Assalawma a’leykum doslar. Tin’law menen orinlaw arasinda danaliq jatatug’inin bilesiz be? Bu’gingi esittiriwmizde bo’lisejaq bolg’an Muxaddes Jaziwlar o’mirin’izde o’zgertiwin’iz kerek bolg’an na’rselerdi aship beredi. Matta 7 bap bilay deydi: “Solay etip, jalg’an payg’ambarlardi miywelerinen bilip alasizlar. Meni “Iye! Iye! Degennin’ ha’r biri emes, tek aspandag’i A’kemnin’ erkin orinlawshi Aspan Patshalig’ina kiredi. Zamannin’ aqirg’i ku’ninde ko’bisi Mag’an: “Iye! Iye! Bizler Senin’ atin’ menen payg’ambarshiliq etip, Senin’ atin’ menen jinlerdi quwip shig’armadiq pa? Senin’ atin’ menen ko’p ka’ramatlar islemedik pe?” deydi. Sonda Men olarg’a: “Men sizlerdi hesh qashan tanig’an emespen, Mennen awlaq ketin’ler, ha’y, nizamdi buziwshilar!” – dep ashiq aytaman.

Solay etip, Menin’ usi so’zlerimdi tin’lap, olardi orinlawshilardin’ ha’r biri o’z u’yin jartas u’stine salg’an aqilli adamg’a uqsaydi. Jawin jawip, da’ryalar tasip, samal esip, bul u’ydi soqqiladi, biraq ol jartas u’stine saling’anliqtan qulamadi. Al Menin’ usi so’zlerimdi tin’lap, olardi orinlamaytug’inlardin’ ha’r biri o’z u’yin shege qum u’stine salg’an aqilsiz adamg’a uqsaydi. Jawin jawip, da’ryalar tasip, samal esip, bul u’ydi suw basqanda, ol qulap, qatti qiyraldi”.

Iysa usi so’zlerdi aytip bolg’anda, xaliq Onin’ ta’limine tan’ qaldi. Sebebi Ol diniy mug’allimler siyaqli emes, al O’z biyligi menen adamlarg’a ta’lim berdi. Iysa teri keselligine shaling’an adamg’a shipa berdi. Iysa tawdan tu’skende, izine ko’p xaliq erdi. Sonda Onin’ qasina teri keselligine shaling’an bir adam kelip, ayag’ina jig’ildi da: “- Iyem, eger Sen qa’lesen’, meni kesellikten tazalay alasan’, – dedi. Iysa qolin sozip, og’an tiygizdi de: “ -Qa’leymen, tazalan! – dedi. Teri keselligine shaling’an adam sol waqitta-aq tazalanip shipa tapti. Iysa og’an: – Abayli bol buni hesh kimge aytpa! Biraq ruwxaniyge barip o’zin’di ko’rset te teri keselliginen tazalang’anin’di adamlarg’a da’lillew ushin, Muwsa buyirg’an qurbanliqti ber, – dedi.

Rimli ju’zbasinin’ isenimi. Iysa Kaparnahumg’a kirgen waqitta Onin’ qasina bir rimli ju’zbasi kelip: “- Iyem menin’ xizmetshim la’n’ bolip, qatti qiynalip u’yde jatir, – dep Onnan ja’rdem soradi. Iysa og’an: – Men barip, og’an shipa beremen, – dedi. Al ju’zbasi: – Iyem, Senin’ shan’arag’ima keliwin’e men ilayiqli emespen. Tek bir awiz so’z aytsan’, xizmetshim jazilip ketedi. O’ytkeni men de birewdin’ qol astindag’i adamman, o’zime bag’inishli a’skerlerim de bar. Olardin’ birewine “bar” desem, baradi, ekinshisine “kel” desem keledi, qulima “minani isle” desem, isleydi, – dep juwap qaytardi. Bulardi esitken Iysa tan’ qalip, izine erip kiyatirg’anlarg’a: – Sizlerge shinin aytip turman: Men bunday isenimdi Izrailda da ushiratpag’an edim. Sizlerge aytatug’inim: shig’istan ha’m batistan ko’p adamlar kelip, Ibrayim, Isaq ha’m Yaqip penen birge Aspan Patshalig’inda dasturxanlas boladi. Al Patshaliqtin’ miyrasxorlari sirtqa qaran’g’iliqqa shig’arip taslanadi. Sol jerde olar jilap, pushayman jeydi – dedi. Sonnan son’ Iysa ju’zbasig’a: – Bara ber, senin’ isenimin’e qaray bolsin! – dedi. Ju’zbasinin’ xizmetshisi sol waqitta-aq jazilip ketti.