Assalawma a’leykum hu’rmetli doslar. Sizler menen efir arqali ushrasip turg’animizdan ju’da quwanishlimiz. Mikrofon aldinda sizler menen men Sarbinaz. Bu’gingi esittiriwimzdi men dosliqqa qaratpaqshiman. “Ju’z sommin’ bolg’ansha, ju’z dostin’ bolsin” degen xalqimiz arasinda maqal bar. Bul maqaldin’ ha’m teren’ ma’niske iye. Qa’dirli tin’lawshilar sizlerdin’ doslarin’iz barma?

Sizler olardi o’zlerin’izge dos dep bilesizbe? Dosliq adamlardin’ arasinda ha’r qiyli tu’rde baslaniwi mu’mkin eken. Birewler balalar bag’shasinda, birewler armiyada xizmet etkende, basqalar joqari oqiw orinlarinda oqig’an waqitlarinda dos arttiriwlari mu’mkin. Biraq bir gezleri usi dosliqti saqlap qalmaytug’inlar ha’m arasinda payda boladi eken. Xalqimizdin’ aytiwinsha, shin dostimiz basimizg’a awir ta’shwish tu’skende bilinedi dep.

Menin’ bir dostim bar. Ol mennen tek g’ana bir jasqa kishkene. Bizlerdin’ doslig’imiz ju’da a’jayip, ko’rgenler bizlerdi apa sin’il dep oylaydi. Ja’ne bir waqitlari birge jumis islep ju’rgen bir dostim ha’m bar edi. Ekewimiz ha’m shan’araqli bolg’animizdan keyin doslig’imiz suwiy basladi. Bug’an hesh qanday sebep joq edi. Keyinshelik oylap qarasaq shan’araq ta’shwishleri bizlerdi bir-birimizden a’dewir uzaqlastiripti.

Joqarida aytip o’tken dostim ha’m bala shag’ali, biraq sonday bolsada bizler ha’ptede bir, eki ma’rte ushrasip birge awqatlanamiz, bir birimizge qanday ja’rdem kerek ekenligi haqqinda so’ylesemiz. Esimde, basima awir ta’shwish tu’skende usi dostim birinshi bolip ja’rdem qolin sozg’an edi. Onin’ o’mirinde ha’m sonday ta’shwishler tu’skende men ha’m qarap turmadim. Usi menen doslig’imiz ja’nede bekkemlesti.

Qa’dirli tuwisqanlar, ha’r bir adamnin’ o’mirinde dos attiriwi ju’da a’hmiyetli eken. Aldin’izda dos retinde bolip, keyin arqan’izdan basqasha so’yleytug’inlar haqiyqiy dos bola almaydi eken. Biraq sizler benen bizler Masiyxtin’ sha’kirtleri bolg’animiz ushin ha’mmeni ten’dey su’yiwimiz kerek. Iyemiz Iysa da Yaxudanin’ kim ekenin bile turip oni jaqsi ko’rdi. Og’an ja’rdem qolin sozdi, biraq Yaxuda Iyemiz benen dos boliwdi qa’lemedi.

Hu’rmetli doslar, doslig’imizg’a shaytan ala-awizliq tuwdiriwg’a ha’reket etse de, bir birimizdi jamanlamay, bir birimizge keshirimli doslar bolayiq. Qa’dirli tin’lawshilar, shan’arag’imizda perzentlerimiz ha’m o’zlerine jaqsi sadiq dos tabiwlarina ja’rdem bereyik. Sebebi jalg’izliq ha’r qanday adamdi kemirip taslawi mu’mkin eken. Eger dostin’iz haqiyqatti aytip, sizdi jaman yamasa qa’wipli joldan qaytarajaq bolsa odan qapa bolman’. Hu’rmetli tin’lawshilar, doslig’imiz ma’n’gilikke bolsin. Hesh kim doslig’imizg’a jaraqat salmasin dep bu’gingi esittiriwimizdi juwmaqlaymiz qa’dirli doslar. Keyingi esittiriwimizde ushrasqansha saw-salamat bolin’.