Assalawma a’leykum hu’rmetli doslar. Sizler menen ja’ne radio arqali ushrasip turg’animizdan ju’da’ quwanishlimiz. Qa’dirli tin’lawshilar bizler ha’r birimiz, bir birimizge su’yispenshilikten basqa qarizimiz joq. Sebebi bir birimizdi su’yiw bul en’ ulli sezim bolip esaplanadi. Su’yispenshilik ha’m ha’r qiyli adamlarg’a qarata boladi. Yamasa qanday da bir zatqa qarata boliwi mu’mkin. Qutqariwshimiz Iysa Masiyx, Muxaddes Kitapta su’yispenshilik haqqinda ko’p aytip o’tken.

Misali: Onin’ aytiwinsha, su’yispenshilik bul en’ ulli sezim. Kelin’ bu’gingi esittiriwimizdi su’yispenshilik ha’m bir birimizge bolg’an qarim-qatnasimizg’a bag’ishlaymiz. A’lbette su’yispenshilik haqqinda so’ylegenimizde birinshi bolip Iyemiz Iysa Masiyxtin’ bizler ushin qilg’an isin eske almay ila’ji joq. Adamlardin’ ha’r birewi Adam Ata ha’m Hawa Eneden son’ gu’nali bolip tuwila berdi. Biraq Jaratqan Iyemiz adamlardin’ ha’r birewin sonshelli su’ygenlikten olardin’ ha’r birewin qanday qilip bolsada qutqariwi kerek edi. Sonda Jaratqan Iyemiz Iysa Masiyxti jer ju’zine jiberip, adamlardin’ gu’nalari ushin qurban qildi.

A’lbette, bug’an Iyemiz Iysa Masiyx qarsi boliwi mu’mkin edi. Biraq Ol Qudaydin’ barliq aytqanlarina razi boldi. Bul adamlarg’a bolg’an ulli su’yispenshilik bolip tabiladi. Bul a’melge asirilg’an rejenin’ a’hmiyetligi, Qudaydin’ O’zi jaratqan adamlardin’ ja’ne O’zi menen birge beyishte boliwin qa’ler edi. Biraq adamlar ushin bul zat o’z – o’zinen a’melge asirilg’anday tu’yiledi. Negizi bul adamlarg’a bolg’an ulli su’yispenshilik bolip esaplanadi. Jaratqan Iyemizdin’ qa’leytu’g’in jalg’iz qa’lewi bul bizler ha’r birewimiz Og’an sadiq boliwimiz eken. Iyemiz Iysa Masiyx bizlerdin’ ha’r birewimiz ushin atanaq ag’ashta azap shegip o’lgenligin yadimizda tutip, Ol bizler ushin O’zinin’ janin qurban qilg’anlig’in ha’mme waqit eslewimiz kerek.

Men ha’m birew ushin o’z janimdi qurban qila alaman dep aytiwin’iz mu’mkin. Biraq Iyemizdin’ atanaq ag’ashtag’i o’limin hesh na’rse menen ten’lestire almaymiz. Atanaq ag’ashta bir neshe saat asilip turiwdin’ o’zi qansha azap. Qol ayaqlarg’a qag’ilg’an shegelerdi aytpaysizba? Ol jerden ag’ip atirg’an qanlar ne? Qa’dirli doslar bizler ha’r birewimiz usi to’gilgen qan sebepli o’mirge iye boldiq. Bul ushin Iyemizge minnetder boliwimiz sha’rt. Qa’dirli tin’lawshi, Iyemiz ta’repinen ko’rsetilgen su’yispenshilik ha’mme waqit ko’z aldimizda bolsin. Ha’mme waqit bir birimizge su’yispenshilik ha’m hu’rmet ko’rsetiwden sharshamayiq. Sonin’ menen qa’dirli tin’lawshilar bu’gingi esittiriwimizge juwmaq jasap sizler menen xoshlasamiz. Xosh saw- salamat bolin’.