Assalawma a’leykum hu’rmetli radio tin’lawshi tuwisqanlar. Sizler menen efir arqali ja’ne ushrasip turg’animizdan sheksiz minnetdarmiz. Bu’gin men Sarbinaz sizler menen birge radio aldindaman.

Ha’mmemiz bilgenimizdey insan organiziminde ju’rektin’ orni ju’da a’hmiyetli. Egerde shipakerler insan denesindegi ayrim organlardi alip taslasa da ma’lim bir waqitqa shekem insan waqtinsha jasay aladi. Biraq ju’reksiz jasaw mu’mkin emes. Sonin’ ushinda ju’rek insang’a en’ bir kerekli organ bolip esaplanadi.

Ja’ne bir jaqsilap an’lap aliwimiz kerek bolg’an na’rse bul adamnin’ tilin ju’rek basqaradi eken. Tildin’ bar-jog’i adamnin’ ju’regindegi bar bolg’an jaqsi ha’m jaman na’rselerdi ga’p penen ispatlap beredi. Bizler so’ylegenimizde so’zler aldin ala ju’regimizde ha’m an’imizda payda boladi ha’m til arqali sirtqa shig’adi. Sonin’ ushinda da til mashqalasi, bul ju’rek penen baylanisli eken. Ju’rektin’ u’lkenlik ko’lemi ha’r bir adamnin’ o’zinin’ mushinday boladi. Biraq sonday kishkeneligine qaramay, ju’da ko’p jaqsi ha’m jaman pikirlerdi o’zine sin’dire aladi.

Iyemiz Iysa Masiyx Luka jazg’an Xosh Xabar kitabinin’ 6 babi 45 ayatinda bilay deydi: “Jaqsi adam kewlindegi jaqsi g’a’ziynesinen jaqsiliq shig’aradi, al jaman adam kewlindegi jaman g’a’ziynesinen jamanliq shig’aradi. Adamnin’ kewli nege tolip tassa, awzinan sol shig’adi.” Iyemiz Iysa usi ga’plerdi aytqaninan ko’p jillar aldin Pashta Sulayman da tap usig’an uqsas ga’plerdi aytqan edi.

“En’ baslisi, bar ku’shin’ menen ju’regin’di qorg’a, Ol o’mir bulag’i.” – Hikmetler kitabi 4 bab 23 ayat. Qiziq ta’repi sonnan ibarat, Filiplilerge jazilg’an xattin’ aqirg’i bablarinda Pavel a’jayip na’rseler haqqinda aytip o’tedi. “Tuwisqanlarim, juwmaqlap aytqanda, tek nelerdin’ haqiyqiy, nelerdin’ hu’rmetli, nelerdin’ haq, nelerdin’ pa’k, nelerdin’ unamli, nelerdin’ maqtawg’a turarli, ja’ne de, nenin’ jaqsi ha’m nenin’ alg’isqa ilayiqli ekenin teren’ oylan’lar” – Filiplilerge jazilg’an xat, 4 bab 8 ayat.

Bul so’zler menen Pavel ha’mmesine nuqta qoyatug’inday, ba’lkim sonin’ ushinda da “juwmaqlap aytqanda” dep o’z so’zin baslag’an bolsa kerek. Egerde ha’r bir adamnin’ an’i ha’m ju’regi Elshi Pavel aytqan na’rselerge toli bolg’aninda edi, menimshe hesh qanday mashqalag’a orin bolmas edi. Sebebi du’nyada barliq adamlar tek g’ana jaqsiliq qiliw ha’m bir-birine ko’meklesiw da’rdi menen jasar edi.

Bizlerdin’ basqalar menen bolatug’in mu’na’sa’betimizde tilimiz ha’m ju’regimizdin’ orni ju’da u’lken. Qa’dirli tuwisqanlarim, ba’lkim jaqin ku’nler arasinda kimlerdidir qapa qilip qoyg’an shig’arsiz. Basinan baslap eslep ko’riwge ha’reket etip ko’rin’. A’sirese birew menen barip so’ylesiwden aldin insan o’z aldina tayarlanadi. Demek, bul degeni o’zinin’ ju’regindegi bar bolg’an so’zlerdi aytiwg’a tayarlanadi degen ma’nisti bildiredi.

Ma’seleni sheshiw waqti bolsa aldinnan tayarlang’an ga’pler til arqali tuwisqang’a qarata aytiladi. Bul ga’pler tuwisqannin’ dilin qatti jaraqatlawi da mu’mkin. Onin’ ushin ju’regimizden shig’ip turg’an jaman so’zlerdi oqqa uqsatiwimiz mu’mkin.

Hu’rmetli radio tin’lawshi tuwisqanlar, Quday ju’regimizdi toliq tazalawin ha’m onda jasirinip jatirg’an na’letlewler, o’kpelew, o’sh aliw orni bolsa, su’yispenshilik ha’m muhabbatqa almastiriwdi sorayiq. Doslar, sonin’ menen bu’gingi esittiriwimizdi juwmaqlaymiz. Xosh saw-salamat bolin’.