Assalawma a’leykum hu’rmetli radio tin’lawshi doslar. Quday ta’repinen ha’r birewimizge qanday da tapsirmalar berilgen. Budan tisqari masixiy tuwisqanlarg’a da tapsirmalar berilgen. Bizlerdin’ tapsirmamiz eki artiqmashliqti o’z ishine aladi: bul Quday ushin islew ha’m Onin’ wa’kili yag’niy elshisi boliw.
Bizler Quday menen Onin’ Patshalig’in quriwda sherik bolamiz. Elshi Pavel bizlerdi “sherik” boliwg’a shaqiradi ha’m bilay deydi: “Quday menen birge miynet etip atirg’an bizler o’zlerin’iz qabil qilg’an Onin’ miyrimine itibarsizliq penen qaramawin’izdi sizlerden o’tinish etemiz”. Iyemiz Iysa Masiyx bizlerdin’ qutqariliwimizdi ta’minledi, bizlerdi O’zinin’ balalari etti, bizlerge O’zinin’ Ruwxin berdi ha’m bizlerdi du’nyada O’zinin’ wa’killeri etti.
Qanday artiqmashliq! Muxaddes Kitapta bilay jazilg’an: “Solay etip, bizler Masiyxtin’ elshilerimiz. Hu’rmetli tin’lawshilar, basqalarg’a, doslarimizg’a qanday ma’n’gilik o’mirge iye boliwin aytiwimiz olar ushin qila alatug’in en’ ulli islerimizdin’ biri boladi. Eger sizdin’ qon’sin’iz rak yamasa OITS penen awirip atirg’an bolsa ha’m siz onin’ shipa alatug’inin bilip turip oni aytpasan’iz, siz o’mirdi qutqariwshi xabardi saqlap turg’an bolasiz.
Budan da awiri keshirim, ma’qset, tinishliq ha’m ma’n’gilik o’mirge jetelewshi joldi jasirg’an bolamiz. Bizlerde du’nyadag’i en’ ulli xabar bar ha’m buni basqalar menen bo’lisiwimiz bul olarg’a basqalarg’a ko’rsetetug’in en’ ulli jaqsilig’imiz boladi. Masixiylerdegi bir qiyin ma’sele bul, olar Masiyxsiz o’mir qanday boliwin yadinan shig’arg’ani sanaladi. Basqalar qanday ma’rtebeli yamasa o’mirden razi ko’rinse de, Masiyxsiz olar u’mitsiz jog’alg’an ha’m Qudaydan ma’n’gi ayirilg’an esaplanadi.
Muxaddes Kitapta bilay jazilg’an: “Iysadan basqa hesh kim arqali qutqariliw joq. Qutqariliwimiz ushin aspan astinda adamlarg’a berilgen basqa hesh bir at joq”. Bul Elshiler kitabi 4 bap 12 ayat. Ha’r bir adam Iysa Masiyxtin’ qutqariwina mu’ta’j. Bul qutqariliw jolin izlep tabiwdi ko’pshilik adamlar bilmeydi. Sonin’ ushin bizler olardi adasqanlar dep ataymiz. Ha’r bir masixiy adamnin’ tiykarg’i ha’m uliwma waziypasi usi jerde isin baslawi kerek.
Ko’pshiliktin’ aytiwinsha: “Men basqalarg’a Masiyxtin’ ma’n’gilik o’miri haqqinda aytsam, olar meni esitiwdi qa’lemeydi”, – deydi. Doslar, siz benen menin’ waziypam olarg’a ma’n’gi o’mir bar ekenin ha’m ha’r bir gu’naka’r adam keshirimge mu’ta’jligin bildiriw bolip tabiladi, qalg’anin olardin’ o’zleri sheshedi. Tan’law ha’mme waqit adamnin’ o’zinde.
Usinin’ menen doslar, bu’gingi esittiriwimiz boyinsha sorawlarin’iz yamasa pikirlerin’iz bolsa bizlerdin’ danaliq.com ma’nzilimizge jollasan’iz boladi.
