’ ashiwlanip gu’nag’a jol bermeyik. G’a’zebin’iz kelgen de tinishlaniwg’a ha’reket etip, sol ma’sele haqqinda tinish jerde hal etip og’an qarar shig’ariwdi u’yreneyik. Sebebi emotsyag’a berilip kerek emes so’zlerdi aytip, naduris ha’reketlerdi qilip qoyiwimiz mu’mkin. Keyin sol ga’plerden ha’m islerimizden pushaymanlanip, uyalip qaliwimiz mu’mkin. Sonin’ ushin qa’dirli doslar o’zlerimizdi basqariwdi u’yreneyik. Xosh saw- salamat bolin’ dep sizler menen xoshlasamiz.