Қәдирли Тууысқанлар, жағдайдан келип шығып усыларды айтыуымыз мүмкин. Уатанымыздағы барлық ауыл хәм қалалардағы және хәр түрли районлардағы кишкене үй топарлары, бир-бирлери менен беккем байланыс қылып түрыу керек.

Әсиресе кишкене үй топарлардың жетекшилери өз ара тез-тез хәм дослық ушырасыуларды шөлкемлестирип түрыу керек. Әлбетте дослық ушырасыулары кишкене үй топарларын өз ара қатнаслары ушын жақсы тасийрин көрсетеди. Ушырасыулардан өзине жараса талаплары болыуы керек

Мысалы, жаңадан басланған кишкене үй топарлары хәм оның ағзаларын қоллап-қууатлап түрыу хәм олар ушын дууа етиу шәрт. Қәдирли тыңлаушы, енди сизлер биреуге мен сиз ушын дууа етип атырман десең, оның қууанышының шеги болмайды.

Хәр бир кишкене үй топарлары Қудайға тийисли. Егер де бир жетекши ямаса шопан өз топарын басқалардан ажыратып қойса, бундай топардың өмири узақ болмайды. Яғный топардағы тууысқанлар әстен-әстен тарқап баслайды.

Егерде олардың арасында исеними беккем тууысқанлар бар болса, өзлери қәлеген басқа топарларға барып қосылады. Қәдирли тууысқанлар бул гәплерди жигирма жылдан асып кеткен тәжрибеме таянып айтып атырман. Топарлар арасындағы қатнаслар сондай беккем болыуы керек, байрамларды да илажи барынша биргеликти өткериуге таяр болыу керек.

Басқа топар ағзаларынан биреу кесел болып қалса, тууысқанлар одан барып хабар алыуы керек. “Ауа, бул мениң топарыма тийисли емес” деген түсинше арамызда болмасын. Себеби бизлер тууысқанлармыз, бир хожалық, Әкемиз Қудай биреу. Мине усы нәрсе хәммемизди бирлеситире алыуы керек.

Қудайға шукир хәзирше кишкене үй топарлары арасында бирлик бар. Әсиресе Уатанымыздың водий жағына барсаңыз, тууысқанларымыз, сиз қайсы топарға тийислисиз деп сорап отырмайды. Олар “бизлер тууысқанлармыз” деп, қолынан келгенше хәр қандай адамды қонақ қылады.

Өз ара тууысқанлық қатнасларды жоқарғы дәрежеде көрсете алады. Сондай миймандос ушын тууысқанларымызға миннетдармыз. Қәдирли тууысқанлар, келиң басқа адамлардың әсиресе үй топарлардың тәшиуишлерине парқсыз болмайық.

Хәр қандай тәшиуиш хәм машқалаларды өзимиздики деп билейик. Бир-биримиз ушын ибадат етиуди дауам ете берейик. Сонда топарларымыз және де көбейип, беккем исенимли тууысқанларымыздың саны өсе береди. Тууысқанлар, усы жерде бугунги темамызды тамамлаймыз хәм өзимиздиң телеграммдағы danaliq.com каналымызға мурат етемиз, және дийдәр көрискенше Хош сау, саламат болыңлар!

Geyde jaqin jaqsi ko’rgen adamin’izdi qatti qapa qilip qoyadi. Bir hayal ku’yewin qapa qilg’an tanisina qarata kewlinde ko’p waqitqa shekem qapashiliq saqlap ju’rdi. “Meni qapa qilg’an adamdi keshiriw men ushin qiyin emes – deydi ol, – biraq ku’yewimdi qapa qilg’an adamdi keshiriwge haqqim joq, dep bilemen”. Ku’ndelikli o’mirimizde ushrap turatug’in arzimaytug’in qapashiliqlar ushin bizler basqalardi an’satqana keshiremiz ha’m o’z na’wbetinde bizlerdi de keshiredi. Misali ushin, kimdir ayag’imizdi bilmey basip qoysa, bizler: “ Hesh ga’p! bolip turadi” – dep aytamiz. Al bazi waqitlari jumis orinlarimizda, qatti eskertiwinen qapa bolip, qabag’imizdi u’yip otirg’animizdan go’re jumisimizdi toqtatip turip, barip keshirim soraymiz. Doslar, bizler keshiremiz, bizlerdi de keshiredi. Biraq qiyin teren’ qapashiliqlardi qalay keshiremiz? Bunday jag’daylarda keshiriwimiz kerek pe?

