Assalawma a’leykum tuwisqanlar, sizler menen ja’ne de amanliqta ushirasip otirg’animizg’a ju’da quwanishliman. Doslar, kelin’ler, esittiriwimizdi baslaymiz. Qa’dirli tuwisqanlar, bizler Iyemiz Iysa Masiyxqa isener ekenbiz, Iyemiz bizlerge ha’mme na’rseni ina’m etip, Onin’ izinen ergenlerimiz ushin a’jayip imka’niyatlar berdi.

Biraq sog’an qaramastan, ko’pshilik Onin’ izinen eriwdi qa’lemeydi. Qa’dirli dostim, senne? Sen Onin’ izinen eriwdi qa’lermedin’? Ba’lkim aran’izdan geybirewler “awa” dep juwap berer. Biraq Iyemiz aytqaninday, ha’mme na’rselerimizdi qaldiriwimiz kerek.

Qa’dirli dostim, seni du’nyawiy o’mirde neler uslap qaliwi mu’mkin? Usi na’rseler sag’an Iyemizdin’ izinen eriw ushin kesent keltireme? Onday bolsa, bizler qanday jaqsi a’sker boliwimiz mu’mkin? Tuwisqanlar, egerde du’nyadag’i bizlerdin’ ruwxiy o’mirimizge kesent etetug’in na’rseler bar bolsa, bul na’rselerden tolig’i menen waz keshe aliw arqali Iyemizge ilayiqli ha’m jaqsi a’sker bola aliwimiz mu’mkin eken.

Masixiy adam ha’r qiyli unamsiz oylardi ha’m ha’dden tis keselliklerdi shetke su’rip taslap, sardar basin razi qila alatug’in da’rejedegi a’skerge aylaniwi kerek. 2 Timofeyge jazg’an xatinin’ 2 babinin’ 4 ayatinda sonday jazilg’an jeri bar: “Xizmettegi a’sker o’zin a’skerlikke shaqirg’an a’skerbasinin’ kewlinen shig’iw ushin, turmis isleri menen baylanbaydi” – deydi.

Bul degenimiz Iyemizdi razi qila aliwimiz kerek. Tuwisqanlar, egerde Elshi Paveldin’ o’mirine na’zer salatug’in bolsaq, ol qa’legen jerinde ha’m qa’legen waqtinda Iyemizdi razi qiliw ushin o’limgede tayar edi. Elshi Pavel o’zinin’ o’mirin tolig’i menen Iyemizge bag’ishlag’an edi.

Budan bizler de o’rnek alsaq arziydi. Elshi Pavel Timofeyg’a bilay degen edi, 2 Timofey xatinin’ 8 ayatinda: “Dawittin’ urpag’inan shiqqan ha’m o’limnen qayta tirilgen Iysa Masiyxti yadin’da saqla! Men ja’riyalap atirg’an Xosh Xabar – usi”.

Qa’dirli tuwisqanlar, bul jerde Masiyxtin’ tiriliwine isenimnin’ jalg’iz bir sebebi, Iyemiz o’lip tiriliwi arqali shaytannin’ en’ ku’shli qurali bolg’an o’limdi jen’di. Sonin’ menen birge Iyemizdin’ o’limi, pu’tkil adamzattin’ gu’nalari ushin berilgen qurbanlig’i edi.

Elshi Paveldin’ so’zleri bugingi ku’ni bizlerge de tiyisli. Onin’ atanaq ag’ashta shekken azaplari, bizler – insanlardin’ gu’nalari ushin edi. Qudayimiz O’z Ulin aspang’a qasina aliwdan aldin Iyemiz Iysa Masiyx jerde bolip, shiday almas da’rejede kemsitilip azaplandi.

Mine usi na’rse ha’r bir masixiy insandi Onin’ izinen eriw ushin ku’sh bag’ishlaydi. Usinin’ menen qa’dirli bolg’an tuwisqanlar, bugingi sa’wbetimiz de o’z juwmag’ina kelip jetti. Basqa ja’ne de sa’wbetlerimiz arqali ushirasqansha xosh saw-salamat bolin’.