Assalawma a’leykum qa’dirli doslar. Iysa atanaq ag’ashqa qag’ilmasinan aldin, sha’kirtleri menen keshki awqatqa jiynaldi. Keshki awqattan son’, Iysa u’stki kiyimin shiyship, beline su’lgi baylap, sha’kirtlerinin’ ayaqlarin juwdi. Onin’ bul ha’reketinen sha’kirtleri hayran qaldi. Odan ha’m betteri, Iysa olarg’a, olardin’ ishinde biri satqin ekenligin aytti. Sha’kirtleri ja’ne de ko’birek hayran boldi. Son’ Iysa so’zin dawam etip bilay dedi: “Birazdan keyin, du’nya Meni qaytip ko’rmeydi. Biraq sizler Meni ko’resizler. O’ytkeni Men qayta tirilemen, sizler de qayta tirilesizler” (Yuxan 14:19). Iysa olarg’a so’zinde ja’ne dawam etip bilay deydi: “Sizler menen endi ko’p so’ylese almayman, O’ytkeni bul du’nyanin’ ha’kimi kiyatir. Onin’ Menin’ u’stimnen hesh qanday biyligi joq” (Yuxan 14:30).

Sha’kirtlerinin’ ju’zleri awir bir ko’riniske keldi. Iysa olarg’a ja’ne bilay dedi: “Balalarim, Men sizlerdi su’yemen, ju’reklerin’iz qiynalmasin, Men sizlerdi jetim qaldirmayman”, usi so’zlerdi aytip turg’anda sha’kirtleri o’zlerin ku’shsiz, isenimsiz ha’m qorqinish penen Og’an qarap turg’an edi. Olar qorqip ha’m ha’weterge tu’sip, ta’shwishlene basladi. Olar o’zlerin tap ata-anasinan ayirilip qalg’an jetim balalarday qilip sezdi. Iysa olarg’a qarap turip, “Qa’ne turin’lar, bul jerden keteyik”, – dedi. (Yuxan 14:31). Olar ol jerden, ha’r dayim ibadat etiwge baratug’in jerge qaray ketti. Jolda baratirip ju’zim ag’ashinin’ aldinda toqtap: “Men haqiyqiy ju’zim ag’ashiman, al A’kem bag’man” – dedi.

Son’ Iysa bag’man menen ju’zim ag’ashinin’ mu’na’sa’betleri, bag’mannin’ ju’zim ag’ashina bolg’an g’amxorlig’i haqqinda aytip berdi. Biraq sol waqitta bular sha’kirtlerinin’ esitkileri kelmegen na’rseler edi. Biraq olar Iysani diqqat penen tin’lag’anlarinda, Iysa olardin’ a’jayip keleshegi haqqinda aytip atirg’anlarin tu’singen bolar edi. Olar Iysa Masiyxti shini menen Masiyx, patsha bolip kelgen, bizlerdi Rimlilerdin’ azabinan qutqaradi dep oylag’an. Biraq olar ku’tken na’rseler bolmadi. Doslar, sizlerde de usinday bolg’an ba? Quday menin’ o’mirimde minani yamasa anani qiladi dep oylaysiz, biraq siz ku’tken na’rse bolmaydi. Usinday jag’day siz benen de bolg’an ba? Onda diqqat penen bizlerdi tin’lan’. Men de aldin Yuxannin’ 13-15 baplarin tu’sinbey Qudaydan qapa bolip, ashiwim kelgen waqitlarida boldi. Quday menin’ qa’lewim boyinsha mag’an ja’rdem beredi, dep oyladim.

Son’ oylanip qarasam, menin’ qa’tem Onin’ So’zlerin diqqat penen esitpegenim ushin eken. Biraq Quday meni qayta -qayta bag’dag’i so’zlerdi esitiwime ha’m olar haqqinda oylawima u’ndedi. Quday Mennen qa’legeni bul mol jemis beriw bolg’an eken. Sol waqitta ne ushin Quday mag’an usi baplardi qayta-qayta ko’rsete bergenin endi tu’sindim. Iysa da sol waqitta ju’zimnin’ ag’ashin uslap turip sha’kirtlerine O’zi ketkennen son’ qalay jasaw kerek ekenligi haqqinda aytqan eken. Ol bag’man menen ju’zim ag’ashinin’ sirlarin aship turg’an eken. Bag’man menen ju’zim ag’ashinin’ sirlari, ha’r bir a’ke o’zinin’ perzentinin’ fizikali, emotsional ha’m ruwxiy saw-salamat, ku’shli ha’m berekeli boliwin qa’legeni eken. Doslar, basqasha etip aytqanda oni shan’araq sirlari dep te atasaq boladi. Quday bizlerden neni qa’leydi? Bul haqqinda keyingi esittiriwlerimizde toliq sa’wbetlesemiz. Sizlerge Yuxannin’ 13 babtan 15 bapqa shekemgi jerlerin oqip shig’iwdi ma’sla’het berip, sizler menen ha’zirshe xoshlasamiz. Saw-aman bolin’ doslar.