Assalawma a’leykum hu’rmetli doslarimiz. Geybirewler Qudaydan iseniwshilerdi ko’beytiwin sorap duwa etedi. Muxaddes Kitapta isenim haqqinda bir ayat bar. “Demek, isenim esitiw arqali payda boladi, al esitiw Masiyx haqqinda so’zdin’ ja’riyalaniwi arqali boladi” (Rim 10:17). Demek, Quday isenimimizdi ku’sheytuwi ushin a’lbette Onin’ So’zin tin’lawimiz kerek. Bu’gin Quday siz benen mag’an ne demekshi ekenligin tin’lap ko’reyik. Qollarin’izda Muxaddes Kitabin’iz bolsa Matta 5 bap ha’m 31 ayattan o’tken sapari toqtag’an jerimizden dawam eteyik. “Kim de kim o’z hayali menen ajiraspaqshi bolsa, og’an talaq xat bersin”, – delingen. Al Menin’ sizlerge aytatug’inim: kim de kim neke hadallig’in buzbag’an hayalinan ajirassa, hayalinin’ neke hadallig’in buziwina sebepker boladi. Sonday-aq kim de kim ku’yewinen ajirasqan bir hayaldi alsa, ol neke hadallig’in buzadi.

Ant ishiw tuwrali: “Antin’di buzba, Jaratqan Iye aldinda antin’di orinla!” – dep buring’ilarg’a aytilg’andi esitkensiz. Al Menin’ sizlerge aytatug’inim: hesh waqitta ant ishpe! Aspan menen de ant ishpe, o’ytkeni ol – Qudaydin’ taxti. Jer menen de ant ishpe, sebebi ol – Onin’ ayaq basari. Erusalim menen de ant ishpe, o’ytkeni ol – ulli Patshanin’ qalasi. O’z basin’ menen de ant ishpe, sebebi sen shashin’nin’ bir talin da ya ag’arta, ya qarayta almaysan’. Sizlerdin’ “awa” so’zin’iz “awa”, “yaq” so’zin’iz “yaq” bolsin, bunnan basqasi shaytannan.

Jamanliqti jaqsiliq penen jen’iw haqqinda. Sizler: “Ko’zge ko’z, tiske tis”, degendi esitkensiz. Al Menin’ sizlerge aytatug’inim: jaman adam menen qarsilaspan’. Birew betin’nin’ on’ jag’ina ursa, og’an betin’nin’ sol jag’in da tut. Birew senin’ menen dawlasip ko’ylegin’di alg’isi kelse, og’an shapanin’di da sheship ber. Birew seni o’zi menen birge bir shaqirim jer ju’riwge ma’jbu’rlese, onin’ menen birge eki shaqirim ju’r. Sennen sorag’ang’a ber, sennen qarizg’a alayin degennen ayama.

Dushpanlarin’izdi su’yin’ler! “Janin’dag’i adamdi su’y, dushpanin’di jek ko’r”, – degendi esitkensiz. Biraq Menin’ sizlerge aytatug’inim: dushpanlarin’izdi su’yin’ler, sizlerdi quwdalaytug’inlar ushin duwa etin’ler. Sonda aspandag’i A’ken’izdin’ balalari bolasizlar. O’ytkeni Ol jamanlardin’ u’stine de, jaqsilardin’ u’stine de, O’z quyashinin’ nurin to’gedi ha’m haq adamlardin’ u’stine de, nahaqlardin’ u’stine de, jawinin jawdiradi. Eger sizler o’zlerin’izdi su’ygenlerdi g’ana su’ysen’ler, qanday siyliq alasizlar? Saliqshilar da solay islemey me? Sizler tuwisqanlarin’iz benen g’ana sa’lemlessen’ler, onda qanday o’zgesheligin’iz bar? Butqa tabiniwshilar da solay islemey me? Solay etip, aspandag’i A’ken’izdin’ minsiz bolg’ani siyaqli, sizler de minsiz bolin’lar!

6 – Bap Sawap isler tuwrali “Abaylan’lar, sizler sawap islerin’izdi adamlarg’a ko’rsetiw ushin, olardin’ aldinda islemen’ler. Olay etsen’ler, sizlerge aspandag’i A’ken’izden siyliq bolmaydi. Birewge qayir-sadaqa bergenin’de, eki ju’zliler siyaqli jar salma. Bundaylar adamlar maqtasin dep, ma’jilisxanalarda ha’m ko’shelerde usilay isleydi. Sizlerge shinin aytip turman: olar a’lle qashan o’z siylarin alip boldi. Sen qayir-sadaqa bergenin’de, on’ qolin’nin’ ne islegenin sol qolin’ bilmesin. Sonda sen qilg’an qayirli is jasirin boladi ha’m jasirinliqti ko’riwshi A’ken’ sag’an qaytaradi”.

Doslar, bizlerdi tin’lawda dawam etin’ ha’m bizlerdin’ danaliq.com saytimizda ja’nede ko’plegen qiziq ha’m paydali ku’ndelikli Qudaydin’ So’zin tin’lawin’izdi mira’t etip sizler menen ha’zirshe xoshlasamiz.