Assalawma a’leykum doslar. Ayipdar adam “Keshir” dep aytiwdi qa’lemese ne boladi? Keshirim beriw bir ta’repleme boliwi mu’mkin be? Ayibin ta’n almaytug’in adamdi keshiriw mu’min be? Keshirim beriw eki ta’repleme bolmaydi eken, muna’sa’betlerdin’ aldin’g’iday boliwinin’ ilaj’i joq eken. Jarasiwdin’ ila’ji joq ekenine ko’zimiz jetsede, ol adamg’a ashiwimiz basilmasa da, jaqsi ko’riwde dawam etemiz.

Sebebi Quday A’kemiz usinday jol tutadi. “Dushpanlarin’izdi su’yin’ler, sizlerdi quwdalaytug’inlar ushin duwa etin’ler. Sizlerdi jek ko’rgenlerge jaqsiliq qilin’lar. Jamanliq qilg’anlar ushin duwa etin’ler. Sonda siz aspandag’i A’ken’izdin’ balalari bolasizlar. Sebebi Ol jamanlardin’ u’stine de, jaqsilardin’ u’stine de, O’z quyashinin’ nurin to’gedi ha’m haq adamlardin’ u’stine de, nahaqlardin’ u’stine de, jawinin jawdiradi”.

Bizlerdi qapa qilg’an adamdi keshiriwge qarar etip birinshi qa’demdi taslasaq, Quday bizlerge ja’rdem beredi ha’m bizler keshire alamiz. Son’ bizler bul adamdi jaqsi ko’riwge o’zimizde ku’sh tabamiz. Bul bolsa g’azep ha’m o’sh aliw tileginen pu’tkilley bas tartiwdi bildiredi.Eger ash bolip ju’rgen dushpanimizdi ko’rip qalsaq, oni toydirayiq. Jaradar adamdi ko’rip qalsaq, jaralarin baylap, ja’rdem bereyik. Biraq bizlerge jamanliq etejaq bolg’an adamdi ko’rip qalsaq, oni tinishliq penen toqtatiwg’a ha’reket eteyik. Su’yispenshilik na’zik ha’m miyrimli boliwi mu’mkin, biraq sonin’ menen birge, ol orinli tu’rde jerkenishke toli boliwi da mu’mkin eken. Iyemiz Iysa su’yispenshiliktin’ bul eki ta’repin bizlerge ju’da jaqsi ko’rsetip bergen. Ol ja’miyet qapa qilg’an adamlar menen ha’mme jerkenetug’in a’wmetsizler menen jaqsi qarim-qatnasta bolg’an. Iyemiz Iysa hesh na’rse haqqinda oylamay xaliqti awir saliqlarg’a ko’mip taslag’an menmen ha’meldarlarg’a qarata O’zinin’ g’azebin ashiq ko’rsetti. Kimdidir qutqariwg’a qaratilg’an g’azep, jaqsi ma’qsetler jolinda xizmet etiwi mu’mkin.

Ishimizdegi g’azep sebepli bizler atirapimizdag’ilarg’a to’men na’zerde qaray baslag’an bolsaq, demek, g’azep qa’wipli ko’rinis alg’an boladi. Eger g’azebimiz bolip atirg’an waqiyani jaqsi ta’repke o’zgerte alalmasa, doslar, odan qutiliwimiz kerek eken.

Kishekene bir misal: ajirasiw waqitinda keshirim beriw. Ku’yewi yamasa hayali taslap ketilgen adamg’a sezimlerin ha’m o’zligin aniqlastirip aliw ushin biraz waqit kerek boladi. Bunday isi ushin ku’yewine yamasa hayalina qarata bolg’an ishindegi ottay janip atirg’an g’azebi o’shiwi kerek. Bolmasa bolip o’tken waqiyalarg’a duris mu’na’sa’bette bola almay, tu’skinlikke tu’sip qaliwi mu’mkin. Erli zayiptin’ ajirasiwinan en’ ko’p ziyan ko’retug’in – bul perzentler. Olar taslap ketken a’kesi yamasa apasi menen buring’iday tatiw jasawdi ha’m olardi aldin’g’iday jaqsi ko’riwin qa’leydi. Ajirasiwdin’ o’zi awir. Biraq onin’ du’zetip bolmaytug’in a’qibetleri odan da awirraq.