Bug’in de o’tken sapardag’i sa’wbetimizdi dawam etemiz. Shan’araqta mu’na’sa’betlerdin’ bekkemligi er adamnin’ basshilig’ina baylanisli. Shan’araq ushin toliq juwapker bolg’an er adam, hayali ha’m perzentlerine miyir-muhabbat ko’rsetiwde olardan aldinda ju’rse, budan o’zide u’lken abiroy tabadi. Miyirli, oni toliq tu’sinetug’in ha’m ha’mme waqit ja’rdemge tayar turatug’in hayali, ata-anasinin’ bawirinda jaynap-jasnap o’sip atirg’an, tek g’ana jaqsi ta’repke ta’rbiya alip kelyatirg’an perzentler, ata-ana ushin a’jayip sawg’a esaplanadi.

Shan’araqtag’i baylanislardin’ ju’da a’hmiyetli ekenligi ha’mmemizge belgili. Buni duris tu’sinbegen hayal ha’m erkekler u’lken tu’sinbewshiliklerde adasip qaladi. Tek g’ana aqil, oyi yamasa an’ina baylanip qalg’an erkek adam, sezimlerge bay hayalin tu’siniwdi qa’lemeydi. Son’ hayali ku’yewinin’ bunday suwiq mu’na’sa’betin tu’sinbey, qapashilig’i jiynalip, keshirmey baslaydi.

Bul jerde negizi ma’selenin’ tamiri qay jerde? Hayallar miyir-muhabbat, ku’yewi ha’m perzentlerine g’amxorliq ko’rsetiwde ha’mme waqit aldinda ju’redi. Erkekler ko’binese ken’eslerge, ma’sla’ha’tlerge su’yenip is tutadi. Olar ha’mme waqit aqilli ha’m danali hayalinin’ ja’rdemine mu’ta’j boladi.

Hayallar ku’yewlerinin’ sezimlerdin’ natanis ma’mleketine alip kiriwde jol baslawshilar bolip tabiladi. Ku’yewler tek g’ana hayallarin hu’rmet etiwi, ishki sezim ta’repinen olarg’a erip bariwi, ba’lkim shan’araqta saw-salamat atmosferani jaratiwda qiyin waziypani orinlawda, hayallarina turaqli, o’z waqitinda ja’rdem beriwi, olardi qollap-quwatlawi sha’rt. Eger erkek adam hayalinin’ ha’reketlerine tosqinliq etip, kesent etse, aqiri hayaldin’ ruwxi sinip qaliwi mu’mkin.

Eger hayallardin’ miyir-muhabbati qayta-qayta basilip taslana berse, kewilleri ezilip, tu’skinlikke tu’sip qaladi. Biraq eger ku’yewler hayalinin’ sezimlerin qa’dirlep, barqulla onin’ pikirlerin tin’lasa, bunday shan’araqta erli-zayip ortasindag’i mu’na’sa’betler qimbatbahali, ku’shli ha’m ju’da qa’dirli boladi. O’z-ara jilli mu’na’sa’betler ishinde erli-zayip ja’nede jaqinlasip, bir-birine su’yenip jasaydi. Bunday shan’araqlar Jaratqannin’ ulli siyi esaplanadi.