Assalawma a’leykum hu’rmetli tinlawshilar. Sizler menen ja’ne ushrasip turg’animizdan quwanishlimiz. Qa’dirli doslar, bu’gin sizler menen sipatli ta’lim aliw temasinda, biraz sa’wbet alip barmaqshimiz. Ha’zirgi ku’ni barliq adamlar qa’legen ta’limin aliw huqiqina iye. En’ a’hmiyetlisi sizde oqiw ushin qa’lew ha’m qizig’iwshiliq bolsa.

Biraq geyde mektep jasindag’i doslarimizdan qaysi oqiw ornina bariwi haqqinda sorasan’iz, an’satqana, bilmeymen dep juwap beredi. Al qizlardan sorasan’iz, bir bay adamg’a turmisqa shig’aman. Oqip ne qilaman dep juwap beredi. Bunday juwaplardi esitkenimizde biraz qapa boladi ekenbiz. Pulin’iz jeterli bolsa, ha’zirgi ku’ni qa’legen pa’nin’iz boyinsha repetitor jallap u’yin’izde jetispeytug’in bilimdi olardin’ ja’rdemi menen toldiriwin’iz mu’mkin.

Misali men jaslig’imda a’kem bergen ma’sla’ha’tlerin ko’p esleymen. Qizim jaqsi oqi, keleshekte u’lken adam, oqig’an adam bol dep aytqanlarin ko’p ma’rte esleymen. Biraq jas waqtimizda adamlardin’ ma’sla’ha’tlerin tin’lay bermeydi ekenbiz. Waqit o’tiwi menen bolsa, a’sirese o’zin’iz mustaqil o’mir baslag’anin’izdan son’, ata-anan’izdin’ balam, qizim oqi degen ga’plerin ko’p esleydi ekenbiz.

Ko’pshilik ha’zirgi ku’nleri biraz ati shiqqan joqari oqiw orinlarina oqiwg’a kiriw ushin ha’reket etedi. Eger imtixanlardan o’te almay qalsa, eki, u’sh ma’rtelep qaytaldan ha’reket etedi. Sonda da kire almasa, bara-bara oqiwdan kewli suwip baslaydi.

Eger ol adam basqa qa’niygelikke qizig’atug’in bolsada, biraq sol ati shiqqan joqari oqiw orni onin’ o’z qa’lewine qarsi bariwina ma’jbu’rleydi. Qa’dirli doslar, siz qay jerde oqisan’izda keleshekte kim bolsan’izda, o’zlerin’izdin’ tan’lag’an jaqsi ka’sip ustazi bolip jetisiwin’izdi tileymiz.

Jasliqtag’i shoqliqlardi biraz shetke iyterip qoyip, waqtinshaliq oqiw haqqinda ha’m jaqsi sipatli bilim aliw haqqinda bas qatirin’lar dep sizlerge ma’sla’ha’t beremen. Ha’zirgi ku’ni mekteplerde alding’ig’a qarag’anda oqiw sistemasi a’dewir jaqsilang’anin ko’riwimiz mu’mkin. Ha’zir ha’r bir mektepke kirip ko’rsen’iz a’jayip kompyuter xanalarin ko’rip ko’zin’iz quwanadi.

A’sirese jas balalardin’ kompyuterdi bilgeni adamdi quwantiradi. Qa’nshelli bilimge iye bolsan’iz sonshelli Qudayg’a minnetdar boliwin’iz lazim dep bilemiz. Sebebi bizlerge bul bilimlerdi iyelewimizge Quday danaliq berip atirg’anin esimizden shig’armawimiz lazim. Eger masixiy doslarimiz qay jerde oqiwlarin bilmey atirg’an bolsa, ha’zir Masixiy dosalarimiz ushin ko’plegen Institutlar bar. Siz ol jerde ruwxiy bilim aliw menen birge du’nyawiy bilimge de iye boliwin’iz mu’mkin.

Doslar, du’nya ku’n sayin tez o’zgerip baratir. Bul bolsa o’z na’wbetinde ha’r bir adamnan ku’shli bilim talap etedi.

Ha’zir ha’r bir adam jaslig’inda jaqsi ta’lim aliwg’a ha’reket etiwi lazim. Alg’an bilimin’iz o’mirin’iz dawaminda hesh qashan sizge artiqshaliq etpeydi. Sonin’ ushin jasliqtag’i ku’shin’izdi artiqsha na’rseler ushin emes, al bilim ushin jumsan’ qa’dirli dostim. Usinin’ menen doslar bu’gingi sa’wbetimiz usi jerde tawsilip, sizler menen keyingi esittiriwlerimizge shekem saw aman bolin’lar dep xoshlasamiz.