Assalawma a’leykum doslar. Eger esin’izde bolsa, bizler o’tken sapari Efes qalasindag’i ja’ma’a’t haqqinda sa’wbetlesip, bul ja’ma’a’tqa aytilg’an ga’pler bizlerdin’ o’mirimizge de tiyisli boliwi mu’mkinligi haqqinda sa’wbetlesken edik.

Quday Yuxang’a ayan bergende, jeti ja’ma’a’t haqqindag’i pikirlerin bildirgen edi. Sol waqitta jetiden ko’birek ja’ma’a’t bolg’an ha’m shig’ar, biraq bul jeti ja’ma’a’t basqa kishi u’y ja’ma’a’tlerine o’rnek bolg’ani ushin ha’m olardin’ kemshilikleri ha’m jetisiwleri haqqinda aytilg’an. Quday menin’ menen de so’ylesiwin, menin’ jaqsiliqlarim, qa’telerim ha’m kemshiliklerim haqqinda so’ylewin qa’ler edim.

Eger Smirna qalasindag’i ja’ma’a’tqa jazilg’an xattan o’zlerin’izge tiyisli sabaqti aliwdi qa’lesen’iz, sha’rtli ra’wishte bul ja’ma’a’tti bir jeke adam dep esaplan’, kelin’, ol haqqinda u’yreniwdi baslaymiz. “… O’lip, o’limnen qayta tirilgen, Birinshi ha’m Son’g’i bolg’an bilay deydi: Senin’ qayg’i-ha’siretin’di ha’m ka’mbag’allig’in’di bilemen. Biraq, sen baysan’! O’zlerin yahudiylermiz deytug’inlardin’ seni masqaralap aytqan so’zlerin de bilemen. Biraq olardin’ yahudiy emes, al shaytan jiyini. Basin’a tu’setug’in qiyinshiliqlardan qorqpa! Mine, shaytan sizlerdi sinaw ushin aran’izdag’i bazilarin’izdi qamaqqa taslaydi. On ku’n azap shegesizler. O’liwge tuwra kelse de, Mag’an sadiq qal, sonda Men sag’an o’mir tajin beremen” (Ayan 2:8-10).

Bu’gin Qudaydin’ dawisin, qasimizda turg’an dostimizdin’ aniq dawisi kibi esite almasaq da, Qudaydin’ bizlerge aytajaq bolg’an so’zlerin biliwdin’ ila’ji bar. Quday bu’gin Ayan kitabi arqali bizlerdin’ de kemshiliklerimizdi, qa’telerimizdi aship beriwi mu’mkin. Smirna ja’ma’a’tine tag’i qaytatug’in bolsaq, Quday oni “ka’mbag’al ha’m bay” dep aytadi. Sol waqitta bul ja’ma’a’t basqa ja’ma’a’tlarg’a qarag’anda ka’mbag’alraq bolg’an. Biraq, materiyalliq jag’inan ka’mbag’allig’ina qaramay, Quday og’an “Sen baysan’”, deydi.

Ba’lkim sizlerdin’ de qollarin’izda ko’p na’rse joq shig’ar. Ba’lkim siz de o’zin’izdi ka’mbag’alman dep oylaytug’in shig’arsiz?! Eger solay bolsa, Quday “Sen baysan’” degen ga’pin esin’izge tu’sirin’. Siz benen men materiyalliq jag’inan ka’mbag’al bolsaq ta, ruwxiy baymiz. Materiyal ka’mbag’alliq bul hesh na’rse emes, ruwxiy ka’mbag’al bolip qalmaw kerek. Quday bu’gin bizlerge Smirna ja’ma’a’tine aytqan ga’pleri arqali “Basin’a tu’setug’in qiyinshiliqlardan qorqpa! Mine shaytan sinaw ushin tu’rli qiyinshiliqlardi basin’a saladi, biraq aqirina shekem Mag’an sadiq bol. Sonda sag’an o’mir tajin beremen” deydi.