Assalawma a’leykum qa’dirli doslar. Sizler menen ja’ne efir arqali ushrasip turg’animnan quwanishliman. Eger bir tuwisqanimizdi toqtatip: “Iymanlinin’ o’mirindegi jemis ne?”, dep sorasan’iz, “Quday ushin qutqarilg’an janlar”, deydi. A’lbette, bul duris, biraq Iysa tek g’ana buni na’zerde tutpag’anin biliwimiz kerek. Iysanin’ ju’zimzarliqta turip aytqan so’zleri sha’kirtlerine tu’sinerli bolg’an dep oylaymiz. Sebebi olar terek ha’m onin’ jemisi insan o’mirindegi en’ a’hmiyetli jen’isti su’wretlegenin ju’da jaqsi bilgen. Dawit payg’ambar bul haqqinda bilay degen: “Ol ag’in suw boyina egilgen miywe ag’ashina megzer, miywesin o’z ma’wsiminde berer, japiraqlari quwrap qalmas, Ol ne islese de, tabisqa eriser” (Zabur 1:3). Eger jemiske a’piwayi ko’z benen qarasaq, ol adamnin’ jaqsi isleri ha’m minez xu’lqinin’ belgisi boladi. Sebebi jaqsi minez-xu’liq Qudaydi ullilaydi. Bizlerdin’ o’zlerimizdi tutiwimiz ha’m jaqsi minez-xu’lqimiz jerde Qudayg’a alg’islar alip keledi.
Sonin’ ushin Iyemiz Iysa bilay degen: “Sizler ko’p jemis bersen’ler, A’kem ullilanadi. Sonda Menin’ sha’kirtlerim bolasizlar” (Yuxan 15:8). Eger Qudayg’a bizlerdin’ ishimizde islewine qarsiliq etpesek, Ol bizlerde Iysa Masiyxtikine uqsas minez-xu’liqlardi jaratadi. “Biraq, adam o’mirinde jetistiretug’in Muxaddes Ruwxtin’ jemisi – su’yispenshilik, quwanish, tinishliq, sabirliliq, miyrimlilik, qayirqomliq, sadiqliq, mu’layimlilik ha’m o’zin tutip biliw” (Galatiyalilar 5:22). Iysanin’ sha’kirtleri o’mirlerindegi ha’r bir basqishti Qudaydi ullilaw ushin en’ jaqsi imka’niyat dep bilgen. Elshi Pavel bul haqqinda bilay deydi: “Quday sizlerdi mol miyrim menen bayitiwg’a qu’diretli. Solay etip, barliq waqitta ha’mme na’rsen’iz jeterli bolip, ha’r qanday iske bay bolasizlar” (2Korinfliler 9:8).
Siz mu’ta’j adamg’a ja’rdem bersen’iz de, kesel qon’sin’izg’a qarassan’iz da, yamasa o’mir boyi Qudayg’a xizmet qilsan’iz da, ma’qsetin’iz Qudaydi ullilaw bolsa, sizde a’lbette jaqsi jemis boladi. Doslar, ne dep oylaysiz? Jemis beriw qanshelli a’hmiyetli? Bug’an Iysa bilay juwap bergen edi: “Sizler Meni emes, Men sizlerdi tan’ladim. Barip jemis bersin ha’m jemisi turaqli bolsin dep, sizlerdi tayinladim” (Yuxan 15:16). Jemis bul bizlerdin’ aspandag’i xa’ziynemiz esaplanadi. Haqiyqiy jemis bir o’mirge tatiydi. Bizlerdin’ qutqariliwg’a erisiwimizdin’ tiykarg’i sebebi de usi. Muxaddes Kitap bilay deydi: “Bizler Qudaydin’ do’retpesimiz. O’zi aldin ala tayarlag’an jaqsi islerin islep jasawimiz ushin, Ol bizlerdi Masiyx Iysa arqali jaratti” (Efesliler 2:10). Sizler menen menin’ o’mirimde geybir a’jayip na’rseler tez ha’m o’z-o’zinen boladi, dep oylaysiz ba? A’lbette yaq. Shaqalar jemis beriwi ushin bag’man olar ushin miynet etedi.
Biraq, tilekke qarsi, barliq shaqalar da jemis bere bermeydi. Negizi ha’r bir shaqa bag’man ushin o’zgeshe, sebebi jemis jiynaytug’in waqit kelgende ha’r bir shaqa o’zgeshe tu’rde ha’m o’zgeshe ko’lemde jemis beredi. Kelin’, sizlerdi ju’zimzarliqqa sayahatqa shaqiraman. Ju’zimzarliqti aralap ju’rer ekensiz, ju’zim ag’ashinin’ qaslarina toqilg’an sebetler qoyilg’anlarin ko’resiz. Bag’man siz benen Mennen de erte kelip, jemisin terip bolg’an uqsaydi. Sebetlerge ju’zimlerdi ko’riw ushin u’n’ilip qaraymiz. Biraq, tilekke qarsi, bazi shaqalar jemis bermegen uqsaydi. Iysa bunday shaqalar haqqinda aytqan edi, esin’izde me: “Jemis bermeytug’in shaqalardi…” Biraz ju’rip keyingi sebetke qarasaq, elede ol sebette bir neshe solqim ju’zim ko’rdik. …jemis beretug’in …ja’ne de ko’birek jemis bersin dep”, degen soz’lerin esleysiz be? Doslar bizler tap usi ushin jaratilg’anbiz.
