Assalawma a’leykum esittiriwimizdin’ qa’dirli iqlasbentleri. Sizler menen ja’ne diydar ushirasip turg’animizdan ju’da quwanishlimiz. Bu’gingi sa’wbetimizdi bir waqiya menen baslamaqshimiz. Bir qiz awir kesel bolip, to’sekke baylanip, jasawg’a u’miti qalmaydi. Og’an shipakerler de ja’rdem bere almaytug’inin esitkeninen son’ bar u’miti de jog’aladi. Ol jatirg’an u’yinin’ aynasinan ko’rinip turg’an a’jayip, suliw ta’biyatta quwanip oynag’isi keledi. Aynasinan ko’rinip turg’an terektin’ japiraqlari sarg’ayip jerge to’gilip baslaydi. Bul kesh gu’zdin’ bolg’anin bildiredi. Bir ku’ni keshki waqit u’yqilawg’a jatpastan aldin terekke qarasa terektin’ ha’mme japiraqlari tu’sip bolg’an, tek g’ana ushinda bir japiraq qalg’an eken.

Sonda ol qiz, eger usi japiraq tan’g’a shekem jerge tu’sse demek men de o’lemen, eger tu’spese men de tiri qalaman, dep oylaydi. Buni esitken ata-anasi ne qilarin bilmey, qon’silarina aytadi. Olardin’ bir qon’sisi su’wret saliwshi boladi. Bul adam tap sol japiraqqa uqsatip qag’azg’a sog’ip, tu’nde jerge u’zilip tu’sken japiraqtin’ ornina qistirip qoyadi. Biyshara qiz azanda terekke qarawg’a qorqip turadi. Qanday da bir ku’sh tabip terekke qarasa, sol japiraq ele asilip turg’an eken. Jasaw ushin ja’ne u’mit payda bolip, waqit o’tiwi menen ta’wir bolipti. Aradan bir qansha waqit o’tip qiz ha’mme na’rseden xabar tabip o’zinin’ su’wret saliwshi qon’sisina barip minnetdarshiliq bildiripti.

Sebebi sol qon’sisi o’zinin’ etken isi arqali sol qizg’a o’merge qarata u’mit bere alg’an edi. Bul waqiyanin’ qan’shellim haqiyqat yamasa jalg’an ekenligi bizler ushin qaran’g’i. Biraq ne bolsada bizler masiyxiyler Qudayg’a da usinday u’mit penen qarawimiz ushin jaqsi misal bola aladi. Ha’zirgi ku’ni keselliklerdin’ tu’rleri ko’beyip ketti. Adamlardin’ u’mitleri sonshellim to’menlep ketkeninen, olardin’, qansha o’mirim qalg’an bolsa sonsha jasarman degen ga’pler menen o’zlerin awitip atirg’anlarin ko’remiz. Doslar, ne bolg’an jag’dayda da Iysa bizlerdin’ birinshi shipakerimiz ekenin umitpayiq.

Sebebi Ol o’lilerdi de tirilttirdi, ko’zi ko’rmeytug’inlardin’ da ko’zlerin ashti. Ol bizlerdin’ tek g’ana gu’nalarimiz ushin emes, al barliq keselliklerimiz ushin da atanaq ag’ashta azap shekti. Qa’dirli doslar, eger Yaqip kitabin oqip ko’rsek, ol jerde eger bizler kesel bolip qalsaq, qanday jol tutiwimiz kerek ekenligi haqqinda aniq ko’rsetilgen. Yaqip kitabinin’ 5 babi 14 ten 16 ayatqa shekem oqip ko’rin’, ba’lkim sizlerge Quday shipa beriwdi qa’lep atirg’an shig’ar. Hu’rmetli tin’lawshilar, o’z den sawlig’in’iz, balalarin’izdin’ den sawlig’i ha’m shan’araq ag’zalarin’izdin’ ha’m de barliq adamlardin’ den sawliqlari ushin ha’r ku’ni duwa etin’ deymiz. Balalarin’izdi mektepke, bag’shag’a jiberip atirg’anin’izda Quday ha’r tu’rli keselliklerden olarg’i qorg’awi ushin duwa etin’. Quday O’z perzentlerinin’ ha’r birewinin’ saw-salamat boliwin qa’leydi.

Eger qanday da bir awir keselin’iz bar ekenin bilsen’iz Qudaydan naliman’. Kerisinshe, ha’mme na’rse ushin minnetdarshiliq bildiriwge a’detlenin’. Doslar, Qudaydin’ O’zi ha’r birewimizdi qorg’asin. Barqulla saw-salamat bolin’.