Assalawma a’leykum doslar. Sizler menen bu’gingi bo’lisejaq bolg’an temamiz Keshirim haqqinda. Iyemiz Iysa keshirim haqqinda ko’p aytqan. Biraq aytqanlarinin’ arasinda mag’an ju’da ta’sir etkeni bul Matta 18: 21,22 ayatlarda jazilg’an. Kelin’ men oni sizlerge oqip beremen. “Sonda Petr Iysag’a kelip: “Iyem – mag’an qarsi gu’na islegen tuwisqanima neshe ret keshirim beriwim kerek? Jeti retke deyin be? – dep soradi. Iysa og’an: Sag’an jeti retke deyin emes, al jetpis jerdegi jeti retke deyin keshirim ber, deymen”. Doslar, jetpis jerdegi jeti ret neshe ma’rte bolatug’inin bilesiz be? Esaplap ko’rsek…490 ret boladi eken. Qiziq, sonsha ma’rte keshirim bergen adam o’zine keshirim beriw a’det bolip qalatug’in shig’ar.
Uris ha’m siyasiy oyinlar ko’pshilik jag’daylarda keshirip bolmaytin da’rejede qapashiliq ha’m jaraqat keltiredi. Biraq basqa ta’repten, bunday da’wirler keshirimnin’ joqari misallarin ju’zege shig’aradi. Ja’ma’a’t aqsaqali San Koreyada jasag’an. Ol kishipeyil ha’m haq kewil adam edi. 1940 jili ma’mleket basqarip atirg’an basqinshilardin’ qolinda tutqinliqta bolip u’lgergen edi. Bir ku’ni og’an eki ulinin’ o’lgenligi haqqinda tosattan xabar keledi. Olardi aktivist-studentler o’zlerinin’ g’alaba ha’reketlerine qosilmag’anlari ushin o’ltirip jiberilgenleri ma’lim boladi. Ullarin topiraqqa qoyg’an aqsaqal o’zinin’ ja’ma’a’tin hayran qaldiradi. Onin’ ju’regindegi Qudaydin’ su’yispenshiligi o’ltirgen adamdi tawip, oni balasi qilip alajag’in ha’mmege aytadi. O’ti jarilg’an jigit uris bolip atirg’an otryattan shaqirip alinip, o’zi o’ltirgen ag’a-inilinin’ shan’arag’i menen tanistiriladi.
Bul ushirasiwda aqsaqal San: “Bizler eki ulimizdan ayrildiq. Olardin’ ornina sen bizlerge ul bol”, – dep aytadi.
Eliw jasli Korri ten Bum atli Golland hayal o’z o’mirin qa’wipke qoyip, fashistlerdan jasiring’an yahudiylerge ja’rdem beredi. Bul isi ushin Korridi ajapasi Betsiy menen birge konslagerge jiberedi ha’m Betsiy sol jerde qaytis boladi. Bir ku’nleri konslagerde jawiz baqlawshilardin’ birewi ju’zinen nur taralip turg’an Korridin’ tuwri aldina keledi. Ol Qudaydan keshirim alg’an, ha’m endi dosliq qolin beriw ma’qsetinde Korridin’ aldina kelgen edi. Sol waqitta lagerde tartqan azaplari, ajapasinin’ jawizlarsha o’ltirilgeni ko’z aldina keledi. Korridin’ qollari taxta kibi qatip qalg’anday bolip tu’yiledi. Ol “Iyem, men oni keshire almayman. Meni keshir”, – dep duwa etip onin’ qolin alg’an waqtinda, – tan’ qalarli na’rse bolip o’tedi.
Jelkemnen quyilip atirg’an bir ag’im, qolim boylap ol adamg’a o’tip atirg’anday boldi. Ju’regimde bolsa bul adamg’a qarata su’yispenshilik oyanip, pu’tkil denemdi toltirdi”.
Ba’lkim siz: “Awa, endi bul basqasha adamlar da. Men onday qila almayman. Ha’tteki onday boliwin qa’lemegen ha’m bolar edim”, dep aytarsiz. A’lbette, keshiriw yamasa keshirmew o’zin’izdin’ qolin’izda. Biraq, doslar, keshirim bermewge qarar qiliwdan aldin, onin’ a’qibetleri haqqinda da oylap ko’reyik. Sebebi keshirim beriw qarar qiliwimizdan baslanadi. Quday bizlerdi qarar qiliwg’a ma’jbu’rlemeydi. Biraq Qudaydin’ kewlin toltiriwdi qa’legen adam qarar qiliwg’a qiynalmaydi. Qarar qiliw – keshirim beriwge basilg’an birinshi qa’dem demek. Doslar, kelin’, bizler sol birinshi qa’demdi basamiz, ha’m qalg’anin Qudayg’a tapsiramiz. Bul jag’i Qudaydin’ qolinda.
