Assalawma a’leykum hu’rmetli tin’lawshilar. Ja’ne efir arqali sizlerge paydali ken’esler menen bo’lisiw imkaniyati berilgenine quwanishlimiz.

Doslar, kelin’, bu’gin o’zlerimiz bilgen biraq onsha itibar bermeytug’in na’rseler haqqinda sa’wbetlessek. Ha’zirgi ken’esimiz ayaqlarimiz haqqinda boladi. Ayaqlarimiz – bul bizlerdi ha’reketlendiretug’in denemizdin’ a’hmiyetli bo’legi. Bizler qay jerde bolsaq ta, yamasa qay jerde otirsaq ta, ayaqlarimiz jaqsi dem aliwin ta’miynlewimiz lazim. A’sirese hayallar stulda otirg’aninda ila’ji bolsa ayaqlarin bir-birine qoyip otiriwi lazim.

Eger bunin’ ila’ji bolmasa, dizelerin birlestirip otirg’ani maqul. Eger jerde otiratug’in bolsaq ta, ayaqlarimiz jaqsi dem alip otiratug’in boliwi kerek. Hayal ha’m qizlar avtomobil yamasa qanday da bir transportta otirg’aninda da o’zlerine itibar beriwi kerek dep oylayman. Sebebi bizler o’zlerimizdin’ kim ekenligimizdi ha’m qaysi millettin’ dawamshisi ekenimizdi yadimizdan shig’armawimiz lazim.

Otirg’an waqitta ha’r bir insan o’zin erkin seziwi kerek. Biraq qaraqalpaqsha aytqanda jalpayip otiriw degeni emes. Otirg’animizda ha’m ornimizdan turg’animizda ila’ji barinsha shawqinsiz ha’reket etiwge a’detlengenimiz maqul. Kelin’, sizlerge ja’ne bir ken’es berip o’temiz. Bul ken’esimiz awqatlaniw haqqinda.

A’lbette, ashliqti seziw bul insang’a jag’imsiz. Biraq ko’shede awqatlang’animiz jaqsi emes dep ha’m oylaymiz. En’ jaqsisi u’yimizge kelip, qollarimizdi juwip, son’ stolg’a awqatlaniwg’a otirg’animiz jaqsi. Ko’shede awqatlang’animizda ma’deniyatimizg’a onshelli tuwra kelmeydi. Ba’lkim, ko’shede awqat shaynap ju’rgenimiz ha’mmege de onshelli xosh kelmewi mu’mkin. Budan tisqari ha’reketlenip baratig’anin’izda tosattan kiyimlerin’izdi awqattin’ ta’sirinde dag’ qilip qoyiwin’iz ha’m mu’mkin. Ha’r tu’rli miywelerdi de u’yde juwip jegen maqul. Sebebi miywenin’ ishindegi tuqimlarin yamasa qabirshaqlarin ko’shede qay jerge taslawdi bilmey izlep ju’riwin’iz mu’mkin. Olardi bolsa du’s kelgen jerge taslap ketiw ma’deniyatimizg’a jaraspaydi.

Budan tisqari ma’deniyatli insan hesh qashan ko’shede semechka shaqpaydi. Tek g’ana ko’shede emes, al basqa ja’miyet jerlerinde de bul isti qilmaydi. Ko’pshiligimiz jaqsi ko’retug’in, a’sirese, kishkene balalar jaqsi ko’retug’in muz qaymaq ne? Oni qalay jesek boladi. Sebebi oni jazdin’ ku’ni u’yge shekem alip keliw an’sat emes. Muz qaymaqti malum bir belgilengen jerlerde jewimiz jaqsiraq. Bul bolsa o’zimizdi ha’m basqalardin’ kiyimlerin iplaslaniwdan saqlaydi.

Ja’miyet transportlarinda ha’m kino teatrlarda da muz qaymaq jemegenin’iz jaqsiraq. Qa’dirli tin’lawshilar, bular bizlerdin’ sizlerge bermekshi bolg’an kishkene ken’eslerimiz edi. Bulardi itibarg’a aliw, ya almasliq sizlerdin’ qolin’izda. Usinin’ menen doslar, esittiriwimizdi juwmaqlap. Sizler menen keyingi esittiriwimizge shekem xoshlasamiz.