Assalawma a’leykum Danaliq radiosi iqlasbentleri. Bu’gingi esittiriwimiz tek g’ana erkek adamlarg’a bag’ishlanadi. Erkeklerimiz ushin bul esittiriwimiz unaydi degen u’mittemiz. Kelin’, qa’dirli shan’araq basshilari bu’gin sizler menen bir temani ko’rip shig’amiz.

Yag’niy qalay ko’birek waqitimizdi shan’arag’imiz benen paydali o’tiriwimiz mu’mkin. Usi ma’seleni ko’rip shig’amiz. Ha’r qanday erkek adam boydaqliq waqitinda malum da’rejedegi qizlardi unatadi. Buni jasiriwdin’ keregi joq. Son’ ishinen en’ jag’atug’inin tan’lap og’an u’yleniwge qarar etedi.

U’yleniwden aldin a’lbette ol qiz benen tanisip, so’ylesip ko’redi ha’m ol haqqinda sorastiradi, mag’liwmatlar jiynawg’a ha’reket etedi. Eger ha’mmesi jaqsi bolsa son’ toydi baslap jiberedi. Eger u’ylenip atirg’an qizin haqiyqattanda su’yse, onda toydan keyin de og’an ko’birek itibar beredi.

Ha’mme waqit og’an unaytug’in islerdi qiliwg’a ha’reket etedi. Bazi waqitlari ko’pshiligimiz qilatug’in qa’telerimizdin’ biri insannin’ ishki du’nyasina emes, al sirtqi ko’rinisine ko’birek itibarimizdi qaratamiz. Duris adamnin’ sirtqi ko’rinisi de jag’imli boliwi kerek. Bunin’ ushin ha’r bir insan o’zinin’ sirtqi ko’rinisine de itibar beriwi kerek dep oylayman.

Du’nyada jag’imsiz adam bolmaydi. Sebebi Quday ha’r bir adamdi O’zinin’ su’wreti boyinsha jaratqan. Bizler ko’birek waqitimizdi shan’arag’imiz benen o’tiriwge ha’reket etiwimiz kerek. Eger esin’izde bolsa. Toyin’izdan aldin u’ylenejaq bolg’an hayalin’izg’a qanday wa’delerdi bergensiz? Endi usi wa’delerdi orinlaytug’in waqit keldi. Bolmasa hayalin’iz sizge bolg’an isenimin jog’alta baslaydi.

Negedur erkekler ko’birek waqitin jumisqa yamasa doslari menen birge o’tiriw ushin bag’ishlaydi. Ba’lkim bunin’ tiykarg’i sebeplerinin’ biri shan’arag’in’izda bir na’rselerden kewlin’iz tolmay atirg’an shig’ar. Biraq ne bolg’an jag’dayda da o’z hayalin’izdi su’yip, og’an ha’m balalarin’izg’a ko’birek waqit ajiratin’. Hesh qashan hayalin’izdi basqa hayallar benen salistirman’.

Bul hayalin’izg’a qanday ta’sir o’tiriwin bir oylap ko’rin’. Hayaldin’ kewli gu’ldey na’zik dep aytadi. Gu’lge itibar berilmese, waqit o’tiwi menen solip, quwrap qaliwi mu’mkin. Erkek adam birinshi orinda shan’araqta o’z ornin biliwi lazim. Ol o’zinin’ shan’arag’inin’ qorg’awshisi esaplanadi. A’sirese hayalin’izdi ha’mme waqit ha’r qanday jerde qorg’ay biliwin’iz kerek. Hesh qashan basqa adamlardin’ aldinda hayalin’izdin’ u’stinen ku’lmen’. Ha’r qanday jag’dayda shan’arag’in’izdi birinshi oring’a qoyiwdi u’yrenin’. Ha’mme waqit shan’araq ag’zalarin’izg’a a’sirese hayalan’izg’a jaqsi ko’rip, oni su’yetug’inin’izdi aytiwg’a u’yalman’. Quday bul hayaldi su’yedi sonin’ ushin men de oni su’yemen dep ha’mme waqit o’z ju’regin’izge aytin’.

Bul sizdi ja’nede shan’arag’in’izg’a jaqinlastiradi. Doslar, shan’arag’in’izda barqulla tinishliq, tatiwliq bolsin. Hu’rmetli tin’lawshilar usinin’ menen bu’gingi erkeklerimiz ushin bag’ishlang’an esittiriwimiz o’z juwmag’ina jetti. Sizler menen ja’ne jan’a temalar arqali ushirasqansha saw-aman bolin’.