Assalawma a’leykum qa’dirli tuwisqanlar. Esin’izde bolsa o’tken sapari 21 a’sir miymani qanday boliwi kerekligi haqqinda sa’wbetlesken edik. Bu’gin sol sa’wbetimizdi dawam ettiremiz. Zamanago’y miymannin’ qanday boliwinin’ to’rtinshi nizami bul 4. Qolayli kiyim kiyip bariw Miymang’a baratirg’anin’izda en’ qimbat, suliw, jiltirag’an jaqinda satip alg’an ko’ylegin’izdi tan’lamawin’izdi ma’slahet beremiz. Olardi teatr-kontsertlerge o’zin’iz dem aliwg’a barg’anin’izda kiysen’iz boladi. Sebebi sol qimbat ko’ylegin’izge awqat yamasa sha’y to’gilip ketse ashiwlaniwin’iz yamasa qapa boliwin’iz mu’mkin. Ha’m budan u’ydin’ iyesi qolaysiz awhalg’a tu’siwi mu’mkin. Ha’tteki ol kiyimde miymanda uzaq waqit otira almawin’iz da mu’mkin. Ja’ne bir ma’slahatimiz bul altin saxiynalarg’a ko’milip alman’. En’ jaqsisi keregin’izdi tag’ip alin’.

5. U’y iyesinin’ u’yinde qonip qalmaw. “Miymannin’ hu’rmeti u’sh ku’n” dep aytatug’inlarin esitetug’in edik. Biraq ha’zirgi waqitta bul a’lle qashan artta bu’ring’i zamanda qalip ketken. 21 a’sir miymannin’ hu’rmeti u’sh saat! Birewdin’ u’yinde qonip qaliw – bul ma’deniyatsizliq, ha’zirgi waqitqa tuwri kelmeytug’in na’rse eken. Ba’lkim siz ushin qosimsha bo’lme joq shig’ar. Bizlerdin’ xalqimiz eger miyman jatip qalatug’in bolsa, olarg’a to’rin, ha’tteki o’zinin’ jataq ornin bosatip beredi. Al o’zleri bolsa balalarinin’ bo’lmesinde ya bolmasa qiynalip bolsada basqa jerde u’yqlaydi. A’dettegidey balalarinin’ ku’n ta’rtibi o’zgeredi ha’m bul u’lken qolaysizliqlarg’a alip keledi. Na’tiyjede tu’sinbewshilikler kelip shig’iwi mu’mkin.

6. Miyman ku’tetug’in jer bul a’lbette – u’yimiz. Ha’zirgi ku’nleri adamlar doslari yamasa ag’ayinleri, kollektivleri menen ayda bir, eki ma’rte ushirasip turadi. Bul a’lbette ju’da jaqsi. Qarim-qatnas ha’mmege kerek. Biraq bunday ushirasiwlar bizlerdin’ pikirimizshe kafe, restoranlarda o’tiriliwi kerek. Sebebi bir ku’n bolatug’in otirispaq ushin u’sh ku’n aldin tayarlanip baslaymiz. U’ylerdi jiynastiramiz, tazalaymiz, ha’r qiyli mazali na’rseler pisiremiz, bazarliq qilamiz, ha’rejet ha’m tag’i basqa. Sol otirispaq o’tkennen son’ sharshag’animizdan bir neshe ku’nge deyin o’zimizge kele almay ju’remiz. Bul menen miyman kelmesin, qarim qatnas joq bolsin demekshi emespiz. Bul menen o’zimiz ha’m ku’tetug’in adamlarimiz benen jaqsi waqit o’tkeriwdi na’zerde tutip atirmiz. Miymannin’ kelgeni a’lbette jaqsi. Doslarimizg’a miymang’a barmasaqta bolmaydi. Aytpaqshi bolg’animiz – zamanago’y ha’zirgi da’wirdi esapqa alip qarasaq, sizdin’ miyman bolip keliwin’izdi qa’lewin, u’ylerine shin kewilden mira’a’t etetug’in, quwanish penen ku’tip alatug’in ha’m hu’rmet-izzet penen shig’arip salatug’in bolsin.