Assalawma a’leykum, hu’rmetli Danaliq radiosinin’ iqlasbentleri. Sizler menen efir arqali ushrasip turg’animizdan quwanishlimiz. Bu’gin sizler menen sa’wbetlespekshi bolg’an temamiz, ha’r-birewimizdin’ ku’ndelik o’mirimizde kerek bolatug’in ha’m olsiz o’mirimizde ko’plegen qiyinshiliqlar boliwi mu’mkin bolg’an na’rse yag’niy pul haqqinda. Eger dawam etip atirg’an o’mirge itibar berip qaraytug’in bolsaq, ko’p na’rseler pul menen o’lshenedi. Doslarin’izdin’ ko’pligi yamasa azlig’i, sizge bolg’an hu’rmet itibar, basqalardin’ sizge bolg’an mu’na’sa’beti, ha’mmesi son’g’i waqitlari pulin’iz yamasa baylig’in’izg’a baylanisli bolip qalg’an.

O’zi usinday boliwi kerek pe? A’lbette yaq. Biraq bul haqiyqat. A’tirapin’izg’a jaqsilap qarap itibar berip ko’rin’, kim ozadi degen jarisqa uqsas ko’rinisti ko’riwin’iz mu’mkin. Adamlardi bug’an kim yamasa ne ma’jbu’rlep atir? Bul sorawg’a bir juwap bar. Ol da bolsa, men sennen kem bolmawim kerek degen. Eger ha’mmesi a’dillik penen qilinsa, pul tabiw yamasa bayliq arttiriw o’zi jaman emes. Sebebi pulimiz bolsa toy beremiz, ha’r qiyli merekeler deysiz be yamasa u’y quramiz. Eger pulimiz bolsa jaqsi awqatlanamiz, jaqsi kiyinemiz uliwma kewlimiz neni qa’lese soni qiliwimiz mu’mkin.

Biraq pulimiz bolmasa ne? A’lbette birewden yamasa bir na’rsege nalip otiramiz. Menin’ oyimsha bul du’nyada puli ko’p boliwin qa’lemegen adam bolmasa kerek. Menin’ bir dostimnin’ aytiwinsha, adamnin’ puli ko’p boliwi, onin’ puldi qalay isletiwine baylanisli eken. Bul ga’pte de jan bar. Sebebi bay adamnin’ bayiwinin’ birinshi sebebi ol puldi duris isletiwdi biledi degen ga’pler de xalqimiz arasinda anda sanda bolsa da esitiledi. Biraq pulg’a ha’m bayliqqa Qudaydin’ mu’na’sa’beti qanday dep oylaysiz? Kelin’, Muxaddes Kitaptin’ Yuxannin’ birinshi xati, ekinshi babi, 15, 16,17 ayatlarda jazilg’an jerlerin birgelikte oqiymiz.

“Du’nyani ha’m du’nyadag’i na’rselerdi su’ymen’ler. Kim de kim du’nyani su’yse, onda A’kege su’yispenshilik joq. Sebebi du’nyada bolg’an ha’r bir na’rse: denenin’ qa’lewleri, ko’zdin’ qa’lewleri ha’m o’mirdegi menmenlik A’keden emes, du’nyadan. Du’nya ha’m onin’ qa’lewleri o’tip ketedi, biraq Qudaydin’ erkin orinlag’an adam ma’n’gi jasaydi” – deydi.

Ja’ne bir jerinde, “Hesh kim eki xojaying’a xizmet ete almaydi. Sebebi ol birewin jek ko’rip, ekinshisin jaqsi ko’redi yamasa birewine sadiq bolip, ekinshisine itibarsiz qaraydi. Sizler ha’m Qudayg’a, ha’m bayliqqa birdey xizmet ete almaysizlar”. (Matta 6:24)

Qa’dirli tin’lawshi, pul sizdiki ha’m Quday ha’mmemizge danaliq bergen, kelin’, usi danaliqqa tiykarlanip ku’n ko’remiz. Bu’gingi esittiriwimiz arqali sizlerdi bayliq jiynaman’ yamasa ko’p pul tawman’ demekshi emespiz. Kerisinshe, ko’p pul tawip jaqsi jasawg’a ha’reket etin’ demekshimiz.

Biraq barlig’i Qudaydin’ qa’lewi ha’m erki tiykarinda boliwin esimizden shig’armayiq. Qudaydin’ Erki bolsa hadalliq ha’m pa’klikte. Doslar, Quday shan’arag’in’izdi jarilqasin, dasturxanin’izdi mol qilsin dep sizler menen ha’zirshe xoshlasamiz. Xosh saw-aman bolin’!