Doslar, kelin’, bug’in sizler menen dosliq haqqinda sa’wbetlesemiz. Sa’wbetimizdin’ basinda bir oylap ko’reyik. Bizlerdin’ qansha dostimiz bar? Bizler dos arttiriwg’a ha’reket etemiz be? Dos arttiriwimiz ushin neler qiliwimiz kerek? A’lbette, kimdedir bir yamasa eki haqiyqiy dosti boliwi mu’mkin. Al kimdedir odan da ko’birek. Biraq bizler olardin’ barlig’inda haqiyqiy dos dep ayta alamiz ba? Eger juwabimiz awa bolsa, onda ekinshi soraw payda boladi. Qashan ha’m qanday waqitlari olardin’ haqiyqiy dos ekenligin ko’rdik?

Usi bir neshe sorawlar arqali doslarimiz haqqinda biraz bolsada aniq bir na’rseler bilip aliwimiz mu’mkin. Ba’lkim birewlerde uliwma dosti joq shig’ar. Usinday adamlar bar bolsa, olarg’a da kishkene ma’sla’ha’timizdi berip o’tpekshimiz. Duris ha’zirgi ku’ni haqiyqiy, shin dos tabiw qiyin. Sog’an qaramastan barliq adamlarg’a isenimsizlik benen qaraw bizlerdin’ ta’repimizden biraz naduris boladi. Dos tabiwimiz ushin o’zlerimiz basqalarg’a shin dos bola aliwimiz kerek. Men bir adamdi bilgenime shama menen bes alti jil bolip qaldi. Men ol adam menen dos emespen. Tek g’ana tanispiz dep aytsam boladi. Irasin aytsam usi bes alti jil dawaminda bul adamnin’ birew menen dos bolg’anin ko’rmedim.

Geybir adamlardin’ aytiwinsha, bul tanisim hesh kim menen uzaq waqit dos bola almaydi eken. Sebebi xarakteri awir adam eken. Usi ga’plerden son’ men bul adam menen dos boliwg’a ha’reket etip ko’rdim. Irasi doslig’imiz basinda, ol adam haqqinda barliq ga’plerge isengim kelmedi. Biraq aradan onsha ko’p waqit o’tpey, ol adam haqqinda aytilg’an barliq ga’pler iras bolip shig’a basladi. Sonin’ ushinda joqarida aytip o’tken pikirimiz, birew menen doslasiwdan aldin, o’zlerimiz og’an dos boliwimiz lazim. Hu’rmetli doslar, dosliq ushin kerek bolg’an en’ a’hmiyetli sebeplerdin’ biri bul dostin’iz menen barqulla ashiq bolin’. Dostin’izdan kerek bolg’an na’rselerdi jasirman’. Shin dostin’iz benen ha’mme waqit sirlassan’iz boladi dep oylaymiz. A’lbette eger dostin’iz haqiyqiy dos bolsa ha’m og’an isensen’iz.

Tek g’ana dostin’iz benen emes, al ha’mme menen shin, haqiyqatti so’yleytug’in bolin’. Sebebi jalg’an tek g’ana adamlarg’a emes, al pu’tkil barliqti jaratqan Iyemizge de tuwri kelmeydi. Isenim bul dosliqti saqlap qalatug’in en’ a’hmiyetli sebeplerdin’ biri. Budan tisqari ha’mme waqit miymandos bolin’. Doslar, barqulla o’mirin’izde dos arttiriwg’a ha’reket etin’. Bar doslarimizdin’ qa’dirine jetip, olardi abaylawg’a ha’reket eteyik.