Assalawma a’leykum qa’dirli tin’lawshilar. Ko’pshiligimiz Adam-ata ha’m Hawa-ene haqqinda bilemiz. Olar Jaratiwshimiz, miyirman ha’m qu’diretli Quday jaratqan en’ da’slepki adamlar edi. Olar Qudaydin’ balalari kibi Og’an jaqin edi. Quday olarg’a kerek bolg’an ha’mme na’rseni: aziq-awqat, baspana, jumis, g’amxorliq ha’m qarim-qatnas bergen edi. Olar ash bolg’an da, bag’dag’i miywe ha’m palizlar menen awqatlanatug’in edi. Biykar otirmawi ushin Quday olarg’a pu’tkil haywanlar, quslar ha’m o’simliklerge g’amxorliq etiw waziypasin tapsirdi. Olar qa’lese bir-biri menen, qa’lese Quday menen sa’wbetlesip, birge waqit o’tiriwi mu’mkin edi.
Quday olarg’a A’ke o’z perzentine qanday g’amxorliq etse, sonday g’amxorliq etti. Biraq olar Qudaydin’ erkine qarsi shig’ip, gu’na isledi. Solay etip, Quday adamzatin jazaladi, biraq olardi gu’nadan qutqariwdin’ jolin oylap qoydi. Ol O’zinen uzaqlasqan insanlardi Iysa Masiyxtin’ qurbanlig’i arqali O’zine qaytariwdi rejelestirdi. Jillar o’tip, Ol keldi. Og’an isengenler Qudaydin’ perzenti degen atqa iye boldi. Muxaddes Kitapta bilay jazilg’an: “Biraq Ol O’zin qabil etkenlerge, atina isengenlerdin’ ha’mmesine Qudaydin’ balalari boliw huqiqin berdi” (Yuxan 1:12). Quday aldinnan insan menen ata baladay mu’nasa’bette boliwdi qa’legen.
Olarg’a A’ke ulin qa’nshellim su’yse, ardaqlasa, g’amxorliq etse, tap solay etip g’amxorliq etip atirg’anin ko’rsetpekshi edi. Sol sebepli adamlar Quday beretug’in qurbanliqtin’ qa’nshellim qimbatli ekenin ko’rsetiw ushin, Iysa Masiyxti Ulim dep aytti. Ol bolsa kelip Qudaydin’ qanday ekenin O’zinde ko’rsetti. Og’an isengen ha’r bir insan Quday perzenti bolip esaplandi. Qudaydin’ perzentleri bolsa Ol qa’legenindey jasawi lazim.
Quday bizlerdin’ qalay jasawimizdi ku’tedi? Muxaddes Kitap bilay deydi: “Ha’r bir na’rseni ton’qildamay ha’m tartispay islen’ler! Sonda sizler adasqan ha’m buzilg’an a’wlad arasinda Qudaydin’ kemshiliksiz, taza ha’m minsiz balalari bolasizlar. Qudaydin’ o’mir beretug’in so’zlerin basqalarg’a jetkizip, du’nyadag’i juldizlar siyaqli jarqiraysizlar”. (Filipliler 2:14-15)
Qudaydin’ perzentleri Onin’ buyriqlarina ta’rbiyali perzentler kibi boysinadi. Quday buyirg’an na’rseleri bazibir waqitlari naduristay bolip ko’rinse de, Og’an boysinadi. Muxaddes Kitapta Qudaydin’ perzentleri ne islewi, qalay jasawi haqqinda bilay jazilg’an: “Su’yikli tuwisqanlarim, bul du’nyada jat jerli ha’m qonaq bolg’an sizlerge jalbarinaman, janin’izg’a ha’r qashan qarsi turatug’in denenin’ jaman qa’lewlerinen qashin’lar. Isenbeytug’inlar arasinda hadal o’mir su’rin’ler. Olar sizlerdi jamanliq islewshiler, dep ayiplasa da, jaqsi islerin’izdi ko’rip, Quday keletug’in ku’ni Oni alg’islaydi. Iyemiz ushin adamlar ornatqan ha’r qanday ha’kimshilikke boysinin’lar. Joqari biylikke iye patshag’a ha’m jamanliq islewshilerdi jazalaw, jaqsiliq islewshilerdi xoshametlew ushin patsha ta’repinen jiberilgen ha’kimlerge boysinin’lar. Sebebi Quday sizlerdin’ jaqsi islerin’iz arqali aqilsiz adamlardin’ o’sek so’zlerinin’ toqtawin qa’leydi”. (1Petr 2:11-15)