Bunday sorawlarg’a juwap tapqan adamlar bar eken. Sorawg’a juwap tapqanlar keshiriw ha’m keshiriliwdi shini menen basinan o’tirgen ha’m keshirim beriw qa’mshelli a’hmiyetli ekenin ju’da’ jaqsi biledi. Muxaddes Kitap bizlerge “Keshir ha’m sen de keshirilesen’” deydi. Eger Muxaddes Kitapta jazilg’anlardin’ haqiyqat ekenin o’zlerin’izde sinap ko’riwdi qa’lesen’iz, Qudaydin’ nizamina qulaq salip, kewlin’izdi qiynap, tasqa uqsap batip turg’an g’a’zep ha’m qapashiliqlardi umitiwg’a ha’reket etin’. Eger bilsen’iz budan en’ ko’p payda ko’rgen o’zin’iz bolasiz. Sebebi ishimizdegi g’a’zep ha’m qapashiliqlar bizlerdi Qudaydin’ bizlerge bolg’an niyetleri ha’m rejelerinen uzaqlastiradi. Ko’zlerimiz ha’m kewilimiz tiniqlasqanday boladi. Buni bu’ginnin’ o’zinde-aq sinap ko’rsen’iz boladi. Qiyin bolip ko’riniwi mu’mkin, biraq ha’reket etiwde dawam ete berin’. Quday bizler menen birge.

Awizdan shiqqan jaman ga’pler tek g’ana ruwxiy jaraqatlap qoymay, ba’lkim fizikaliq denemizdin’ de awiriwina sebep boliwi mu’mkin eken. Sizdi kemsetkende yamasa aldag’aninda miyin’izge qu’yilip kelgen jawizliq ha’m qorqiw sezimi, urip atirg’an ju’regin’izdin’ is-ha’reketine kesent berip, qanin’iz quramin o’zgertip jiberedi eken.

Jawizlarsha aytilg’an ga’pler, qorqinishli waqiyalar adamda ju’rek toqtawi yag’niy infarkt ha’m miyge qan qu’yiliwina sebepshi bola aladi eken. Ayag’in’izdi kesip alg’anin’izda sezgen awiriwin’iz sizdi jaraqatlang’anin’iz haqqinda xabarlandiradi ha’m abayli boliwin’iz kerekligin “aytadi”. Bunday waqitta sizdi jaqsi ko’rgen jaqinlarin’izdan jubanish aliwin’iz mu’mkin yamasa jaraqatin’izdi tigiw kerek bolsa shipakerge bariwin’iz mu’mkin.

Kemsitilgen waqitta jawizliqti seziw saw pikirlewshi ha’r qanday adam ushin ta’biyiy. Eger itibarg’a almasa bolatug’in qapashiliq bolg’an bolsa, buni tu’sinip o’zimizdi qolg’a alg’animiz jaqsiraq eken. Biraq qapashiliq teren’ is alg’an bolsa, onda ja’rdem kerek boladi. Bir jerimiz awirip tu’rg’anda itibarsiz bola almaymiz. Onday waqitlari kewlin’izdi alip, ja’rdem bere alatug’in adam menen bo’liskenin’iz maqul.

Ko’binshe kewlimiz awiriwdan jazilip ketiwine waqit kerek boladi. Jarasip aliwdin’ en’ jaqsi joli bul bizlerge azap bergen adam menen ashiq, tinishliqta so’ylesip aliw eken. “Aytiwina qarag’anda, kewlin’di awirtip qoyg’an uqsayman. Men bul awriwdi tu’sinip, sezbegenimshe, qilg’an isimnen pushayman ekenimdi, o’z muhabbatimdi ha’m seni juwbatiwdi qa’leytug’inimdi ko’rsetpegenimshe, sa’wbetti toqtatpayiq”. Qapashiliq qaldirg’an jaraqattan qutiliwdin’ ha’m tez ta’wir bolip ketiw ushin a’dette usinday sa’wbetlesiwdin’ o’zi jeterli dep oylaymiz.

Biraq, qatti qapa bolg’animiz ushin ol adamdi keshiriw ol jaqta tursin, ol haqqinda ha’tteki esitiwdi de qa’lemeysiz. Ju’regin’izde uwda-shuw bolip atirg’an qapashiliq, jawizliq, o’kpe hesh basilmayatir. Kerisinshe, bara-bara ku’sheyip, qapashiliqtin’ teren’ tamir saliwina sebep bolip atir. Ha’r sapari bolip o’tken waqiyani oylag’anin’izda ish-ishin’izden ku’yip, tu’tep ketesiz. Ishin’izdegi qapashiliq ha’m g’azep qaynap, a’tiraptag’ilarg’a da shashiray baslaydi. O’zin’izge-o’zin’iz: “Endi men hesh kimge hesh qashan isenbeymen”, dep, basqalardi o’zin’izge jaqinlatpaysiz. Qapashiliq qansha teren’ bara berse, den-sawlig’in’izg’a sonshelli jaman ta’sirin o’tkize beredi eken.

Qa’legen shipakerimizge barip ko’reyik, ol bizlerge ju’regimizdegi qapashiliq dep atalg’an awiriwdan shipa taba almayatirg’an ko’plegen nawqaslardi ko’rsetiwi mu’mkin. Ba’lkim g’azep basinda onsha qorqinishli bolip ko’rinbewi mu’mkin. Biraq qansha ko’p uzaqqa sozilsa sonshelli qa’wipli bolip baradi. O’zimizdin’ paydamiz ushin da bizler keshiriwdi u’yreniwimiz kerek.

