Assalawma a’leykum hu’rmetli doslar. Balalig’inda velosiped qa’lemegen bala bolmag’an shig’ar! Ha’zetip velosiped aydap baratirg’an balanin’ izinen qanshadan-qansha o’zi menen ten’ balalar ha’wes etip qarap qaladi. Duris, zaman rawajlanip, avtomobillerdin’ tu’ri ko’beyip ketti, biraq qa’dirli bolg’an velosiped itibardan shette qalmadi. A’sirese, velosiped aydawdin’ den-sawliqqa paydali ekenin aytpaysiz ba. Velosiped aydag’animizda bizler ayaqlarimizdin’ muskullarin, ju’rek- qan tamir ha’m de dem aliw jollarin bekkemleymiz, artiqsha maylardan qutilamiz. Zamana’go’y qalalarda tig’inlar ko’p boladi, onday jag’daylarda velosiped ju’da qolayli transport bolip tabiladi. Doslar, bilesiz be, Londonda tez birinshi ja’rdem ko’rsetetug’in velispette ju’retug’in shipakerler bar eken.

Ko’plegen ma’mleketlerde bolsa pochta xizmetindegiler de velosipetten ken’ paydalanadi eken. Velosiped aydawdin’ paydasi ju’giriwden kem emes ha’m eken, velosiped aydaw jag’imli. Velosiped aydag’animizda kewlimiz ko’terilip, nerv tamirlari tinishlanip, adam stresslerden qutiladi. Ha’zirgi ku’ni tamirlardin’ ken’eyiwi varikozdan qiynalatug’inlar ju’da ko’p, velosiped aydaw olar ushin ju’da paydali. Ayaqlarimiz benen aylanba ha’reketler qiliw qannin’ tamirlarda tezirek ha’reketleniwine ja’rdem beredi. Demek, varikoz tamirlari bar adamlar velosiped aydawi jaqsi profilaktika. Ashiq taza hawada velosiped aydasaq, o’kpemiz jaqsi is-ha’reketke tu’sedi eken. Sonda qan kislorodqa toyip, bas miy ha’m basqa denemizdin’ ag’zalarina jetip baradi.

Eger denemizdegi artiqsha maylardi jog’altiwdi qa’lesek, ha’r ku’ni 45 minuttan velosiped aydawdi a’det etip alayiq. Biraq velosiped aydaw den-sawlig’imizg’a payda keltiriwi ushin ayrim qag’iydalarg’a boysiniwimiz kerek boladi. Misali, toyip awqatlanip bola sala velosiped aydamaw kerek. Uzaq waqit velosiped aydag’annan son’ dizelerde awiriw payda boliwi mu’mkin, demek, velosiped aydawdi da jeterli tu’rde aydawimiz lazim. Denemizdin’ suwsizlanip qalmawi ushin velosipedke otirmastan aldin suw ishiwdi umitpayiq.