Assalawma a’leykum qa’dirli tin’lawshi doslar. Yuxang’a Quday ta’repinen Ayan kelgen da’wirde eramizdin’ shama menen 90 jillarinda da tap usinday ja’ma’a’t bar edi. Quday bul ja’ma’a’t haqqinda bilay deydi: “Shaytannin’ taxti turg’an jerde jasaytug’inin’di bilemen. Atima sadiq ekenin’di de bilemen. Ha’tte, sadiq gu’wam Antipa aran’izda, shaytan otirg’an jerde o’ltirilgen ku’nlerde de sen Mag’an degen isenimin’nen qaytpadin’. Biraq, sag’an biraz qarsilig’im bar: aran’izda Bilam ta’limatin tutiwshilar bar… sol siyaqli, Nikolas uyiminin’ ta’limatin tutiwshilar da bar. Bul ushin ta’wbe qil!” (Ayat 2:13-16)
Ha’zirgi ku’ni bizler de shaytannin’ taxti jaylasqan jerde jasap atirmiz. Qudayimizg’a iqlas qoyg’an bolsaq ta, geybir qiyinshiliqlardan o’tip, Qudayg’a sadiq qalg’an bolsaq ta, ishimizde Qudayg’a maqul kelmegen pikirler, a’detler bar. Doslar, eger bul shini menen sonday bolsa, Ayan kitabinin’ 2 babin oqip shig’iwdi sizge ma’lahet beremiz. Qudaydan “Menin’ oyimda qanday naduris pikirler bar”, dep soran’. Insan a’tirapindag’i adamlardin’ da qanday ekenliklerin biliwi lazim. Sebebi jaman doslar Qudaydin’ perzentin joldan buradi. A’tirapimizda, bizler isengen adamlardin’ arasinda da Qudaydin’ tuwri jolinan adastiratug’in adamlar da boliwi mu’mkin eken. Geyde a’tirapimizda emes, al ishimizde Qudaydin’ jolinan awip ketewimizge sebebshi bolatug’in pikirler de boliwi mu’mkin.
Eger o’zin’izde sonday na’rse bar dep gumansirasan’iz, da’rrew sol na’rsenin’ ne ekenligin bilip, odan waz keshin’. Quday Pergam ja’ma’a’tine so’ylegende “aran’izda Bilam ta’limatin tutiwshilar bar”, deydi. Bilam Eski Kelisim da’wirinde jasag’an payg’ambar bolg’an. Bul adam Muxaddes Kitapta butlarg’a soyilg’an qurbanliq go’shin jewge ha’m buziqshiliq qiliwg’a u’yretiwshi timsal iretinde ko’rsetilgen. Sol waqitta Bilam Moab patshasi Balaqti Izrail xalqin joldan uriwg’a u’gitlegen edi.
Demek, Pergam ja’ma’a’tine aytilg’an ga’plerdi tin’lap ko’rsek, ishimizde qanday jawiz ha’m jerkenishli pikirler, o’sek, buziqshiliq, o’sh aliw niyetler bar -joqlig’in tekseriwimiz kerek eken. Ha’mmemiz bilgenimizdey Quday na’psiqawliqti jaqsi ko’rmeydi. Biraq geybir waqitlari o’zlerimiz bilmey da’mego’ylik etip qoyamiz. Bul kesellikten bizlerdi tek g’ana Quday azat ete aladi.
Pergam qalasindag’i ja’ma’a’t ag’zalarinin’ ishinde ju’zego’y, hu’jdansiz adamlar ha’m ja’ma’a’tten bir na’rse o’ndiriwge ha’reket qilatug’in da’mego’yler bar edi. Bunday adamlar basqa ja’ma’a’ttin’ hadal adamlarin da joldan buriwi mu’mkin. Ba’lkim sol waqitlari ja’ma’a’t aqsaqallari, haqiqiy iymanlilar ja’ma’a’t ag’azalarinin’ geybirewleri olardin’ sonday adamlar ekenliklerin sezip, duris jolg’a tu’sip keter dep u’mit etken ha’m shig’ar. Biraq Quday bilay deydi: “Ta’wbe qil! Bolmasa, tez janin’a barip, awzimdag’i qilish penen sol gu’nalarin’a qarsi urisaman”.
Doslar, menimshe bul so’zler bizlerge de tiyisli. Gu’nalarimizdi moyinlap ta’wbe qiliw en’ duris jol dep oylayman. Ta’wbe etip, bul a’detlerden, qilip ju’rgen gu’nalardan ju’z buriwimiz, bizlerdi Qudaydin’ g’a’zebinen saqlap qaladi.
