Adam ata ha’m Hawa Ene gu’na islegeninde, bizler ha’mmemiz olarda ju’zege shiqtiq, sonin’ ushin, Iysadan basqa, bul du’nyag’a kelgen ha’r bir adam gu’nakar ta’biyat penen tuwilg’an. Bul ga’pimizdi Rimlilerge jazilg’an xattin’ 5 babi 19 ayati da’llileydi. “Bir adamnin’ boysinbag’ani sebepli ko’p adamlar gu’nakar bolip qalg’aninday, bir adamnin’ boysing’ani sebepli ko’p adamlar aqlanadi”. En’ birinshi adamlar Adam ata ha’m Hawa ene gu’na islep, pu’tkil adamzatti azap shegiwge, qiyinshiliqqa, o’limge duwshar etken edi. Olar bizlerdin’ ata-babalarimiz edi. Aradan waqit o’tip bizlerdin’ ornimizg’a jaziwlarda aytilg’aninday “ekinshi Adam” ha’m “aqirg’i Adam” dep atalg’an Iysa Masiyx Qudaydin’ aldinda bizlerdin’ ornimizg’a turdi. Iyemiz Iysa Masiyx Adam Ata jog’altqanin bizlerge qaytarip berdi.
Bul haqqinda Rimlilerge 5 bap 19 ayattin’ aqirg’i bo’liminde aniq aytilg’an: “…bir adamnin’ boysing’ani sebepli ko’p adamlar aqlanadi”. Joqarida aytip o’tkenimizdey bizler Adam Atadan miyras etip alg’an gu’nakar ta’biyatta tuwilg’anbiz: “Bir waqitlari …basqalar siyaqli bizler de ta’biyatimiz boyinsha Qudaydin’ g’a’zebine ilayiqli adamlar edik”. Bul ayatti bizler Efeslilerge jazilg’an xattin’ 2 babi 3 ayatinda oqiwimiz mu’mkin.
Jan’a tuwilg’an na’resteni gu’na islewge u’yretiwdin’ keregi joq. Ol gu’nakar ta’biyatti Adam Atadan miyras etip alg’an, sonin’ ushin da gu’na onin’ ta’biyatinda bar. “Gu’nakar” degen tu’sinik, bul ha’r bir adam jaman degendi bildirmeydi, negizin alip qarasaq, gu’nanin’ za’ha’ri insandi pu’tkilley qorshap alg’anin bildiredi. Sonin’ ushin, Muxaddes Kitap Masiyxtan ayirilg’an adamlardi jinayat ha’m gu’nada o’lik, dep ayatdi eken. Adam Atanin’ etken gu’nasi ha’zirge shekem bizlerdin’ janimizda ha’m ruwximizda, solay etip, denemizde de jasirinip jatadi. Hesh birewimizdin’ ta’biyatimizda, muxaddes ha’m pa’k bolg’an Qudayimizdin’ ko’z aldinda shiday alatug’in yamasa turip bere alatug’in hesh na’rsemiz joq. Sebebi ha’r bir insan Qudaydin’ ko’z aldinda gu’nakar bolip tabiladi. Rimlilerge 3 bap 10 ayat bizlerge usi haqqinda bilay deydi: “Hesh bir haq adam joq, birde biri joq”. Adamnin’ ta’biyatinda bolip turatug’in gu’nalardin’ ha’r birewi Qudaydin’ ko’z aldinda jerkenishli bolip ko’rinedi. Bizler gu’na islegenimiz ushin gu’nakar bolmadiq.
Kerisinshe, bizler gu’nakar bolip tuwilg’animiz ushin gu’na etemiz. Tek g’ana bizlerdin’ o’mirimizdegi jaman isler gu’na bolip qalmay, biraq Qudaydin’ nizamlarin buziw ha’m boysinbaw gu’na esaplanadi. Bulardin’ ha’mmesi Iyemiz Iysa Masiyx Nikodimge aytqan so’zlerinin’ haq ekenligin da’llileydi: Ol bilay degen edi: “Sag’an shinin ayatman: eger kim de kim joqaridan tuwilmasa, Qudaydin’ Saltanatina kire almaydi”.
Hu’rmetli Danaliq radiosi tin’lawshilari, gu’na bizlerdi ha’mme waqit Qudaydan uzaqlastiradi. Qudayg’a jaqinlasiw ushin ha’mme waqit gu’nalarimizdi Onin’ aldinda ta’n alip, keshirim sorayiq. Sonda Onin’ jarilqawi barqulla u’stimizde boladi.
