Assalawma a’leykum qa’dirli doslar. Kelin’, birgelikte keshirim beriw jolindag’i qa’demlerdi ja’ne bir ma’rte ko’rip shig’amiz: Bizlerdi birew qapa qilsa. Bizler bolip o’tken waqiyani an’lap, ishki-sezimlerimizdi aniqlastirip aldiq. Bizlerdi qapa qilg’an adamdi tu’siniwge ha’reket ettik ha’m ma’lim bir da’rejede oni aqlawimiz mu’mkin. Sog’an qaramastan, ju’regimizde keshiriwimiz qiyin bolg’an bir na’rse qalip ketti. Bizlerdi qapa qilg’an adamdi keshiriwimiz ushin o’zlerimizde ku’sh ha’m batirliqti qalay tapsaq boladi?

Jarasa almay mu’na’sa’betlerimiz basqa tiklene almaydi dep qorqasiz ba? Yamasa ha’mmesi bizlerdi qapa qilg’an adamg’a baylanisli ma? Eger ol adam shin kewilden keshirim sorasa, doslar, keshire alarmedik? Keshirim beriwde en’ a’hmiyetli bolg’an na’rse bul su’yispenshilik. Eger bizler birewdi su’ysek, oni o’zlerimizden uzaqlastirmawg’a ha’reket etemiz.

Eger ol adam bizler ushin qa’dirli bolsa, oni eski kiyimge uqsatip o’mirimizden shig’arip taslay almaymiz. Ol adamdi jog’altiw, barmag’imizdi jog’altiw siyaqli boladi. Ko’pshiligimiz keshirimli boliwg’a balalig’imizdan beri u’yrengenbiz. Bizler olardi hu’rmetke ilayiqli ata-anamizdan u’yrendik, ta’rbiya bergen ustazlarimizdan u’yrendik. Bizler ha’mme waqit qa’te ha’m ayip isler qilamiz. Sog’an qaramastan jaqinlarimiz bizlerdi keshiredi. Sonin’ tiykarinda bizler su’yikli ha’m keshirilgen boliwdin’ qanday ekenligin bilip baramiz ha’m o’z na’wbetinde bul ta’jiriybe o’mirimiz dawaminda basqalardi su’yiw ha’m keshirim beriwde bizlerge ja’rdem beredi.

Su’yiwdi u’yreniwdin’ hesh qashan keshi bolmaydi. Biraq muhabbattin’ en’ birinshi sezimlerin seziw jeterli emes. Quday bizlerge ha’mmeni jaqsi ko’riwimiz kerek, dep nizam bergen bolsa da, bizler ha’mme menen jaqin qarim-qatnasta bola almaymiz. Iyemiz Iysa Qudaydin’ en’ tiykarg’i talabin to’mendegi nizamda orinlag’an: “Qudayin’ Jaratqan Iyeni shin ju’rekten, jan-ta’nin’ ha’m pu’tkil aqil-oyin’ menen su’y”, O’zin’di su’ygenin’ siyaqli, janin’dag’i adamdi da su’y”. Bul Quday ushin ha’r bir insan qa’dirli ha’m a’hmiyetli degendi bildiredi. Barliq adamlar Ol ushin ten’dey qa’dirli.

O’tken sapari aytip o’tken waqiyalardi qisqasha eslep o’tsek. Gordon Wilson qizin o’ltirgen terroristti keshiriwin aytqanda, olardin’ kimligin bilmegen. Ol su’yikli qizinan ayrilip qalg’ani ushin qayg’ida edi. Aldinda keshirimnin’ uzin joli turatug’in edi. Wilson terroristler qanshelli ayipdar bolsada, olar da Quday ushin qa’dirli adamlar ekeligine isenimin bildirdi. Usinin’ menen o’ltirgen adamlardi da keshiriwge bolatug’inlig’in ko’rsetti. Ja’ma’a’t aqsali Sam ullarin o’ltirgen adamdi ul qilip aliw niyetin aytqan waqtinda, ol Qudaydin’ ja’rdemine isengen. Ol Qudaydin’ qu’diretli su’yispenshiligine isengen. Barliq adamlar kemshiliklerine qaramay, su’yispenshilikke ilayiqli degen pikirge ko’pshiligimiz qosilamiz.