Assalawma a’leykum hu’rmetli tin’lawshilar. Quday sizge so’ylegeninde, sizden talap etip atirg’an na’rse bul – isenim. Siz Eski Kelisim qaharmanlarin bilesiz. Eski Kelisimge qarasan’iz, Jan’a Kelisimge qarasan’izda Quday O’zin, ma’qsetin ha’m jollarin a’piwayi iseniwshilerge, payg’ambarlarg’a ha’m ruwhaniylerge ko’rsetkeninde, olardan talap etken na’rsesi bul – isenim bolg’an. Qudayg’a sizdin’ atina iseniwshi bolg’anin’iz emes, Ol menen birge isenim arqali qa’dem taslawin’iz qiziqtiradi.

Quday Muxaddes Kitapta isenim haqqinda neler degenin bilesiz be? Esin’izden shiqqan bolsa, ha’zir bul ayatlardi birge yadimizg’a tu’siremiz: “Isenim – bul u’mit etilgen na’rselerdin’ a’melge asatug’inina ha’m ko’rinbeytug’in zatlardin’ bar ekenine gu’mansiz iseniw” (Evreylerge 11:1). Ko’pshiligimiz ko’riw arqali iseniwge u’yrengenbiz. Biraq Quday qa’leytug’in isenim – bul ko’riwge tiykarlanbag’an. Muxaddes So’z aytqaninday, bizler tek g’ana isenim arqali Qudaydin’ bar ekenine, Ruwxi arqali bizlerde islewine, bizlerdi qorg’awina isenemiz, ha’m boysinamiz.

“O’ytkeni bizler ko’zge ko’rinetug’in na’rselerge emes, al isenimimizge su’yenip jasaymiz” (2 Korin 5:7). Ko’rip iseniw an’sat. Insan ko’rgen na’rsesine iseniwge u’yrenip qalg’an. Isenim ha’m boysiniwshiliq penen jasaw Qudayg’a bolg’an isenimnin’ qay da’rejede ekenin belgilep beredi. Bul an’sat jol bolmasada, buni Qudayg’a isengen ha’r bir iseniwshi qila aliwi mu’mkin.

Iysa sha’kirtlerine bilay degen: … “Sizlerge shinin, haqiyqatin aytaman: Mag’an isengen adamnin’ o’zi de Men islegen islerdi isleydi, ha’tte, olardan da u’lkenirek islerdi isleydi. Sebebi Men A’keme baratirman” (Yuxan 14:12).

“Shini menen sizlerge aytip turman: eger isenimin’iz qishqil tuqiminday g’ana bolsa da, bul tawg’a: “Usi jerden ana jerge ko’sh!” desen’ler, ol ko’shedi. Sizlerdin’ qolin’izdan kelmeytug’in hesh na’rse bolmaydi, – dedi” (Matta 17:20).

Pavel bilay deydi: “So’ylegen so’zim ha’m aytqan wazim isendiriwshi danaliqqa emes, al Muxaddes Ruwxtin’ O’z qu’direti menen ko’rsetken da’liline tiykarlang’an edi” (1 Kor 2:4).

“Eger isenimin’izde bekkem turmasan’iz, hesh qashan tura almaysiz” (Iyshaya 7:9).

Isenim – bul Quday aytqan na’rselerdin’ boliwina, Qudaydin’ wa’deleri a’melge asiwina iseniw degen. Ko’z benen ko’riw isenimnin’ kerisi bolip tabiladi. Siz ko’z benen ko’rip turg’an na’rsen’izge isenimnin’ keregi joq. Bizlerge bizler qila alatug’in tapsirma berilse, bug’an isenimnin’ ha’jeti bolmaydi.

Sizdin’ isenimin’iz qanday da bir pikirge yamasa ideyag’a tiykarlang’an bolmawi kerek. Isenim – Qudayg’a qaratilg’an boliwi kerek. Iysa Masiyx aytqaninday, qishqil tuqiminday isenimimiz bolsa, bizlerge hesh na’rse imkansiz bolmaydi. Iysa aytqaninday, Og’an isengenler Ol etken islerdi ha’m odan da u’lken islerdi qiliwg’a qa’dirmiz. Onin’ jasap o’tkenine, adamzattin’ gu’nalarin alg’anina iseniwdin’ o’zi jeterli emes. Og’an isengen adam Onin’ nizamlarin da orinlawi lazim. Sonda Ol etken islerdi ha’m odan da u’lkenirek islerdi qiliwg’a qa’dir boliw mu’mkin. Bizlerdin’ isenimimiz adamlardin’ danalig’ina emes, Qudaydin’ qu’diretine tiykarlang’an bolsin. Bekkem isenimi bolmag’an iseniwshi adam jolda qag’ilip jig’iliwi aniq. Jolda qag’ilip jig’ilmawimiz ushin Qudayg’a bolg’an isenimimizdi bekkemleyik, qa’dirli doslar.