Qa’dirli tuwisqanlar bu’gin basqalarg’a bolg’an qarim-qatnasimizda tiykarg’i rol oynaytug’in tema yag’niy basqalardi su’yiw temasi haqqinda sa’wbetlespekshimiz. Su’yispenshilik ha’m muxabbat so’zlerin ha’mme o’zgeshe tu’sinedi ha’m qabil etedi. Ha’r kim o’zinin’ du’nya qarasinan kelip shig’ip bul so’zlerge aniqliq beredi.

Biraq bul so’zler bizler oylag’animizday a’piwayi ha’m du’nyawiy so’zler emes. Ha’r birewimiz a’welem bar su’yispenshilik so’zinin’ ma’nisin jaqsi an’lap tu’siniwimiz ha’m sog’an jarasa is tutiwimiz kerek. Bul so’zdin’ jasirin ma’nisi ju’da a’jayip bolip, onda ju’da qu’diretli is ha’reket jatadi. Yag’niy, bul so’zdin’ ma’nisinde Iyemiz Qudaydin’ ko’rinisin tabiwimiz mu’mkin. Sebebi Ol su’yiwshi Quday.

Iyemiz Iysa Masiyx ta bizlerge tuwisqanlarimizdi su’yiwdi buyurg’an. Kelin’ bul haqqinda Yuxanna kitabinin’ 14:34 ayatinda Iyemiz Iysa aytqan so’zlerin oqip ko’remiz: “Sizlerge jan’a buyriq berip atirman: bir-birin’izdi su’yin’ler. Eger aran’izda su’yispenshilik bolsa, sizler Menin’ sha’kirtlerim ekenligin’izdi ha’mme usidan bilip aladi”. Bul Iyemizdin’ bizlerge bergen buyrig’i. Qudaydin’ perzenti bolg’an ha’r bir adam bug’an boysiniwi lazim. Usi so’zlerden keyin Iyemiz Iysa ja’ne: “Eger Meni su’ysen’izler, buyriqlarima a’mel qilin’lar”, dep atqan.

Haqiyqattan ha’m eger bizler Oni su’ysek Onin’ buyriqlarina a’mel qilamiz. Onin’ buyriqlarina sha’rt bolg’ani ushin emes, al shin ju’rekten boysinayiq. Eger bizler tuwisqanlar, ha’mmemiz o’z-ara Qudaydin’ su’yispenshiliginde birlessek, xizmetlerimiz ja’ne de jetilisedi. Bizlerdin’ mu’na’sebetimiz bolsa ha’mmeni hayran qaldiriwi shubxasiz. Iyemiz bul buyriqti sol waqitta sha’kirtlerine ha’m sol menen birge bizlerge de aytip ketken.

Su’yispenshilik so’zi Muxaddes Kitapta en’ ko’p qollanilg’an so’zlerdin’ biri. 1 Yuxanna 4:10-12 ayatlarda elshi Yuxan bizlerge bilay degen edi: “bizler Qudaydi emes, al Quday bizlerdi su’yip , O’z Ulin bizlerdin’ gu’nalarimizdin’ keshiriliwi ushin qurbanliq qilip jiberdi, mine, usi – su’yispenshilik ”!

Hesh kim hesh qashan Qudaydi ko’rgen emes. Eger bir-birimizdi su’ysek, Quday bizlerdin’ ishimizde boladi ha’m Onin’ su’yispenshiligi bizlerde jasaydi.