Assalawma a’leykum qa’dirli tin’lawshilar. Sizler menen efir arqali ushrasip turg’animizdan quwanishlimiz. Bu’gin sizler menen duwa etiw haqqinda u’yrenemiz. Kelin’ diqqatimizdi Matta 6 bapqa qaratamiz. “Duwa etkenin’izde, adamlarg’a ko’rsetiw ushin ma’jilisxanalarda ha’m ko’shelerdin’ mu’yeshlerinde turip duwa etiwdi jaqsi ko’retug’in eki ju’zliler siyaqli bolman’lar. Sizlerge shinin aytip turman: olar a’lle qashan o’z siylarin alip boldi. Al sen duwa etkenin’de bo’lmen’e kirip, esigin’di japqanin’nan son’, ko’zge ko’rinbeytug’in A’ken’e duwa et! Sonda jasirinliqti ko’riwshi A’ken’ sag’an qaytaradi.

Duwa etkenin’izde, butqa tabiniwshilar siyaqli miljin’g’a berilmen’ler. Olar ko’p so’ylesek tin’lar dep oylaydi. Sizler olarg’a uqsaman’lar. Sebebi A’ken’iz nege mu’ta’j ekenligin’izdi Onnan soramasin’izdan aldin biledi. Sonliqtan sizler bilay dep duwa etin’ler: Aspandag’i A’kemiz! Senin’ atin’ muxaddes bola bersin. Senin’ Patshalig’in’ kelsin. Aspanda orinlang’ani siyaqli, Jerde de Senin’ erkin’ orinlansin. Bizlerge bu’gin de ku’ndelikli nanimizdi bere go’r. Bizlerge gu’na islegenlerdi keshirgenimizdey, Bizlerdin’ de gu’nalarimizdi keshire go’r. Bizlerdin’ azg’iriliwimizg’a jol qoymay, shaytannan qutqara go’r. Eger sizlerge gu’na islegenlerdi keshirsen’ler, aspandag’i A’ken’iz de sizlerdi keshiredi. Al eger sizlerge gu’na islegenlerdi keshirmesen’ler, A’ken’iz de gu’nalarin’izdi keshirmeydi.

Oraza tutiw tuwrali “Oraza tutqanin’izda, eki ju’zliler siyaqli mu’nayip ju’rmen’ler. Olar adamlarg’a oraza tutiwshi bolip ko’riniw ushin g’ana ajarin buzip ju’redi. Sizlerge shinin aytaman: olar a’lle qashan o’z siylarin alip boldi. Sen oraza tutqanin’da, betin’di juw, shashlarin’di tarap ju’r. Solay etip, oraza tutqanin’ adamlarg’a emes, al ko’zge ko’rinbeytug’in A’ken’e ko’rinsin. Jasirinliqti ko’riwshi A’ken’ sag’an qaytaradi.

Jog’almaytug’in bayliq haqqinda “O’zlerin’izge jer betinde bayliq jiynaman’lar. Bul jerde oni ku’ye de jeydi, tat ta basadi, urilar da buzip kirip urlaydi. Kerisinshe, o’zlerin’izge aspanda bayliq jiynan’lar. Onday bayliqti ku’ye de jemeydi, tat ta baspaydi, urilar da buzip kirip urlamaydi. O’ytkeni baylig’in’iz qay jerde bolsa, ju’regin’iz de sol jerde boladi. Ko’z – denenin’ shirag’i. Sonliqtan da, eger ko’zin’ saw bolsa, pu’tkil denen’ de jariq boladi. Eger ko’zin’ saw bolmasa, pu’tkil denen’ de qaran’g’i boladi. Eger ishin’degi jariq qaran’g’i bolsa, onda qaran’g’iliqtin’ o’zi qanshelli tas tu’nek boladi!

Hesh kim eki xojaying’a xizmet ete almaydi. Sebebi ol birewin jek ko’rip, ekinshisin jaqsi ko’redi yamasa birewine sadiq bolip, ekinshisine itibarsiz qaraydi. Sizler ha’m Qudayg’a, ha’m bayliqqa birdey xizmet ete almaysizlar.”

Tirishilik ta’shwishleri haqqinda “Sonliqtan sizlerge aytaman: “janin’iz ushin ne iship, ne jeymiz dep, denen’iz ushin ne kiyemiz dep ta’shwishlenben’ler. Jan awqattan, dene kiyimnen artiq emes pe? Aspandag’i quslarg’a qaran’lar! Olar ekpeydi de, ormaydi da, telekke jiynamaydi da, al aspandag’i A’ken’iz olardi asiraydi. Sizler olardan anag’urlim artiq emessizler me? Ta’shwishleniw sebepli, kim sizlerdin’ aran’izda o’z o’mirin bir saatqa bolsa da uzayta aladi? Kiyim tuwrali nege ta’shwishlenesizler? Lala gu’llerdin’ qalay o’sip turg’anina qaran’lar! Olar miynet te etpeydi, jip te iyirmeydi. Al sizlerge aytatug’inim: Sulayman da o’zinin’ sa’n-saltanatinda usilardin’ birewindey sa’nli kiyinbegen edi. Eger bu’gin dalada o’sip turg’ani menen, erten’ oshaqqa taslanatug’in sho’pti Quday usilay kiyindirse, sizlerdi olardan da artiq kiyintirmes pe edi, ha’y, isenimi azlar!