Assalawma a’leykum qa’dirli tuwisqanlar. Sizler menen ja’ne radio tolqinlari arqali ushrasip turg’animizg’a minnetdarmiz. U’yin’izge ha’rdayim tinishliq tilegen halda, bu’gingi esittiriwimizdi baslaymiz. Qa’dirli tin’lawshilar, bu’gingi esittiriwimiz arqali bir na’zik, biraq ju’da a’hmiyetli bolg’an ma’sele boyinsha sizler menen bo’lispekshimiz, yag’niy abort qiliw ma’selesi boyinsha.

Eger qaraqalpaq tilinde tu’sinerlirek etip aytatug’in bolsaq, abort bul – ananin’ qarnindag’i balani jasalma tu’rde aldirip taslaw degendi bildiredi. Usi jerde bir soraw payda boladi. Bul soraw keyingi waqitlari tez-tez esitilip atir desekte boladi. Yag’niy, eger abort qiliwdan bas tartilsa, du’nyada adamlardin’ sani ko’beyip ketewinin’ qa’wipi joqpa degen soraw.

A’lbette bul soraw ko’pshilikti qiynap kelyatir desekte boladi. Geybirewler joqarida aytilg’an pikirge qosilsa, ja’ne birewler qarsi boladi. Amerikada shig’atug’in taniqli gazeta jaziwshinin’ biri bilay degen edi: “Du’nyadag’i u’ysiz adamalardin’ barg’an sayin ko’beyip baratirg’ani ha’m ata-anasi taslap ketken balalardin’ sani asiwinda ibadatxanalardag’i adamlar ayipdar”.

Sebebi olar o’zlerinin’ ha’r tu’rli pikirleri menen abort qiliw gu’na dep, adamlardin’ an’in za’harlep atir. Shinin aytsaq, bul ga’plerdi esitken adamnin’ eti tu’rship ketedi. Eger usi pikirdi tuwridan tuwri analiz etsek, usi maqala arqali tuwilmag’an adamlardi o’ltiriwge ruwxsat berip atirg’anin ko’rsek boladi. Ja’ne bir jaziwshinin’ biri de bilay degen edi: “Ibadatxananin’ ta’limatlari barlig’imizdi o’limge alip baradi”.

Eger du’nyada bolip atirg’an waqiyalardi diqqat penen baqlaytug’in bolsaq, tek g’ana ibadatxana ha’zirgi ku’ni barliq adamlardi jaqsiliq ha’m tinishliqqa, gu’nasiz o’mir su’riwge shaqirip atirg’an jalg’iz ma’kan ekenin tu’sinemiz. Tek g’ana qorqaq adamlar o’z balasin bag’iwg’a qorqip, joqarida aytilg’an ga’plerdi tarqatadi.

Biz qaraqalpaq xalqinda bir a’jayip ga’p bar. Yag’niy jaratqan Iyem ha’r bir insandi o’z nesiybesi menen jaratadi degen. Abort qiliw ushin qarsi bolmag’an ayrim adamlar, ha’r bir jan’a tuwilg’an na’reste arqali nanimiz ja’nede azayiwi mu’mkin dep aytqan edi. Biraq bul pikirdi basqa ta’repten ha’m ko’riwimiz mu’mkin.

Ha’r bir tuwilg’an bala basqalardin’ nanin jew menen birge, o’sip barg’an sayin o’zleri ushin ha’m nan pisiriwdi u’yrenedi. Biraq du’nyadag’i jarliliq ha’m u’ysizlikte adamlar emes, ba’lkim du’nyadag’i gu’na sebepshidir. Qa’dirli tuwisqanlar, bu’gingi esittiriwimiz arqali, Quday ha’r qanday gu’nag’a qarsi ekenin esletpekshimiz.

Sol menen bir qatarda abort ushin ha’m. Sebebi bul ele du’nyag’a kelip u’lgermegen na’resteni o’mirden ayiriw degeni. Esin’izde me? Quday bizlerge adam o’ltirme degen. Qa’dirli tin’lawshilar, usinin’ menen bu’gingi esittiriwimizdi juwmaqlaymiz. Sizlerdin’ de bu’gingi temamiz boyinsha pikirlerin’izdi ku’tip qalamiz. Doslar, xosh saw-aman bolin’.