Assalawma a’leykum qa’dirli doslar. Sizler menen ja’ne esittiriwlerimiz arqali ushrasip turg’animizdan quwanishlimiz. Qa’dirli tin’lawshilar, bu’gin sizler menen Iyemiz Iysanin’ a’jayip xizmetleri haqqinda sa’wbet alip barmaqshimiz. Bizlerdin’ ha’r birewimiz Iyemizdin’ jer ju’zine keliwinin’ ma’qseti Aspan Patshalig’i haqqinda adamlarg’a aytiw edi. Ol Aspan Patshalig’inin’ jaqinlag’anin ha’m Onin’ sirlari haqqinda ko’plegen adamlarg’a jariyaladi. Son’ Aspan Patshalig’ina barajaq bolg’an barliq adamalardi O’zine sadiq boliwi kerekligin olarg’a jetkerdi.

Eger Muxaddes Kitapti diqqat penen oqisaq Iyemiz O’zinin’ sha’kirtlerinen bekkem iymandi talap ekenin ko’riwimiz mu’mkin. Iyemizdin’ bir awiz So’zi menen Petr ha’m ja’ne basqa sha’kirtleri barliq na’rselerin taslap Onin’ izinen erdi. Bizler bul haqqinda Matta kitabinin’ 4 babi 18, 19 ayatlarda oqiwimiz mu’mkin.

Misali, Matta da islep otirg’an jerinde, isin taslap orninan turip Iyemizdin’ bir awiz ga’pi menen Onin’ izinen erdi. Sol waqittag’i jag’day boyinsha Mattanin’ jumisi ko’p daramad keltiretug’in edi. Biraq ol Iyemizdin’ izinen eriw ushin ha’mme na’rseden waz keshiwge tayar edi.

Ne dep oylaysiz Qudayg’a xizmet etiw basqa islerden ko’re a’hmiyetlirek pe? Bunday sorawdi beriwimizdin’ ma’qseti, Iyemiz ha’m O’zinin’ izinen ergenlerge hesh qanday bayliq yamasa u’y jay wa’de etpegen. Onda ne ushin Iyemizdin’ sha’kirtleri Onin’ bir awiz ga’pi menen Onin’ izinen erdi. Iyemizdin’ izinen eriw ha’r qanday islerden a’hmiyetlirek.

Buni bizler Onin’ sha’kirtleri tutqan jollari arqali ha’m ko’riwimiz mu’mkin. Bizlerde Iyemizge qarata bolg’an su’yispenshilik ha’r qanday na’rseden u’stin boliwi kerek. Luka kitabinin’ 9 babi 62 ayatinda: “Artina qaray beretug’in adam Qudaydin’ Patshalig’ina ilayiqli emes” – dep aytilg’an.

Sonin’ ushinda bizlerdin’ Iyemizge bolg’an su’yispenshiligimiz sheksiz boliwi lazim. Iyemizdin’ izinen eretug’in ha’r bir adam o’z atanaq ag’ashin ko’terip, bariwi kerek boladi. Bul atanaq ag’ashti ko’terip bariw an’sat bolmaydi. Biraq bizlerdi ha’r birewimiz ushin Aspan Patshalig’inda ulli siyliq tayarlap qoyilg’an.

Iyemiz bizlerge Aspan Patshalig’inda man’gi tawsilmaytug’in tinishliq ha’m quwanish wa’de etken. Bug’an erisiwimiz ushin bizlerde ku’shli isenim ha’m iyman boliwi kerek. Ba’lkim bul mu’sa’pir du’nyada bizlerge qarata ko’p qiyinshiliqlar bolar. Biraq aqirina shekem shidag’an jen’ip shig’adi. Doslar, usi jerde esittiriwimizdi juwmaqlap sizler menen xoshlasamiz. Xosh saw-salamat bolin’.