Assalawma a’leykum qa’dirli tin’lawshi doslar. Efirde ja’ne sizler ushin berilip atirg’an esittiriwlerimiz. Hu’rmetli tuwisqanlar, Ibadat bul ha’r bir Masixiy adamnin’ o’mirindegi a’hmiyetli xizmetlerden biri bolip tabiladi. Bizler ibadat etkenimizde ibadatimiz a’lbette bir na’rsege tiykarlanadi.

Quday bizlerdin’ ibadatlarimizda birge boliwi ha’m ibadatlarimizg’a juwap beriwi bolsa ha’mme waqit ha’r birimizdi ja’nede ko’birek ibadat etiwge shaqiradi. Basqasha etip aytatug’in bolsaq, Elshi Pavel aytqaninday tinimsiz ibadat etiwshi bolamiz. Eger bizler ha’r bir isimizdi ibadat arqali baslasaq, Qudayg’a ju’regimizdi ashsaq, Quday a’melge asirajaq bolg’an islerimiz de, bizlerdi danaliqqa bayitadi.

Usi danaliq tiykarinda Ol bizlerge tuwri jol ko’rsetedi. Quday bizlerdin’ ibadatlarimizg’a juwap berip atirg’anin, o’mirimizdegi bolip atirg’an o’zgerislerden biliwimiz mu’mkin. Ko’binshe jumislarimiz jaqsi bolip atirg’anda, demek, Quday meni basqarip atir dep oylap, Og’an ja’nede ko’birek u’mit etemiz. Qudayg’a u’mit etip jasaw bul jaqsi.

Biraq endi bunin’ kerisi bolsa ne qilamiz? Jumislarimiz kelispey, qiyinshiliqlar payda bolsa ne? Usinday waqitlari ko’binshe, Quday menin’ ibadatlarimdi esitpedi, meni taslap ketti dep oylaymiz. Yaq, Qudaydin’ aldinda ju’regimiz taza ha’m duris bolsa, Ol bizlerdi barqulla esitedi ha’m hesh qashan taslap ketpeydi.

Ba’lkim sol waqitta o’mirimizde bir na’rseler o’zgeriwi kerek bolip, yamasa bizlerge bir na’rse demekshi bolg’an shig’ar. Doslar, bizler, usinday qiyin waqitta da Og’an keliwdi biliwimiz kerek. Bizler ha’r birimiz qiyinshiliqlardi jen’iwimiz ushin Ol bizlerge qiyinshiliqlarimizda ja’rdemshi boliwi ha’m bizlerge ku’sh beriwin wa’de etken.

Bul haqqinda bizler Korinflilerge jazilg’an birinshi xattin’ 10 babi 13 ayatinda oqiwimiz mu’mkin: “Sizlerdin’ basin’izg’a ha’mme adamlardin’ basina tu’setug’in sinaqlardan basqa sinaqlar tu’sken joq. Quday sadiq, Ol ku’shin’izden artiq sinaqlarg’a tu’siwin’izge jol qoymaydi. Sinaqlarg’a shidawin’iz ushin, Ol sinaqlar menen birgelikte olardan shig’iw jolin da beredi”. Usi ayat arqali Quday bizlerdi hesh qashan taslap qoymaytug’inin tu’sinsek boladi.

Budan tisqari o’mirimizde bolatug’in barliq na’rseler jaqsiliq bolip xizmet etiwi haqqinda da aytadi: bul haqqinda bizler Rimlilerge jazilg’an xattin’ 8 babi 28 ayatinda oqiymiz: “Quday O’zin su’yetug’inlarg’a, yag’niy Onin’ qa’lewi boyinsha tan’lang’anlarg’a ha’mme na’rseni jaqsiliq qilip xizmet ettiretug’inin bilemiz”. Demek, o’mirimizdi Quday basqaradi. Bizlerden bolsa ha’mme na’rsede sabirliliq talap etiledi.

Qa’dirli tin’lawshi doslarimiz, o’mirin’izde neler bolmasin, barlig’i Qudaydin’ qa’lewi ha’m erki eken. Kelin’, Qudayg’a hesh qashan nalimayiq.

Usinin’ menen bu’gingi Ibadat temasi boyinsha esittiriwimiz o’z juwmag’ina jetti. Sizler menen keyingi esittiriwlerge shekem xoshlasamiz.