Assalawma a’leykum qa’dirli tin’lawshilar. Jaqinda Ayan kitabin oqip turip, teren’ oyg’a toldim. Elshi Yuxan bul ayandi alg’anda qanday awhalda bolg’an eken?

Qudaydin’ perishtesi Yuxang’a ja’ma’a’tler haqqinda so’ylegen. Qudaydin’ bul ja’ma’a’tler haqqindag’i pikiri sol waqittag’i ja’ma’a’tler ushin ju’da jaqsi qollanba bolip xizmet etken bolsa kerek. Olar bul xabardi esitken waqiti, o’z qa’telerin an’lap, ja’ma’a’tlerin ja’nede jaqsilag’an. Ja’ma’a’tlerge jazilg’an xatti oqig’animda, bul ko’rsetpeler, ha’m eskertiwler bizler, iymanlilarg’a da tuwri keledi, degen pikirge keldim. Ne ushin deysiz be? Kelin’, a’wele Efes qalasindag’i ja’ma’a’tqa jazilg’an xatti oqip ko’remiz:

“…On’ qolina jeti juldiz uslag’an, jeti altin shira qoyg’ishtin’ ortasinda ju’retug’in bilay deydi: Senin’ islerin’di, awir miynetin’di ha’m sabirlilig’in’di, bilemen. Jaman adamlardin’ jamanliq islewine jol qoymaytug’inin’di da bilemen. Elshi emes bolip turip, o’zlerin elshi dep atag’anlardi sinadin’ ha’m olardin’ o’tirikshi ekenin bilip aldin’. Awa, sen sabirlisan’. Menin’ atim ushin qiyinshiliqlarg’a shidam berdin’ ha’m sharshamadin’. Biraq, sag’an bir qarsilig’im bar: sen birinshi isengen waqtin’dag’i su’yispenshiligin’di joyttin’. Solay etip ne na’rsede aljasqanin’di esin’e tu’sir! Ta’wbe qilip, da’slepki islerin’di dawam et. Eger ta’wbe qilmasan’, sag’an kelip, shira qoyg’ishin’di orninan alip taslayman. Degen menen, sende bir unamli qa’siyet bar: sen Nikolas uyiminin’ islerin jek ko’resen’. Olardi Men de jek ko’remen” (Ayan 2:1-6).

Sol waqitta Efes qalasindag’i ja’ma’a’t ju’da jaqsi o’sip atirg’an edi. Quday oni “jaqsi isleysen’, miynetkeshsen’, sabirlisan’, Meni dep ko’p na’rselerge shidadin’, buziq adamlardi ko’tere almaysan’. Ko’pshilikti sinadin’, jalg’anlarin aship berdin’”, – dep maqtaydi. Biraq, sonin’ menen birge onin’ qa’tesin de ko’rsetedi. Onin’ qa’tesi “aldin’g’i su’yispenshiligin joytqani edi”. Bul du’nyawiy muhabbat emes. Quday bul jerde ruwxiy muhabbat haqqinda aytip atir. Birinshi Qudaydi tanig’an ku’nlerdegi qizip turg’an, Muxaddes Ruwxqa tola muhabbat. Quday ushin ha’r na’rsege tayar bolg’an muhabbat. Bizler de bazi waqitlari ruwxiy iqlasimiz to’menlegenin, aldin’g’i ku’shli muhabbat so’ngenin ko’remiz. Quday usi muhabbat haqqinda aytip atir. Qudaydin’ xizmetin muhabbatsiz, ma’jburiy orinlaw, oni shin kewilden orinlamag’anliq penen ten’ ekenin tu’sinemiz.

Shini menen de aramizda, Qudayg’a xizmet etip atirg’anlar bar. Olardin’ geybirewleri shini menen de bul xizmetke qiliniwi lazim bolg’an is dep qaraydi. Bunday adamlarg’a Quday “Ta’wbe et ha’m aldin’g’i islerin’di qilip ju’r” – deydi. Qudaydin’ xizmetinde ekenbiz, Og’an maqul bolg’an islerdi qiliwimiz, qilg’anda da Qudayg’a sheksiz minnetdarshiliq, ku’shli muhabbat penen qarawimiz kerek. Quday bizlerden tap usini ku’tedi. Quday bizlerdin’ jaqsi islerimizdi, sabirlilig’imizdi, Onin’ ati ushin qanday qiyinshiliqlardi jen’ip o’tkenimizdi biledi. Ol bulardin’ barlig’in qa’dirleydi. Biraq, sonin’ menen birge qa’telerimizdi tuwrilawimizdi qa’leydi.