Assalawma a’leykum hu’rmetli doslar. Bu’gin sizler menen ha’mmemiz xosh ko’rmegen erinsheklik haqqinda pikirlesip, sizlerge odan qutiliwdin’ jollari haqqinda aytip o’temiz. Azanda u’yqidan tura almaw, bu’gingi isti ertenge qaldiriw, tayar jaqsi jumistan bos qaliw, paydali imkaniyatti qoldan jiberiw ha’m tag’i basqa jog’altiwlarg’a sebepshi bolg’an erinsheklik o’mirimizde tag’i basqa u’lken jog’altiwlarg’a baslaydi eken. Sonin’ ushin bizler sizlerge olardin’ aldin aliw yamasa qaytaldan baslaw ushin bir neshe jollarin aytip o’temiz. Birinshi erinsheklikten qutiliw ushin bizler analiz qiliwdan baslasaq boladi. Misali, qanday da bir isti baslamastan aldin nelerdi rejelestirgenimizdi aniqlap alip, o’z imkaniyatlarimizdi bahalap alamiz. Insan o’zinin’ bir iste jaqsi ha’m jaman ta’repleri haqqinda pikirler ju’rgizip, qilajaq bolg’an rejelerin analiz qilip shig’iwi da paydali boladi.

Ekinshi, aldimizg’a aniq ma’qset qoyayiq, misali alti ay ishinde gitara yamasa qa’legen bir shet tilin u’yrenemen, den sawliqqa paydali isler menen shug’illanaman dep qarar qilayiq. Ha’r kimnin’ o’z joli, arman ha’m tilekleri bar, biraq erinsheklik bul armanlarimizdan uzaqlastiradi. Ma’qsetimizge jetisiwdi uzaqqa sozip qoysaq, erinsheklik olarg’a jetisiwimizge uliwma jol qoymaydi. Buni esimizden shig’armayiq.

Ushinshi, o’zimizdi an’lap aliwimiz. Jaman a’detlerimizden bas tartiw, o’mirimizdi o’zgerttiriwge neler tosqinliq qilip atir, neler sebep bolip atir? Aldin’g’a bariwimizg’a neler kesent berip atir? Usinday sorawlarg’a juwaplar izlep ko’reyik. Basqasha qilip aytatug’in bolsaq, bu’gin qiliwimiz kerek bolg’an is ha’reketlerimiz nelerge baslap atirg’anin jaqsi tu’siniwimiz lazim. Bir a’piwayi misal, shet tilin u’yreniwimiz o’z ka’sipimizde en’ joqari qa’nige boliwimiz ushin kerek.

Shegiwdi taslaw, sportta jaqsi na’tiyjelerge erisiwge ja’rdem beredi ha’m den-sawlig’imizdi bekkemleydi. Aspazliq o’nerine iye boliw, jaqsi u’y bekesi, shan’araq azalarina ko’birek miyrim-sha’pa’a’t ha’m itibar ko’rsetiw ushin kerek. O’zlerimizdi usilarda an’lap jetkenimizde, erinsheklik bizlerge qa’nshellim kesent berip atirg’anin tu’sinemiz.

To’rtinshi, jaqsi ken’es beriwshilerdi izleyik. “Dostin’nin’ kim ekenin aytsan’, senin’ kim ekenligin’di aytaman”, degen ga’plerdi esitkenbiz. Dos ol ma’qset jolindag’i ja’rdemshi bolip tabiladi. A’tirapin’izda sizdi ha’m jumislarin’izdi qollap quwatlaytug’in adamlar bolsa, alding’a qa’dem taslaw an’satraq boladi.

Besinshi, qorqpan’. Qorqiw adamdi o’mirde joldan buradi. Ko’pshiligimiz o’zgeristen, o’mirdi jan’adan baslawdan shorshiymiz. Gey birewlerdin’ shegiwdi qoyiwg’a, avtomobil basqariwg’a ku’shi jetpeydi. Qorqinish armanlarimizdi joq qiliwina jol qoymayiq. Sebebi qorqinish jetisiliwlerimizge tosqinliq qilatug’in en’ u’lken dushpanimiz. Sonin’ ushin hesh ekilenbey, aldimizg’a qoyg’an ma’qsetimizge eriseyik. Ha’r ku’ni bizlerge jasaw ushin imkaniyat beriledi. Solay eken, barliq qorqinish, ba’nelerdi shetke su’rip o’zgeriwge sebep bolg’an qa’demlerdi tanlayiq. Bu’gingi ku’ni erinsheklikti bizler jen’emiz yamasa ol bizlerdi jen’edi.