Assalawma a’leykum doslar. Bu’gin sizler menen on tu’rli usil haqqinda sa’wbetlesemiz. Nenin’ on usili eken dep oylanip atirsiz ba? Ashiwlaniwdi tez jen’iwdin’ on usili haqqinda sa’wbetlesemiz. O’mirimiz sonday tezlik penen o’tip baratir desek boladi, ha’tteki ku’nimiz qashan aqirlap qalg’anin sezbey ha’m qalip atirmiz. Bir yamasa eki ha’pte o’tip ketkenin bilmey ha’m qalamiz. Ha’mme qay jerlergedir asig’adi, ko’pshiliktin’ ashiwi murninin’ ushinda turadi. Usinday waqitta bizlerge en’ kerekli bolg’an na’rse bul – tinishlaniw. Sebebi ashiwlaniwdin’ paydasi joq ha’m paydasi bolmag’an. Ashiwlaniw jumisin’izdi tezirek pitirip bermeydi. Solay etip, bizler menen birge bolip, sa’wbetimiz dawamin tin’lan’.

Ashiwlang’anda aqil ha’m sezim birlesse, qay birin maqullawdi bilmey qalamiz. Sonin’ ushinda da’slep tinishlaniwdi u’yrengenimiz jaqsiraq boladi.

U’yin’izge kelgenin’izde, qolayli jerge otirip alip, qol ha’m ayaqlarin’izdi erkin ha’reketke keltirin’. Bul ko’rinisin’iz shetten qarag’anda basqasha bolip ko’rinsede, o’zin’iz ushin qolayli bolsin. Ko’zlerin’izdi jumip, denen’iz ha’m ruwxin’izdi bosatip, oylarin’izg’a dem berin’. Bul shinig’iwdi ha’r ku’ni yamasa ku’n ara on bes minuttan qilsan’iz boladi. Itibar bergen bolsan’iz, ashiwlang’anin’izda bir jerin’iz awiradi. Hesh bolmag’anda basin’iz awiradi. Usinday waqitlari dene ha’m organizmimiz ku’shli bolsa, nerv tamiralar qatti ku’sh salip tartilmaydi. Bunin’ ushin bir ku’nde u’sh ma’rte on minut denen’izdi shiniqtirip, hesh bolmag’anda ornin’izdan turip, qol ayaqlarin’izdi shiniqtirip turin’.

Ashiwlang’an waqtimizda, o’z-o’zinen ko’krek aldi dem aliw jollari tezlesip, a’dettegiden joqariraq ko’terilip atirg’anin sezemiz. Bul organizm ushin qa’wipli. Dem aliwimiz tezlesse, demek tinishlandiriwg’a ha’reket etiwimiz kerek. Teren’ dem alip, barliq ta’shwishlerimiz saling’an kishkene sharg’a jel berip atirg’anday, o’kpemizdegi hawani shig’arip taslayiq. Kishkene shardin’ ren’i ha’m o’lshemin ko’z aldimizg’a keltireyik. Ja’ne bir ma’rte teren’ dem alip, jel berilgen shardi aspang’a ushirip jiberetug’inday etip ufleyik. Ashiwlang’an waqtimizda toxtap, ju’rek urig’anin tin’lawimiz da tinishlaniwg’a ja’rdem beredi eken. Qay jerde bolsaqta, ko’zlerimizdi jumip, ju’regimizdin’ uriwin tin’lap turayiq.

Bul usil ja’rdem bermese, o’zin’izge maqul bolg’an qosiqlar yamasa muzikani qatti qoyip, tinishlanaman degenin’izshe tin’lawda dawam etin’. Stresske tu’siw ha’mme ushin, a’sirese hayallar ushin ju’da qa’wipli eken. Bunday waqitta qanda adrenalin miqdari ko’terilip, ju’rek uriwi tezlesedi. Na’tiyjede dene bulshiq etleri qiynalip ha’reketleniwine ma’jbur boladi.

Ashiwlang’an adamg’a bir qaran’. Man’layinda uzin-uzin jiyriqlar, ko’zleri qisilg’an, tisleri bir-birine qatti tiyip turg’an. Qanday jag’dayg’a tu’ssekte, ju’zimizdi tiristirmawg’a ha’reket eteyik. En’ jaqsisi, ashiwlanip baslap atirg’an’izdi sessen’iz da’rriw teren’-teren’ dem alin’. Ju’giriwdin’ ilaji bolsa, ju’girin’. Ha’rekette bolin’. Hesh bolmag’anda, qolin’izda qanday da bir kishirek na’rse bolsa, oni aylantirip otirin’. Usi kishkene ha’rekette tinishlaniwg’a ja’rdem beredi.