“Jen’ip shiqqan Qudayimnin’ Ibadatxanasinin’ su’tini qilaman, Sol adam ol jerden hesh qashan shiqpaydi” (Ayan 3:12).

Assalawma a’leykum tuwisqanlar. Bizler ha’mmemiz keyini jawizliq u’stinen jen’ip shig’atug’in – jaqsiliq penen tawsilatug’in waqiyalardi, erteklerdi, kitaplardi ha’m filimlerdi unatamiz. Bizler bunday waqiyali kitaplardi jaqsi ko’rip oqiymiz, filimlerdi ha’zetip ko’remiz. Biraq bular bizlerdi Qudayg’a maqul insan boliwimizg’a jeterli emes. Bunin’ ushin ishimizden, a’tira’pimizdan bizlerge hu’jim etetug’in shaytannin’ azg’iriliwlarina qarsi tura aliwimiz kerek. Shaytan ol ju’da hiyleker. Ol bizlerdin’ qizig’iwshilig’imizg’a, o’tmishimizge, du’nya qarasimizg’a qarap o’z hiyleker rejelerin du’zedi. Usinin’ menen bizlerdi Qudaydan uzaqlastiriwg’a ha’reket etedi. Geyde onin’ hiylelerinin’ aldinda ha’lsirep qalamiz. Og’an qarsi turiwg’a ku’shimiz jetpey qaliwi mu’mkin. Biraq bizlerdin’ ta’repimizde Quday barlig’in umitpayiq.

Quday bizlerdin’ jag’dayimizdi basinan o’tirgen Filadelfiya qalasindag’i ja’ma’a’tke bilay degen edi: “…Senin’ islerin’di bilemen. Mine, senin’ aldin’a hesh kim jaba almaytug’in ashiq bir qapi qoydim. Ku’shin’ az bolsa da so’zimdi orinlap, atimnan waz keshpedin’. Qara, shaytannin’ jiyininan bolg’anlardi, o’zlerin yahudiymiz dep atap, biraq yahudiy bolmag’an o’tirikshilerdi sag’an tapsiraman. Olardi sag’an keliwge ha’m senin’ ayag’in’a bas uriwg’a ma’jbu’r etip, olarg’a Menin’ seni su’yetug’inimdi ko’rsetemen. Sabirliliq penen shida degen buyrig’imdi orinlag’anin’ ushin, jer ju’zinde jasaytug’inlardi sinaw ma’qseti menen pu’tkil du’nya ju’zine keletug’in sinaq waqtinan Men de seni saqlayman. Men jildam Kelemen. Tajin’di hesh kim alip qoymawi ushin, o’zin’de bar na’rsege bekkem bol” (Ayan 3:8-11).

Doslar, o’mirimizde ruwxiy ha’m material qiyinshiliqlar ha’mmesi o’tkinshi na’rseler. Bul qiyinshiliqlardin’ o’mirimizde bar ekenligi emes, al olarg’a qanday mu’na’ba’bette boliwimiz a’hmiyetlirek eken. Bizlerdin’ ku’shimiz ko’p emesligin Quday biledi. Bizlerdin’ islerimizdi, Qudayg’a bolg’an sadiqlig’imiz ha’m isenimimizdi, Onin’ Atin qabil etkenimizdi, bizlerdi joldan burajaq bolg’an pikirlege qarsi turiwg’a ha’reket etip atirg’animizdi biledi. Bizlerdin’ sonsha qiyinshiliqlarg’a sabirliliq etkenimizdi biledi. Ol bizlerdi etken islerimizge qarap siylaydi. Ha’zir qiyinshiliqlarg’a sabirliliq etip atirg’an bolsaq, keleshekte usi sabirimizdin’ miywesin ko’remiz.

Quday ha’r sapari tu’rli ja’ma’a’tlerge so’ylep, aqirinda, “Qolin’da ne na’rsen’ bar bolsa, bekkem tut. Aqirina shekem shida. Hesh kim tajin’di alip qoyiwina jol qoyma”, degen. Hu’rmetli doslar, bul ga’pler bizlerge de tiyisli. Bizlerde o’zi ne bar, degen soraw tuwiladi. Bizlerde Iysa Masiyxtan alg’an tajimiz bar, ma’n’gilik o’mirimiz bar, Qudaydin’ Patshalig’i bar. Ishimizde Qudaydin’ Ruwxi bar. An’imizda Qudaydin’ pikirleri bar. Ol haqqindag’i bilim, Og’an bolg’an su’yispenshiligimiz, isenimimiz ha’m u’mitimiz bar. Doslar, qaran’, bizlerde qansha na’rseler bar eken. Quday usi na’rselerdi aqirina shekem o’zimizde bekkem tutiwimizdi, olardi joytip qoymawimizdi qa’leydi. Sonda jen’ip shig’amiz.