Assalawma a’leykum hu’rmetli radio tin’lawshi iqlasbentler. Efirde Danaliq radiosi. Iyemiz Iysa, Luka kitabinin’ 14 babi 26, 27 ayatlarinda qiziq bir na’rse aytip o’tken. Kelin’ usi ayatlardi sizler menen birge oqip shig’amiz.

“Kim de kim Mag’an kelip, Meni ata-anasinan, hayalinan, balalarinan, ag’a-inisinen, apa-qarindaslarinan, ha’tte, o’z o’mirinen de artiq ko’rmese, ol Menin’ sha’kirtim bola almaydi”. A’lbette bul ayatti kimdir uliwma basqasha analiz qiliwi mu’mkin.

Qisqasha etip aytatin bolsaq, Iyemiz bul ayat arqali Onin’ izinen eriw ha’m Onin’ sha’kirti boliw a’hmiyetli ekenligin aytajaq edi. Iysa Masiyx kerisinshe, bizler ha’mmeni hu’rmet etiwimiz ta’repinde. A’sirese ata-anamizdi hu’rmet etiwimizdi qa’leydi. Iysanin’ sha’kirti boliwimiz ushin ko’p na’rselerimizdi qurban qiliwimiz kerek boladi.

Ba’lkim kimlerdir jumis orninda adamlardi aldaw arqali bayliq arttirip atirg’an boliwi mu’mkin. Iyemizdin’ sha’kirti boliwdi qa’lesek sol bayliqtan ha’m waz keshiwimizge tuwra keledi. Iysa Masiyx Luka kitabi 14 babi 33 ayatinda bilay deydi.

“Solay etip, sizlerdin’ ha’r birin’iz o’zin’izge tiyisli ha’mme zattan waz keshpesen’iz, Menin’ sha’kirtim bola almaysiz”. Sonin’ ushinda sha’kirt boliw ushin ko’p na’rselerden waz keshiwge tuwra keledi dep aytip o’tken edik. Iysa bizlerden talap etip atirg’an na’rse, Ol bizlerdin’ o’mirimiz orayina jaylaspaqshi. Ha’r bir sha’kirt bolsa o’z ju’reginin’ orayinan Iyemizge orin bere alatug’in insan boliwi kerek.

Eger ha’r bir sha’kirt usi talaplarg’a razi bolsa, demek, tez arada o’mirimizde ko’plegen hasil boladi. Ekinshi ta’repten qarasaq, Iyemizdin’ izinen eretug’in sadiq insan Aspanda o’zleri ushin g’a’ziyne jiynaydi. Bul haqqinda Matta Kitabinin’ 6 babi 20 ayatta aytilg’an.

G’a’ziyne jiynawimiz ushin bolsa Iyemizdin’ haqiyqiy sh’akirtleri boliwimiz kerek. Quday Akemiz usi jerdegi waqtimizda da bizlerdin’ mu’ta’jliklerimizdi jetirli da’rejede ta’miynlep atir. Sebebi Quday O’zine tiyisli insandi taniydi ha’m onin’ mu’ta’jliklerin jaqsi biledi.

Iyemiz Iysa aytqaninday: “Men ushin u’y jay, apa sin’gil, ag’a ini, ata-ana, hayalin, balalarin yamasa mal-mu’lkin qaldirip ketken ha’r bir adam, bulardan ju’z ese artig’in tawip ma’n’gilik o’mirge iye boladi” – deydi. Bul ga’plerden Iyemiz ushin ayrim na’rselerdi qurban qiliwimiz kerekligin ko’riwimiz mu’mkin.

Quday A’kemiz bolsa bizlerdi Aspanda eki ese jarilqaydi. Qa’dirli tuwisqanlar, iymanin’iz bolsin. Shan’arag’in’izg’a Quday tinishliq ha’m bereket bersin dep, esittiriwimizdi usi jerde juwmaqlaymiz. Keyingi esittiriwlerimizge shekem ha’m odan keyin ha’m Quday ha’r birewimizdi O’zi asrasin. Xosh saw-aman bolin’.