Hu’rmetli doslar, keshiriwimiz kerek bolg’an sebeplerdin’ biri o’zlerimiz ekenligin bilip aldiq, sebebi qapashiliq sezimi bizlerdi ruwxiy ha’m fizikaliq jaqtan mayiradi. Biraq basqa sebepler de bar. Aramizda hesh kim o’zin ayipsiz dep aytalmaydi. Eger kewlimiz ashiq ha’m hadal bolsa, o’zlerimizdi basqalarg’a uqsap qilg’an qa’telerimiz ushin keshirim aliwg’a mu’ta’j dep bilemiz. Bizler basqalardin’ keshirimine, Qudaydin’ keshirimine mu’ta’jbiz.

Qa’dirli tuwisqanlar, kishi u’y toparlarinda sonday bir quwanishli ha’m ruwxqa shad mu’na’sebetlerdi tilep, topar ag’zalari o’zlerinin’ o’mir ta’jiriybeleri menen bo’lisiwde jaqsi imkaniyatlar bolsin.

Sonda g’ana basqalar olardin’ o’mirge bolg’an ko’z qaras sayahatlari arqali Qudaydin’ qa’lewi boyinsha jaratilg’an haqiyqiy ma’niske iye bolip o’sedi. Bunday dosliq u’yreniwshilerdi teren’ da’rejege alip baradi.

Doslar, toparda sa’wbetler o’tkeriw ushin, kishirek toparlag’a bo’linip islegen, bazi waqitlarda a’hmiyetlirek boladi. Ta’rtipsizlik diqqatqa ha’m sa’wbetke kesent keltirip toxtatip turiwi mu’mkin. Egerde ekew bolip sa’wbet o’tkeretug’in topar bir bo’lmede ushirassa olar bir-birin shalg’itiwi mu’mkin, sebebi ku’shlirek topardag’i so’zler diqqatti o’zine tartip, ekinshi topardag’i so’zler esitilmey, diqqati basqa jaqqa awdarilip ketedi.

Egerde toparlar bir bo’lmede, ya u’yde qalg’an bolsa, olar u’sh toparg’a bo’lingeni maqul boladi. Sonda arqan’izda bolg’an jeke ga’plerge qarang’anda, sa’wbetler “tinishlang’an xaldag’i sa’wbetke” aylanip ketedi. Sa’wbetlerden son’ a’lbette birgelikte duwa etin’. Ibadatqa bolg’an mu’ta’jliklerin’izdin’ dizimin saqlan’.

Keyin ala siz sol mu’ta’jliklerdi ko’rip-tanisip shig’iwin’iz mu’mkin ha’m keyin ala Qudaydin’ juwabin ko’rsen’iz boladi. Duwa etiwdin’ ja’ne bir paydali joli bul Quday menen jeke sa’wbette bolg’an sayin, ibadattin’ ishki ta’biyati sonshelli aniq boliwi siyaqli sezimleri ta’sir etip, tek g’ana bir ma’selege ha’mme diqqat awdarg’anday bolip seziledi.

Basqasha etip aytqanda, topardin’ ha’r bir ag’zalari bir g’ana mu’ta’jlik ushin duwa etse, bir ag’zadan son’ ekinshisi, ha’m son’inan ha’mme qa’lewshiler qiladi. Topar jetekshisi keyingi ibadat mazmuni menen tanistirip baradi ha’m sol usildi ja’ne qaytaradi.

Bunday etip ibadat etiwdin’ jollarinin’ ju’da paydali ekenligin ko’rsetedi, sebebi bul ha’r bir jeke mashqala u’stinde Quday menen qatnasiqta boliwg’a imka’niyat jaratadi. Bir ma’sele boyinsha ibadat etip bolmay son’g’i ma’selege o’tpen’. Ko’binese ibadat, bul Quday menen bolg’an birgeliktegi sa’wbet dep ataladi.

Egerde bizler tuwri sa’wbetlessek, ibadat waqtinda bir ma’seleden ekinshi ma’selege sekirip o’tip ju’rmeymiz. Sonnan keyin de ibadatlarimiz bazardag’i sawdalasiwg’a uqsap qalmay, ko’birek sa’wbetke jarasadi.

Qa’dirli tuwisqanlar, kishi u’y toparlarinin’ tiykarg’i ma’qsetlerinin’ ja’ne biri – iseniwshilerdin’ bir-biri menen jaqiniraq tanisip aliwi, bul ne ushin kerek? Sebebi geypara topar ag’zalari ha’mmenin’ aldinda aytalmaytug’in, ibadatqa degen mu’ta’jliklerin basqalarg’a jariya almay, tek g’ana o’zine maqul bolg’an jaqin kisi menen bo’lisedi ha’m birgelikte duwa etedi.

Kishi u’y toparlarinin’ ag’zalari imka’ni barinsha bir-birleri menen jaqin kewilde boliwi lazim. Bul toparlarimizdin’ ja’nede ku’shlirek boliwina alip keledi. Sonin’ menen qa’dirli tuwisqanlar, bugingi sa’wbetimiz de o’z juwmag’ina kelip jetti. Bizlerdin’ internet saytimizdin’ ma’nzili danaliq.com ja’nede sizler menen amanliqta ushirasqansha xosh dep qalamiz.