Assalawma a’leykum doslar. O’tken sapari sizler menen Qudaydin’ a’jayip waqit saati haqqinda u’yrengen edik. Bizler Qudaydin’ sabirli, Onin’ waqiti, bu’gingi ku’n menen jasaw, u’mit ha’m keleshegimiz ushin Muxaddes Kitabinda aytip o’tken so’zlerin de u’yrengen edik. Bu’gin sizler menen u’yreniwimizdi dawam etemiz.
Qudaydi tinishliq penen ku’tiw. Joqlaw (3:25-26) “Jaratqan Iye O’zine u’mit baylag’anlarg’a, O’zin izlegenlerge jaqsiliq qiladi. Jaratqan Iyenin’ qutqariwin, U’nsiz ku’tken jaqsi”. Bir na’rseni sabirliq ha’m tinishliq penen ku’tiw, awir sharayitta bizlerdin’ en’ qa’lemeytug’in na’rsemizdin’ biri dep oylayman. Ko’binshe bizler biraz ku’tip, oylanip, sharayitimizg’a qaramay asig’ip ketemiz. Ko’binshe sezimlerge berilip ishimizden tolqinlasip ketemiz. Biraq bizler u’mitimizdi Jaratqan Iyemizge baylap, sabirliq ha’m tinishliq penen Onin’ qollarina tapsiriwimiz ha’m mu’mkin. Sebebi Quday o’mirimizde birinshi orinda turadi ha’m Ol ha’mme na’rseni basqaradi. Quday A’kemiz barqulla jaqsi. Ol bizlerge O’zinin’ jalg’iz Uli Iysa arqali qutqariliw sawg’asin berdi. Sonin’ ushin ta’shwishlengen waqitimizda bizler ju’reklerimizde tinishliq saqlap, Qudayg’a iseniwimiz lazim.
Tek Og’an boysiniw. Hikmetler (3:5-6) “Shin ju’rekten Jaratqan Iyege u’mit bayla, O’z aqil-parasatin’a su’yenip ju’rme. Islegen ha’r bir isin’de Jaratqan Iyeni tanip bil, Ol senin’ jollarin’di tuwrilap turar”. Quday ha’r birimizdi ma’qset penen jaratqan biraq ko’pshiligimiz bul ne ma’qset ekenin bilmeymiz, biraq eger bizler Qudaydin’ So’zin o’mirimizde qollanip, buyriqlarin orinlasaq, ma’qsetli ha’m o’nimli o’mirge baslawina guwa bolamiz. Sonin’ ushin o’z ku’shimizge emes, al Qudayg’a isenip, tek Og’an su’yeneyik!
Qudaydin’ waqit saatina isene aliwimizdin’ bir joli bul Onin’ menen ko’birek waqit o’tiriwiz eken. Doslar, kelin’, Quday A’kemiz bizlerdin’ju’reklerimizdi O’zinin’ Muxaddes So’zine qaratsin. Onin’ aldin da dizelerimizdi bu’gip Og’an jol aship bereyik. Quday menen qarim-qatnasimiz bizlerdin’ sabirli, tinish, ha’m jaqsi tin’lawshi bola aliwimizdag’i u’qipliliqti o’stiredi.
Eger sizlerdin’ ha’zirgi jag’dayin’iz yamasa bolip atirg’an waqiyalar ju’reklerin’izge unamaytirg’an bolsa, onda sizlerge Qudaydin’ So’zin oqip, Onin’ aldina keliwin’izge ma’sla’hat beremen. Onin’ a’jayip waqit saati ta’shwishlerin’izdi quwanishqa aylantirg’anina guwa bolasiz!
Hu’rmetli doslar, sizler menen Jaratqan Iyemiz ha’m Onin’ So’zleri menen bo’liskenimizden ju’da quwanishlimiz. Ja’ne de usig’an uqsag’an temalar haqqinda tin’lawdi qa’lesen’iz bizlerdin’ www.danaliq.com elektron ma’nzilimizdi esletip o’temen. Sizler menen keyingi esittiriwimizde ushrasqansha xosh saw-salamat bolin’!
